Read Rejang YOHANES 16 Bible Online

YOHANES 16 - Rejang bible

YOHANES 16

¹Kutene yo Uku madeak ngen udi, supayo udi jibeak coa temimo Uku.

²Udi bakea kenucea, bakea teko waktaune bahwo tiep tun de munuak udi bakea sako bahwo si males jaso ngen Allah.

³Tobo'o bakea menea awei yo, kerno tobo'o coa namen baik Bapa kulo Uku.

⁴Tapi kutene yo Uku madeak ngen udi supayo amen sapei waktaune udi tinget bahwo Uku bi madeakne ngen udi.” “Hal yo coa Uku madeak ngen udi kunei bel'o, kerno seke'an yo Uku masiak sesamo ngen udi.

⁵Tapi uyo Uku lalau ngen Si de sudo mutus Uku, coa ade suang kulo neak antaro udi de betanye ngen-Ku: Moi ipe Ko lalau?

⁶Tapi kerno Uku madeak hal o ngen udi mako ateinu ibo.

⁷Tapi benea de Uku madeak yo ngen udi: Lebiak beguno utuk udi, amen Uku lalau. Sebab amen Uku coa lalau, penulung o coa bakea teko ngen udi, tapi amen Uku lalau, Uku bakea mutus Si ngen ko.

⁸Amen Si teko, Si bakea menea tun insaf kunei duso, kebenea ngen kunei ukuman Allah.

⁹Penulung'o bakea madeak bahwo coa pecayo ngen-Ku adeba duso;

¹⁰bahwo Uku benea, kerno Uku lalau ngen Bapa ngen udi coa bakea kemliak Uku igai;

¹¹bahwo Allah sudo muloi mukum, sebab penguaso dunio yo bi nukum.

¹²Masiak dau hal de arus Uku madeak ngen udi, tapi uyo udi ati dapet temimone.

¹³Tapi amen Si teko, adeba Roh kebenea, Si bakea mipin udi neak lem kute kebenea. Si coa bakea madeak kunei dirai-Ne suang, tapi kute sesuaktau de teni'ukne do'oba de bakea nadeak-Ne ngen Si bakea melei namen ngen udi hal-hal de bakea teko.

¹⁴Si bakea mulio Uku, sebab Si bakea melei namen ngen udi jano de tenimone kunei Uku.

¹⁵Kute sesuaktau de Bapa temuan adeba Uku temuan. Do'o sebabne Uku madeak; Si bakea melei namen ngen udi jano de tenimo-Ne kunei-Ku.”

¹⁶“Tegoa igai, udi coa kemliak Uku igai ngen kulo tegoa igai, udi bakea kemliak Uku.”

¹⁷Temi'uk o kekedau kunei penotoa-penotoa-Ne madeak suang ngen de luyen, “Jano taine Si madeak ngen ite: ‘Tegoa igai, udi coa kemliak Uku ngen kulo tegoa igai, udi bakea kemliak Uku’? Ngen: ‘Uku lalau ngen Bapa’?”

¹⁸Lajau padeak tobo'o, “Jano taine Si madeak: ‘Tegoa igai’? Ite coa namen jano maksud-Ne!”

¹⁹Yesus namen bahwo tobo'o lok betanye sesuaktau ngen Si, lajau Si madeak ngen tobo'o, “Nano Uku madeak, ‘Tinggea tegoa igai bae udi coa kemliak Uku, ngen kulo tinggea tegoa igai udi bakea kemliak Uku.’ Do'oba de udi madeak?

²⁰Sesungguakne Uku madeak ngen udi: Udi bakea ngindoi ngen ngibo, tapi dunio bakea riang; udi bakea ibo, tapi ibonu bakea bubeak jijai riang.

²¹Amen Suang selawei ibo pado waktau si melaher, tapi sesudo'o si melaher anokne, si coa tinget igai ngen deritone, kerno keriang bahwo suang manusio bi laher neak dunio.

²²Awei'o kulo udi uyo payeak atei, tapi Uku bakea kemliak udi igai ngen ateinu bakea riang, coa ade suang kulo de dapet mbut keriang nu'o kunei udi.

²³Pado bilai o udi coa bakea temanye jejano ngen Uku. Sesungguakne Uku madeak ngen udi: Kute sesuaktau de udi minoi ngen Bapa lem gen-Ku bakea nelei-Ne.

²⁴Sapei uyo udi ati minoi sesuaktau lem gen-Ku. Minoiba, mako udi bakea temimo, supayo penuakba sukocitonu.”

²⁵“Kutene yo Uku madeak ngen udi ngen kiasan. Bakea sapei waktaune Uku coa igai madeak ngen udi ngen kiasan, tapi te'us te'ang melei namen tetang Bapa.

²⁶Pado bilai o udi bakea bedu'o lem gen-Ku. Uku coa bakea minoi kunei Bapa utuk udi,

²⁷sebab Bapa suang mengasiak udi, kerno udi bi mengasiak Uku ngen pecayo bahwo Uku teko kunei Allah.

²⁸Uku teko kunei Bapa ngen Uku teko moi lem dunio. Uku teminggea dunio kulo ngen lalau ngen Bapa.”

²⁹Nadeak penotoa-penotoa-Ne, “Keliak, uyo Ko te'us te'ang madeak ngen ko coa makei kiasan.

³⁰Uyo keme namen, bahwo Ko namen kute sesuaktau. Ngen coa perlu tun betanye ngen udi. Kerno o keme pecayo bahwo Ko teko kunei Allah.”

³¹Jawab Yesus ngen tobo'o, “Pecayo udi uyo?

³²Keliak, waktaune bakea teko, bahkan bi teko, ketiko udi bakea cen'ei sesuang neak penanne suang ngen udi teminggea Uku suang dirai. Tapi Uku coa suang dirai sebab Bapa semerto Uku.

³³Kutene o Uku madeak ngen udi, supayo udi dapet damoi sejahtera lem Uku. Neak dunio udi bakea saro. Tapi kenuetba ateinu! Uku bi maleak dunio!”