Read Rejang LUKAS 9 Bible Online

LUKAS 9 - Rejang bible

LUKAS 9

¹Yesus menok keduai belas murid-Ne, lajau melei ngen tobo'o kuaso utuk musir roh kidek ngen kema'en olon.

²Sesudo'o Si meluak tobo'o lalau kema'en tun bolon ngen semiar bito tetang awei ipe Allah meriteak sebagai Rajo.

³ “Jibeak mbin jejano utuk pemaneunu,” nadeak Yesus ngen tobo'o. “Jibeak mbin tokot, katung sedekeak, kembuk, caci, kulo duai lambea bajau.

⁴Neak ipe bae udi tenimo, tinggeaba neak di sapei udi teminggea kota o.

⁵ Ngen neak ipe udi coa tenimo, pado waktau udi teminggea kota o, nersiba debu kunei telapok kekeanu, sebagai peringatan te'adep tobo'o.”

⁶Murid-murid Yesus berakat, lajau lalau moi sadei utuk melei namen Bito Baik o ngen kema'en tun bolon neak ipe-ipe.

⁷ Ketiko Herodes, de meriteak neak Galilea, temi'uk tetang kute kejijai o, si bingung. Sebab ade de madeak bahwo Yohanes Pembaptis sudo idup igai.

⁸Ade kulo de madeak bahwo Elia sudo timboa igai. Tun luyen kulo madeak bahwo suang nebai kunei nebai-nebai bel'o sudo idup igai.

⁹Herodes madeak, “Uku sudo meluak tun motong ulau Yohanes. Tapi Tun yo, api sebeneane Si? Ade dau de sudo uku temi'uk tetang Si.” Mako Herodes berusaho utuk kemliak Yesus.

¹⁰Rasul-rasul Yesus belek ngen cemrito ngen Yesus kute de tobo'o sudo menea. Yesus majok tobo'o, lajau lalau besamo tobo'o nyikir moi kota Betsaida.

¹¹Tapi ketiko tun-tun namen tetang hal o, tobo'o temotoa Yesus. Si temimo tobo'o, lajau miling ngen tobo'o tetang awei ipe Allah meriteak sebagai Rajo. Ngen Si kulo kema'en tun bolon neak antaro tobo'o.

¹²Waktau matai bilai muloi tebenem, keduai belas murid Yesus teko ngen-Si ngen madeak, “Bak, penan yo sunyai. Lebiak baik Bak meluak tun-tun yo lalau, supayo tobo'o dapet mesoa kembuk ngen penan temalem neak sadei-sadei neak rogok yo.”

¹³Tapi Yesus jemawab, “Udi bae melei tobo'o kembuk.” Murid-murid Yesus madeak, “Keme cuma temuan lemo ruti ngen duai kan. Jano keme harus lalau melei kembuk utuk kute tun yo?”

¹⁴(Ade kekiro lemo ribau tun semanei neak di.) Yesus madeak ngen murid-murid-Ne, “Neluakba tun-tun yo temot bekelopok, kekiro lemo puluak tun do klopok.”

¹⁵Murid-murid Yesus o menea jano de nadeak Yesus ngen tobo'o.

¹⁶Lajau Yesus mok lemo ruti ngen duai kan o, sesudo'o nanggeak moi lenget ngen mucep mokasiak ngen Allah. Sesudo'o o Si megit ruti ngen kan o ngen tangen-Ne lajau meleine ngen murid-murid-Ne utuk nagiak ngen tun dau o.

¹⁷Tobo'o kutene mbuk sapei kenyang. Lajau murid-murid Yesus kemopoa lebiak kembuk o sekedau duai belas bokoa.

¹⁸Pado do bilai, waktau Yesus gidong bedu'o suang, murid-murid-Ne teko ngen-Si. Yesus temnai ngen tobo'o, “Temurut kecek tun, Uku yo api?”

¹⁹ Tobo'o jemawab, “Ade de madeak Yohanes Pembaptis. Ade kulo de madeak Elia, de luyen igai madeak saleak suang nebai zaman bel'o de sudo idup igai.”

