Read Rejang YOHANES 13 Bible Online

YOHANES 13 - Rejang bible

YOHANES 13

¹Ayok bilai rayo Paskah muloi, Yesus bi namen bahwo waktau-Ne bi sapei utuk lalau kunei dunio yo ngen Bak. Si kemasiak tun-tun milik-Ne de neak dunio yo, si mengasiak tobo'o sapei moi sudone.

²Ketiko tobo'o dong mukmei sesamo, Iblis bi misik rencano lem atei Yudas Iskariot, anok Simon, utuk mianat Yesus.

³Yesus namen bahwo Bak bi semreak kutene ngen Si bahwo Si teko kunei Allah ngen bakea belek ngen Allah.

⁴Lajau klongonba Yesus ngen temanggea jubah-Ne. Si mok delam bea kain lenan ngen meket-Ne moi pinggang-Ne.

⁵Sesudo'o Si me'eng bioa moi lem do reseng ngen muloi mpuk kekea penotoa-penotoa-Ne lajau melapne ngen kain de tepeket neak pinggang-Ne o.

⁶Lajau sapei ba Si ngen Simon Petrus. Nadeak Petrus ngen Si, “Tuhan, Ko lok mpuk kekeaku?”

⁷Jawab Yesus ngen si, “Jano de Uku menea, ko coa namen uyo, tapi be ko bakea ngertai.”

⁸Nadeak Petrus ngen Si, “Ko coa bakea mpuk kekeaku sapei seke'anne.” Jawab Yesus, “Amen Uku coa mpuk kekeanu, ko coa dapet bagiak lem Uku.”

⁹Nadeak Simon Petrus ngen-Si, “Tuhan, jibaek kekeaku bae, tapi tangen ngen ulauku kulo!”

¹⁰Nadeak Yesus ngen Petrus, “Api bae de sudo mendai, si jibeak mpuk dirai igai tapi mpuk kekea ne, udi bi bersih, tapi coa kutene.” (

¹¹Sebab Si namen, api de bakea semreak Si. Kerno o Si madeak, “Coa kute udi bersih.”)

¹² Sesudo Si mpuk kekea tobo'o, Si makei keracok-Ne ngen belek moi penan-Ne. Lajau Si madeak ngen tobo'o, “Ngertai udi jano de sudo Uku menea ngen udi?

¹³Ko madeak Uku Gu'au ngen Tuhan, keceknu o tepat, sebab memang Uku ba Gu'au ngen Tuhan.

¹⁴Amen Uku, Tuhan ngen Gu'aunu, mpuk kekeanu, mako udi wajib saling mpuk kekeanu.

¹⁵Sebab Uku bi melei teladan ngen udi, supayo udi kulo menea serai awei de sudo Uku menea ngen udi.

¹⁶ Sesungguakne Uku madeak ngen udi: Suang pelayan coa ba lebiak lekat kunei Tuan ne, suang utusan coa lebiak lai kunei pado de mutusne.

¹⁷Amen udi namen kutene yo, mako riang ba udi, amen udi menea ne.

¹⁸ Iso tetang udi kute Uku madeak. Uku namen, api de sudo Uku piliak. Tapi jano de tenulis neak lem Alkiteb harus tejijai, ‘Tun de mbuk besamo Uku, bakea melawen Uku.’

¹⁹Uku madeakne ngen udi uyo kulo ayok hal o tejijai, supayo amen hal o tejijai, udi pecayo bahwo Uku ba Si.

²⁰ Sesungguakne Uku madeak ngen udi: Api bae de temimo tun de nutus-Ku, si temimo Uku, si temimone de mutus Uku.”

²¹Sesudo Yesus madeak awei o, Si jijai ibo, lajau besaksai, “Sesungguakne Uku madeak ngen udi, saleak suang neak antaro udi, bakea semreak Uku.”

²²Penotoa-penotoa o samo-samo kemliak suang ngen de luyen, tobo'o ragau api de maksud-Ne.

²³Saleak suang neak antaro penotoa Yesus, adeba penotoa de kemasiak-Ne, nyandea pa'ok-Ne, depeak kanen-Ne.

²⁴Simon Petrus melei isyarat ngen penotoa-penotoa'o supayo si betanye ngen Yesus api de maksudne.

²⁵Lajau penotoa de temot pa'ok Yesus o jemling, betanye ngen Si, “Tuhan, api do'o?”

²⁶Jawab Yesus, “Siba de bakea Uku melei ruti, sesudo uku cemlupne.” Sesudo madeak awei o Si cemlup ruti o, lajau mok ngen meleine ngen Yudas, anok Simon Iskariot.

²⁷Sesudo Yudas temimo ruti o, si pasuk semat. Lajau Yesus madeak ngen si, “Jano de ko lok menea, menea ba segro.”

²⁸Tapi coa ade suang kulo kunei antaro tobo'o de temot mukmei o ngertai getai Yesus madeak o ngen Yudas.

²⁹Kerno Yudas megong kutak, ade de sako bahwo Yesus meluak si temukua bae utuk pesta o, melei jano bae ngen tun peset.

³⁰Sesudo temimo ruti o, Yudas segro lalau, pado waktau o bilai bi kelmen.

³¹Sesudo Yudas lalau, madeakba Yesus, “Uyo Anok Manusio nujai ngen Allah kulo nujai lem Si.

³²Amen Allah nujai lem Si, Allah bakea de mulio-Ne kulo lem dirai-Ne ngen bakea mulio Si ngen segro.

³³ Hoi anok-anok-Ku, Uku coa bakea tinggea an igai ngen udi. Udi bakea mesoa Uku, awei de sudo Uku madeak ngen tun-tun Yahudi. Moi penan Uku lalau, coa mukin udi teko, awei'o kulo uyo Uku madeakne ngen udi kulo.

³⁴ Uku melei priteak blau ngen udi, adeba supayo udi saling mengasiak, serai awei Uku kemasiak udi, awei'o kulo udi arus saling kemasiak.

³⁵Amen udi saling mengasiak mako kute tun bakea namen bahwo ko adeba penotoa-penotoa-Ku.”

³⁶Simon Petrus madeak ngen Yesus, “Tuhan, moi ipe Ko lalau?” Jawab Yesus, “Moi penan Uku lalau, ko coa dapet temotoa Uku uyo, tapi be ko bakea temotoa Uku.”

³⁷Nadeak Petrus ngen Si, “Tuhan, getai Uku coa dapet temotoa Ko uyo? Uku bakea melei nyabaiku utuk-Nu!”

³⁸Jawab Yesus, “Nyabainu bakea ko melei utuk-Ku? Sesungguakne Uku madeak ngen udi: Ayok monok bekokok, ko bi muker Uku telau kilai.”