Read Rejang YOHANES 21 Bible Online

YOHANES 21 - Rejang bible

YOHANES 21

¹Sesudo'o Yesus kemten dirai igai ngen penotoa-penotoa-Ne neak patoi Daneu Tiberias ngen Si kemten dirai awei berikut.

²Neak patoi o kopoa Simon Petrus, Tomas de senbut Didimus, Natanael kunei Kana de neak Galilea, anok-anok Zebedeus ngen duai tun penotoa-Ne de luyen.

³ Nadeak Simon Petrus ngen tobo'o, “Uku lalau temakep kan.” Nadeak tobo'o ngen si, “Keme lalau kulo ngen ko.” Tobo'o berakat lajau kenek moi biduk, tapi kelmen o tobo'o coa temakep jejano.

⁴Ketiko bilai muloi pueng, Yesus je neak patoi, tapi penotoa-penotoa o coa namen bahwo do'o adeba Yesus.

⁵Nadeak Yesus ngen tobo'o, “Hoi anok-anok, jano udi temuan kan?” Jawab tobo'o, “Coa.”

⁶ Lajau nadeak Yesus ngen tobo'o, “Mambuaba jalainu neak depeak kanen biduk, mako udi bakea dapet kan.” Tobo'o kulo mambua jalai o ngen tobo'o coa dapet temarikne igai kerno daune kan.

⁷Lajau penotoa de kemasiak Yesus o madeak ngen Petrus, “Do'o Tuhan.” Ketiko Petrus temi'uk bahwo do'o adeba Tuhan, mako si makei keracokne, sebab si coa makei bajau, lajau tejun moi lem daneu.

⁸Sesudo'o penotoa-penotoa de luyen teko kak biduk kerno tobo'o coa uak kunei da'et, cuma kekiro sotos meter bae ngen tobo'o temarik jalai de penuak kan o.

⁹Waktau tobo'o sapei neak da'et, tobo'o kemliak opoi aang neak dasne ade kan ngen ruti.

¹⁰Nadeak Yesus ngen tobo'o, “Mbin ba kekedau kan de tembei bae udi makep o!”

¹¹Simon Petrus kenek moi biduk lajau temarik jalai o moi da'et, penuak kan-kan lai: sotos lemo puluak telau likup dau ne, kunyau kedau o, jalai o coa ca'ik.

¹²Nadeak Yesus ngen tobo'o, “Maroba ngen sarapanba.” Coa ade neak antaro penotoa-penotoa o de binai betanye ngen-Ne, “Api Ko?” Sebab tobo'o namen bahwo Si adeba Tuhan.

¹³Yesus maju moi muko, mok ruti ngen meleine ngen tobo'o, kan o kulo.

¹⁴Do'oba ketelau kilaine Yesus kemten dirai ngen penotoa-penotoa-Ne sesudo Si idup igai kunei antaro tun matei.

¹⁵Sesudo sarapan Yesus madeak ngen Simon Petrus, “Simon, anok Yona, jano ko mengasiak Uku lebiak kunei tobo'o mengasiak Uku?” Jawab Petrus ngen si, “Benea Tuhan, ‘Ko namen bahwo uku mengasiak Ko.’ ” Nadeak Yesus ngen si, “Gembalaba bebirai-Ku.”

¹⁶Nadeak Yesus igai ngen si utuk keduai kilaine, “Simon, anok Yona, jano ko mengasiak Uku?” Jawab Petrus ngen Si, “Benea Tuhan, Ko namen, bahwo uku mengasiak Ko.” Nadeak Yesus ngenne, “Gembalaba bebirai-Ku.”

¹⁷Nadeak Yesus ngen si utuk ketelau kilaine, “Simon, anok Yona, jano Ko mengasiak Uku?” Petrus kulo meding ibo kerno Yesus madeak utuk ketelau kilaine, “Jano ko mengasiak Uku?” Ngen si madeak ngen-Ne, “Tuhan, Ko namen kute sesuaktau. Ko namen, bahwo uku mengasiak Ko.” Nadeak Yesus ngen si, “Meliaroba bebirai-Ku.

¹⁸Sesungguakne Uku madeak ngen udi: Waktau ko masiak uai ko meket pinggangnu suang ngen paneu moi ipe bae ko kenlok, tapi amen ko bi tuai, ko bakea mulua tangennu ngen tun luyen bakea meket ko ngen mbin ko moi penan de coa ko kenlok.”

¹⁹(Hal yo de nadeak Yesus utuk madeak awei ipe Petrus bakea matei be utuk mulio Allah.) Sesudo madeak awei o Yesus madeak ngen Petrus, “Milauba Uku.”

²⁰ Waktau Petrus jemling, si kemliak bahwo penotoa de kenasiak Yesus gidong temotoa, adeba penotoa de pado waktau tobo'o gidong mukmei serpok temot pa'ok Yesus ngen de madeak, “Tuhan, api si de bakea semreak Ko?”

²¹Ketiko Petrus kemliak penotoa'o, si madeak ngen Yesus, “Tuhan, awei ipe ngen si yo?”

²²Jawab Yesus, “Amen Uku kemlok, supayo si tinggea idup sapei Uku teko, do'o iso urusannu. Tapi ko: Milauba Uku!”

²³Lajau tesebeaba bito neak antaro pasuak-pasuak o bahwo penotoa o coa bakea matei. Tapi Yesus coa madeak ngen Petrus bahwo penotoa o coa bakea matei, tapi, “Amen Uku kemlok supayo si tinggea idup sapei Uku teko, do'o iso urusannu.”

²⁴Siba penotoa de saksai tetang kutene yo ngen de sudo tenulisne ngen ite namen, bahwo saksaine o benea.

²⁵Masiak dau igai hal-hal luyen de nea ngen Yesus. Tapi amen kutene o arus tenulis dedo, Uku peker dunio yo coa dapet muet kute kiteb de arus tenulis o.