²⁰ “Tapi temurut udi suang, Uku yo api?” tanye Yesus. Petrus jemawab, “Bak adeba Rajo Penyelamat de jenanjai Allah.”

²¹Lajau Yesus madeak ngen murid-murid-Ne, “Jibeak dedebat melei namen hal o ngen api bae.”

²²Yesus madeak kulo, “Anok Manusio memang harus dau meding saro ngen tenulok pemipin-pemipin ngen imem-imem kepalo, serto gu'au-gu'au agamo. Si bakea nunuak, tapi pado bilai ketelau bakea idup igai.”

²³ Nadeak-Ne ngen tobo'o kute, “Tiep tun de lok temotoa Uku harus muker diraine, musung salibne tiep bilai ngen temotoa Uku.

²⁴ Kerno api bae de lok semlamat nyabaine, si bakea kelnyep nyabaine. Tapi api bae kelnyep nyabaine kerno Uku, si bakea senlamat.

²⁵Jano utungne bagiak suang amen kute dunio yo jijai hokne, tapi si musak ngen kelnyep idupne?

²⁶Amen tun selek makau Uku ngen kecek-Ku, Anok Manusio kulo bakea selek makau tun o pado waktau Si teko igai ngen kuaso-Ne, ngen kuaso Bapa serto kuaso malaikat-malaikat de sucai!

²⁷Sesungguakne Uku madeak ngen udi: Neak antaro tun de hadir neak piyo ade de coa bakea matei ayok tobo'o kemliak Allah meriteak sebagai Rajo.”

²⁸ Kekiro lapen bilai sesudo Yesus majea hal-hal o, Si mbin Petrus, Yohanes, ngen Yakobus moi das do tebo utuk bedu'o.

²⁹Ketiko Si gidong bedu'o, rupo papea-Ne bubeak ngen jubah-Ne jijai putiak besinea.

³⁰Lajau ketenba duai tun miling ngen Si, adeba Musa ngen Elia.

³¹Keduaine kemten dirai lem kemulio ngen miling tetang tujuan lalau Yesus de bakea naneu-Ne neak Yerusalem.

³²Pado waktau o Petrus ngen kekuatne bi tetidua, tapi tetibo klongon, ngen kemliak Yesus becahayo ngen duai tun o je ngen Si.

³³Pado waktau keduai tun o lok teminggea Yesus, Petrus madeak ngen Yesus, “Gu'au, baik nien ite neak piyo. Baikba keme uyo temgok telau kemah, do utuk Kumu, do utuk Musa ngen do utuk Elia.” Tapi Petrus coa namen jano de nadeakne o.

³⁴Sementaro si madeak awei yo, tekoba mbun magea tobo'o. Ngen waktau tobo'o masuk moi lem mbun o, sabenba tobo'o.

³⁵ Lajau teti'ukba sa'ei kunei lem mbun o, de madeak, “Dioba Anok-Ku de Uku miliak, teni'ukba Si.”

³⁶Ketiko sa'ei o teti'uk, ketenba Yesus tinggea suang dirai. Murid-murid Yesus diem bae tetang kutene o, ngen coa melei namen ngen api bae kulo jano de bi tobo'o keliak.

³⁷Bilai menne Yesus ngen ketelau murid-Ne tu'un kunei tebo o, ngen tun dau teko ngen Yesus.

³⁸Suang kunei tun dau o madeak, “Gu'au, uku minoi supayo Ko kemliak anokku, sebab si adeba dedone anokku.

³⁹Sewaktau si senrang roh, lajau mendadak si menggang ngen roh o gemucangne sehinggo bibiane bukuak. Roh o terus bae semikso si ngen gesea coa lok teminggeane.

⁴⁰Uku bi minoi ngen murid-murid-Nu supayo tobo'o musir roh o, tapi tobo'o coa dapet.”

⁴¹Yesus jemawab, “Padeak kejijai udi yo! Udi sungguak tun-tun de nyeleweng ngen coa masai! Sapei tengen Uku harus tinggea besamo udi ngen besabar te'adep udi? Mbin anoknu o moi miyo!”

