Read Rejang YOHANES 15 Bible Online

YOHANES 15 - Rejang bible

YOHANES 15

¹“Ukuba pokok anggur de benea ngen Bapa-Ku ba temuanne.

²Tiep dan pado-Ku de coa bebuak, tentok-Ne ngen tiep dan de bebuak, nersi-Ne, supayo si lebiak dau buakne.

³Udi memang bi bersih kerno firman de sudo Uku madeak ngen udi.

⁴Tinggea ba neak lem Uku ngen Uku neak lem udi. Serai awei dan coa dapet bebuak kunei diraine suang, amen si coa tinggea neak punne. Awei o kulo udi, udi coa bebuak, amen udi coa tinggea lem Uku.

⁵Ukuba pun anggur ngen ko ba dan-danne. Api bae de tinggea lem Uku ngen Uku lem si, si bebuak dau, sebab neak luea Uku udi coa dapet menea jejano.

⁶Api de coa tinggea lem Uku, si nuang moi luea awei dan jijai ke'ing, sesudo'o tun melunggukne nuang moi lem opoi lajau nembem.

⁷Amen udi tinggea lem Uku ngen firman-Ku tinggea lem udi, minoi ba ngen Bapa jano bae de udi kenlok, ngen udi bakea temimone.

⁸Lem hal yo ba Bapa-Ku nujai, adeba amen udi bebuak dau ngen awei'o udi adeba penotoa-penotoa-Ku.”

⁹“Awei Bapa bi mengasiak Uku, awei o kulo uku bi mengasiak udi; tinggea ba udi lem kasiak-Ku o.

¹⁰Amen udi temotoa periteak-Ku, udi bakea tinggea neak lem kasiak-Ku, awei Uku temotoa periteak Bapa-Ku ngen tinggea neak lem kasiak-Ne.

¹¹Kutene o Uku nadeak ngen udi, supayo suko cito-Ku ade neak lem udi ngen suko cito-Nu jijai penuak.

¹² Dioba periteak-Ku, adeba supayo udi saling mengasiak, awei Uku bi mengasiak udi.

¹³Kasiak de lebiak lai adeba kasiak kunei suang tun de melei nyabaine utuk kuatne.

¹⁴Udi adeba kuat-Ku, amen udi menea jano de Uku periteak ngen udi.

¹⁵Uku coa madeak udi igai pelayan, sebab pelayan coa namen jano de nea tuanne, tapi Uku madeak udi kuat, kerno Uku bi melei namen ngen udi kute de sudo Uku temi'uk kunei Bapa-Ku.

¹⁶Iso udi de miliak Uku, tapi Uku ba de miliak udi, Uku bi temtep udi, supayo udi lalau ngen asea buak de dau, supayo jano de udi minoi ngen Bapa lem gen-Ku neleine ngen udi.

¹⁷Dioba periteak-Ku ngen udi: Kasiak ba suang do ngen de luyen.”

¹⁸“Amen dunio jengik ngen udi, ingetba bahwo si bi lebiak denno jengik Uku kunei pado ko.

¹⁹Sekirone udi kunei dunio, pasetba dunio mengasiak udi awei milikne. Tapi kerno udi iso kunei dunio, tapi Uku bi miliak udi kunei dunio, sebab do'oba dunio jengik ngen udi.

²⁰ Tinget ba jano de sudo Uku madeak ngen udi: ‘Suang pelayan coa ba lebiak lekat kunei tuanne.’ Amen tobo'o bi temotoa firman-Ku, tobo'o kulo bakea temotoa keceknu.

²¹Tapi kutene o bakea tobo'o menea te'adep udi kerno gen-Ku, sebab tobo'o coa namen Si desudo mutus Uku.

²²Sekirone Uku coa teko ngen coa madeak ngen tobo'o, tobo'o paset coa beduso. Tapi uyo tobo'o coa temuan alasan utuk duso tobo'o!

²³Api bae de jengik ngen Uku, si jengik kulo ngen Bapa-Ku

²⁴Sekirone Uku coa menea neak tengeak-tengeak tobo'o kerjo-kerjo de coa perneak nea tun luyen, tobo'o paset coa beduso. Tapi uyo kunyau tobo'o bi kemliak kutene o, tobo'o jengik ngen Uku kulo ngen Bapa-Ku.

²⁵ Tapi firman de tetulis lem ukum agamo Yahudi tobo'o arus tejijai: ‘Tobo'o jengik ngen Uku ngen coa ade alasan.’

²⁶Uku bakea mutus ngenko penulung de asalne kunei Bapa. Adeba Roh bakea madeak kebenea tetang Allah. Amen Si teko, Si bakea saksai tetang Uku.

²⁷Tapi udi kulo arus saksai, kerno udi kunei dutene sesamo ngen Uku.