Read Rejang YOHANES 20 Bible Online

YOHANES 20 - Rejang bible

YOHANES 20

¹Pado bilai dedute minggau o, kekabuk nien waktau bilai masiak kelem, lalauba Maria Magdalena moi kubua. Si kemliak bahwo butau penutupne bi kesia kunei lubang kubua.

²Si melilai magea Simon Petrus ngen penotoa de luyen, de kenasiak Yesus. Maria madeak ngen tobo'o, “Tuhan bi nemok tun kunei kubuane ngen keme coa namen neak ipe Si nepek.”

³Lajau berakatba Petrus ngen penotoa de luyen o moi kubua.

⁴Keduaine melilai sesamo, tapi penotoa de luyen o melilai lebiak gacang kunei Petrus sehinggo lebiak dute sapei neak kubua.

⁵Si cungok moi lem, ngen kemliak kain kefan ade neak pitok, tapi si coa masuk.

⁶Sesudo'o tekoba Simon Petrus kulo semsung si ngen masuk moi lem kubua o. Si kemliak kain kefan ade neak pitok,

⁷gidong kain kaci de nanone ade neak ulau Yesus coa ade pa'ok kain kefan'o, tapi telipet dewek neak penan de luyen.

⁸Sesudo'o, masukba kulo penotoa de luyen, de lebiak dute sapei neak kubua o ngen si kemliakne ngen pecayo. (

⁹Sebab seke'an o tobo'o ati ngertai isai Kiteb Sucai de madeak, bahwo Si arus idup igai kunei antaro tun matei.)

¹⁰Lajau belekba penotoa-penotoa'o moi umeak.

¹¹Tapi Maria je neak luea kubua o ngen ngindoi. Samo ngindoi si cemungok moi lem kubua o,

¹²ngen ketenba ngen si duai malaikat makei keracok putiak. De do temot neak depeak ulau ngen de luyen neak depeak kekea neak penan mayit Yesus tegulek.

¹³Nadeak malaikat-malaikat o ngen si, “Indok, getai ko ngindoi?” Jawab Maria ngen tobo'o, “Tuhanku bi mok tun ngen uku coa namen neak ipe Si nepekne.”

¹⁴Sesudo madeak awei o si kemliak moi belakang ngen kemliak Yesus je neak di. Tapi si coa namen bahwo do'o adeba Yesus.

¹⁵Nadeak Yesus ngen si, “Indok, getai ko ngindoi? Api de ko mesoa?” Maria sako tun o penjago taman, lajau madeak ngen-Si, “Tuan, amen tuan de mok Si, nadeakba ngen uku, neak ipe tuan mpek-Ne, supayo uku dapet mok-Ne.”

¹⁶Nadeak Yesus ngen si, “Maria!” Maria jemling ngen madeak ngen-Si lem bahaso Ibrani, “Rabuni!” (Taine “Gu'au”.)

¹⁷Nadeak Yesus ngen si, “Jibeakba ko megong Uku, sebab Uku ati kenek ngen Bapa. Tapi lalauba ngen pasuak-pasuak-Ku ngen nadeakba ngen tobo'o bahwo uyo Uku bakea lalau ngen Bapa-Ku ngen Bapa-Nu, Allah-Ku ngen Allahnu.”

¹⁸Maria Magdalena lalau ngen madeak ngen penotoa-penotoa, “Uku bi kemliak Tuhan!” Ngen kulo bahwo Si de madeak hal-hal o ngen si.

¹⁹Waktau bilai bi kelemen pado bilai pertamo minggau o kopoaba penotoa-penotoa Yesus neak do penan ngen bang-bang de tekucai kerno tobo'o saben ngen tobo penguaso Yahudi. Pado waktau o tekoba Yesus ngen je neak tengeak-tengeak tobo'o ngen madeak, “Damoi sejahtera utuk udi!”

²⁰Sesudo madeak awei o, Si kemten tangen-Ne ngen lambung-Ne ngen tobo'o. Penotoa-penotoa o riang waktau tobo'o kemliak Tuhan.

²¹ Lajau nadeak Yesus debat igai, “Damoi sejahtera utuk udi! Serai awei Bapa mutus Uku, awei o kulo uyo Uku mutus ko.”

²²Sesudo madeak awei o, Si kembus tobo'o ngen madeak, “Temimoba Roh Sucai.

²³ Amen udi mapun duso tun, dusone napun, amen udi madeak duso tun ade, dusone tep ade.”

²⁴Tapi Tomas, saleak suang keduai belas penotoa o, de senbut Didimus, coa ade sesamo tobo'o, ketiko Yesus teko neak di.

²⁵Jijai, nadeak penotoa-penotoa de luyen o ngen si, “Keme bi kemliak Tuhan!” Tapi tomas madeak ngen tobo'o, “Ayok uku kemliak kes pasok pado tangen-Ne ngen ayok uku mpek ji'aiku moi lem kes pasok o ngen mpek tangenku moi lambung-Ne, debat bae uku coa pecayo.”

²⁶Lapen bilai sesudo'o penotoa-penotoa Yesus ade igai lem umeak o ngen Tomas sesamo ngen tobo'o. Sementaro bang-bang tekucai, Yesus teko ngen je neak tengeak-tengeak tobo'o ngen madeak, “Damoi sejahtera utuk udi!”

²⁷Sesudo'o Si madeak ngen tomas, “Kemliakba ji'ainu neak yo ngen kemliakba tangen-Ku, muluaba tangennu ngen mpekba moi lambung-Ku ngen jibeak ko coa pecayo igai, tapi pecayoba!”

²⁸Tomas jemawab Si, “Au Tuhanku ngen Allahku!”

²⁹Nadeak Yesus ngen si, “Kerno ko bi kemliak Uku, mako ko pecayo. Bahagiaba tobo'o de coa kemliak, tapi pecayo!”

³⁰Memang masiak dau tando mujizat luyen de nea Yesus neak adep matai penotoa-penotoa-Ne, de coa cenatet lem kiteb yo.

³¹Tapi hal-hal yo bi cenatet, supayo udi pecayo bahwo Yesusba Rajo Penyelamat, Anok Allah, ngen supayo kerno pecayo, udi dapet idup lem gen-Ne.