⁴²Sementaro anok o paneu ngen Yesus, roh kidek o manet si ngen menea awokne kejang-kejang. Tapi Yesus meriteak roh kidek o keluea ngen ka'enba anok o. Lajau anok o senreak igai ngen tiakne.

⁴³Kute tun sele kemliak kuaso Allah de kembiak lai. Waktau kute tun o masiak sele kerno kute de Si menea o, Yesus madeak ngen murid-murid-Ne,

⁴⁴“Ti'ukba ngen kenliakba kute kecek-kecek-Ku yo: Anok Manusio bakea senreak moi lem tangen manusio.”

⁴⁵Tapi murid-murid Yesus o coa ngertai ngen kecek-Ne o. Hal o neresio ngen tobo'o supayo tobo'o coa ngertai. Tapi tobo'o saben temanye hal o ngen-Si.

⁴⁶ Neak antaro murid-murid Yesus timboa betekea tetang api kunei tobo'o de paling lai.

⁴⁷Yesus namen pekeran tobo'o, sebab o Si mok suang anok titik ngen menea anok o je neak depeak-Ne.

⁴⁸ Lajau Si madeak ngen murid-murid-Ne, “Tun de temimo anok yo kerno Uku, taine temimo Uku. Ngen tun de temimo Uku, temimo Si de mutus Uku. Sebab tun de titik neak antaro udi, siba de paling lai!”

⁴⁹Yohanes madeak, “Gu'au, keme kemliak tun musir semat das gen-Nu, ngen keme temgea si, sebab si iso kunei ite.”

⁵⁰“Jibeak temgea si,” nadeak Yesus ngen Yohanes ngen murid-murid Yesus de luyenne, “Sebab tun de coa melawen udi, si ade neak pihak udi.”

⁵¹Ketiko sudo pa'ok waktaune Yesus naket moi surgo, Si mok putusan utuk lalau moi Yerusalem.

⁵²Mako Yesus meluak tun lalau demute Si. Tun-tun de neluak-Ne o lalau, lajau masuk moi do sadei neak Samaria utuk semiap kute sesuaktau bagiak Yesus.

⁵³Tapi tun-tun neak sadei o coa lok temimo Yesus, sebab nyato sekilai Si gidong lalau moi Yerusalem.

⁵⁴ Mako pado waktau penotoa-penotoa Yesus, adeba Yakobus ngen Yohanes namen tetang hal o, tobo'o madeak, “Tuhan, jano Kumu lok, supayo keme meluak opoi tu'un kunei lenget utuk mbuk tobo'o?”

⁵⁵Bakea tapi Si jemling ngen temgur tobo'o.

⁵⁶Lajau tobo'o lalau moi sadei de luyen.

⁵⁷Ketiko Yesus ngen penotoa-penotoa-Ne temrus paneu tobo'o, madeakba suang neak tengeak dalen magea Yesus, “Uku bakea temotoa Kumu, moi ipe bae Kumu lalau.”

⁵⁸Yesus madeak magea si, “Srigala temuan lubang ngen burung temuan sa'ang, tapi Anok Manusio coa temuan penan utuk mpek ulau-Ne.”

⁵⁹Lajau Si madeak magea suang luyen, “Milemba Uku!” Tapi tun o madeak, “Nizinba uku lalau kileak kemubua bapaku.”

⁶⁰Tapi Yesus madeak magea si, “Kunyauba tun matei kenubua tun matei. Tapi kumu, lalauba ngen melei namen bahwo Allah meriteak sebagai Rajo neak ipe-ipe.”

⁶¹ Ngen suang luyen igai madeak: “Uku bakea temotoa Kumu, Tuhan, tapi nizinba uku belek kileak utuk pamiti ngen keluargoku.”

⁶²Tapi Yesus madeak, “Tetiep tun de siap utuk mbajok, tapi kemliak moi belakang, coa patut jijai anggota umat Allah.”