Read Rejang YOHANES 14 Bible Online

YOHANES 14 - Rejang bible

YOHANES 14

¹Yesus madeak ngen tobo'o, “Jibeak liseak ateinu; pecayoba ngen Allah, pecayoba kulo ngen Uku.

²Neak umeak Bak-Ku dau penan tinggea. Amen coa awei ipe, paset uku madeakne ngen nu. Sebab Uku lalau moi di utuk semiyap penan utuknu.

³Amen Uku lalau moi di ngen bi semiyap penan utuknu. Uku bakea teko igai mbin udi moi penan-Ku, supayo neak penan Uku ade, udi kulo ade.

⁴Moi ipe Uku lalau, udi namen dalen moi mindi.”

⁵Nadeak Tomas ngen Yesus, “Tuhan, keme coa namen moi ipe Ko lalau; awei ipe keme namen dalen moi mindi?”

⁶Nadeak Yesus ngen Si, “Uku ba dalen utuk kemnal Allah ngen dapet idup. Coa ade suang de teko ngen Bak, amen coa liwet Uku.

⁷Sekirone udi namen ngen Uku, paset udi kulo namen ngen Bak-Ku. Uyo udi namen ngen Si, udi bi kemliak Si.”

⁸Nadeak Filipus ngen Yesus, “Tuhan, kentenba Bak o ngen keme, do'o bi cukup utuk keme.”

⁹Nadeak Yesus ngen Si, “Bi an Uku sesamo udi, Filipus, tapi ko coa namen ngen Uku? Api bae de sudo kemliak Uku, si bi kemliak Bak. Awei ipe ko madeak: ‘Kenten ba Bak o ngen keme’!

¹⁰Coa pecayo ko bahwo Uku lem Bak ngen Bak lem Uku? Jano de Uku madeak ngen udi, coa Uku madeak kunei dirai-Ku suang, tapi Bak, de tinggea lem Uku, Siba de menea kerjo-kerjo-Ne.

¹¹Pecayoba ngen-Ku bahwo Uku lem Bak ngen Bak lem Uku; pecayoba kerno kerjo-kerjo o suang.

¹²Sesungguakne Uku madeak ngen udi: Api bae de pecayo ngen Uku, si bakea menea kulo kerjo-kerjo de Uku menea, bahkan kerjo-kerjo de lebiak lai kunei o. Sebab Uku lalau ngen Bak.

¹³Jano bae de udi minoi lem gen-Ku, Uku bakea kemerjone, supayo Bak nujai lem Anok.

¹⁴Amen udi minoi sesuaktau ngen Uku lem gen-Ku, Uku bakea kemerjono.”

¹⁵“Amen udi kemasiak Uku, udi bakea temotoa kute periteak-Ku.

¹⁶Uku bakea minoi ngen Bak. Si bakea melei ngen udi Penolong de luyen, supayo si semerto udi seke'anne.

¹⁷Si'oba Roh kebenea. Dunio coa dapet temimo Si, sebab dunio coa kemliak Si ngen coa namen ngen Si. Tapi udi namen ngen Si, sebab Si semerto udi, bakea diem neak lem udi.

¹⁸Uku coa bakea teminggea udi awei Yatim Piatu. Uku teko igai ngen udi.

¹⁹Tegoa igai dunio coa bakea kemliak Uku, tapi udi bakea kemliak Uku sebab Uku idup ngen udi kulo bakea idup.

²⁰Pado waktau'oba udi bakea namen bahwo Uku lem Bak-Ku ngen udi neak lem Uku ngen Uku lem udi.

²¹Api bae de megong periteak-Ku ngen kemerjone, siba de kemasiak Uku! Api bae de kemasiak Uku, si bakea kenasiak Bak-Ku ngen Uku kulo bakea kemasiak si ngen bakea melei namen dirai-Ku ngen si.”

²²Yudas, de iso Iskariot, madeak ngen Si, “Tuhan, jano sebabne mako Ko lok kemten dirai-Nu ngen keme, iso ngen dunio?”

²³Jawab Yesus, “Amen suang mengasiak Uku, si bakea temotoa firman-Ku ngen Bak-Ku bakea mengasiak si. Keme bakea teko ngen si ngen tinggea sesamo ngen si.

²⁴Api bae de coa mengasiak Uku, si coa temotoa firman-Ku. Firman de udi temi'uk iso kunei Uku, tapi kunei Bak de mutus Uku.

²⁵Kutene o Uku madeak ngen udi, semasiak Uku ade sesamo ngen udi.

²⁶Tapi penulung, adeba Roh Sucai, de bakea nutus Bapa lem gen-Ku. Siba de bakea ngajea kute sesuaktau ngen udi ngen bakea minget udi kute de sudo Uku madeak ngen udi.

²⁷Damoi sejahtera Uku melei utuk udi. Damoi sejahtera-Ku Uku melei ngen udi, jano de Uku melei coa awei de nelei kunei dunio ngen udi. Jibeakba liseak ngen saben atei nu.

²⁸Udi bi temi'uk bahwo Uku bi madeak ngen udi: ‘Uku lalau, tapi Uku teko igai ngen udi.’ Sekirone udi mengasiak Uku, udi bakea riang kerno Uku lalau ngen Bapa-Ku, sebab Bapa lebiak lai kunei Uku.

²⁹Uyo kulo Uku madeakne ngen udi ayok hal o tejijai, supayo udi pecayo, amen hal o tejijai.

³⁰Coa dau igai Uku madeak ngen udi, sebab penguaso dunio yo teko, si coa kuaso didik kulo das dirai-Ku.

³¹Tapi dunio arus namen bahwo Uku mengasiak Bapa ngen bahwo Uku kemerjo kutene awei de neriteak Bapa ngen Uku. Klongonba, maroba ite lalau kunei piyo.”