Read Rejang YOHANES 17 Bible Online

YOHANES 17 - Rejang bible

YOHANES 17

¹Sesudo Awei yo, Yesus nanggeak moi lenget ngen madeak, “Bapa, bi sapei waktau ne; de mulio ba Anok-Nu, supayo Anok-Nu de mulio Ko.

²Serai awei Ko bi melei ngen Si kuaso das kute de idup, awei yo kulo Si bakea melei idup de kekal ngen kute de sudo Ko melei ngen Si.

³Dioba idup de kekal, adeba bahwo tobo'o kemnal Bapa, dedone Allah de benea, ngen kemnal Yesus Kristus de sudo nutus Bapa.

⁴Uku bi mulio Ko neak bumai ngen semlesei kerjo de Ko melei ngen-Ku utuk uku meneane.

⁵Uyo, au Bapa, mulio ba Uku neak hadirat-Nu suang ngen kemulioan de Uku temuan neak hadirat-Nu ayok dunio ade.

⁶Uku bi kemnal Bapa ngen kute tun de Ko melei ngen-Ku kunei dunio. Tobo'o adeba Bapa temuan. Bapa bi melei tobo'o ngen-Ku ngen tobo'o bi temotoa firman-Nu.

⁷Uyo tobo'o namen bahwo kute de Ko melei ngen-Ku o berasal kunei Bapa.

⁸Sebab kute firman de Ko semapei ngen Uku bi Uku semapei, ngen tobo'o bi temimo-Ne. Tobo'o bebenea namen bahwo Uku teko kunei Ko ngen tobo'o pecayo bahwo Ko ba de sudo mutus Uku.

⁹Uku bedu'o utuk tobo'o. Iso utuk dunio Uku bedu'o, tapi utuk tobo'o, de sudo Ko melei ngen-Ku, sebab tobo'o adeba Ko temuan.

¹⁰Kute Uku temuan adeba Bapa temuan ngen Ko temuan adeba Uku temuan, ngen Uku bi de mulio neak lem tobo'o.

¹¹Uku coa ade igai neak lem dunio, tapi tobo'o masiak ade neak lem dunio, Uku teko ngen Ko. Au Bapa de sucai, jagoba tobo'o lem gen-Nu, adeba gen-Nu de sudo Ko melei ngen-Ku, supayo tobo'o jijai do serai awei ite.

¹² Sekean Uku sesamo tobo'o, Uku miaro tobo'o lem gen-Nu de sudo Ko melei ngen-Ku; Uku jemago tobo'o ngen coa ade suang kulo kunei tobo'o de nyep seluyen si desudo se'arusne nyep, supayo tejijaiba de tenulis lem Kiteb Sucai.

¹³Tapi uyo Uku teko ngen Ko ngen Uku madeak kutene yo sementaro Uku masiak ade neak lem dunio, supayo penuak ba suko cito-Ku neak lem dirai tobo'o.

¹⁴Uku bi melei firman-Nu ngen tobo'o ngen dunio jengik ngen tobo'o, kerno tobo'o iso kunei dunio, serai awei Uku iso kunei dunio.

¹⁵Uku coa minoi, supayo Ko mok tobo'o kunei dunio, tapi supayo Ko jemago tobo'o kunei de kidek.

¹⁶Tobo'o iso kunei dunio, serai awei Uku iso kunei dunio.

¹⁷Senucai ba tobo'o lem kebenea; firman-Nu o ba kebenea.

¹⁸Serai awei Bapa bi mutus Uku moi lem dunio, awei'o kulo Uku bi mutus tobo'o moi lem dunio.

¹⁹Ngen Uku semucai dirai-Ku utuk tobo'o, supayo tobo'o kulo senucai lem kebenea.

²⁰Iso utuk tobo'o bae Uku badu'o, tapi kulo utuk tun-tun de pecayo ngen-Ku liwet saksai tobo'o.

²¹Supayo tobo'o kute jijai do, serai awei Ko, au Bapa, neak lem ite, supayo dunio pecayo bahwo Ko ba de sudo mutus Uku.

²²Uku bi melei ngen tobo'o kemulio de Ko melei ngen-Ku, supayo tobo'o jijai do, serai awei Ite adeba do.

²³Uku neak lem tobo'o ngen Ko neak lem Uku supayo tobo'o bebenea jijai do, supayo dunio namen bahwo Ko de mutus Uku ngen Ko mengasiak tobo'o, serai awei Ko mengasiak Uku.

²⁴Au Bapa, Uku lok supayo, neak ipe bae Uku ade, tobo'o kulo ade sesamo ngen Uku, tobo'o de sudo Ko melei ngen-Ku, supayo tobo'o kemliak kemulio-Ku de sudo Ko melei ngen-Ku, sebab Ko bi mengasiak Uku ayok dunio jenijai.

²⁵Au Bapa de adea, memang dunio coa kemnal Ko, tapi Uku kemnal Ko, tobo'o namen bahwo Ko ba de sudo mutus Uku.

²⁶Uku bi melei namen ngen Ko, tobo'o ngen Uku bakea melei namenne, supayo kasiak de Ko melei ngen Uku ade neak lem tobo'o ngen Uku neak lem tobo'o.”