Read Rejang YOHANES 3 Bible Online

YOHANES 3 - Rejang bible

YOHANES 3

¹Ade suang tun Farisi gen-Ne Nikodemus, suang pemipin agamo Yahudi.

²Si teko pado waktau kelemen ngen Yesus ngen madea, “Rabi, keme namen, bahwo Ko teko sebagoi gu'au de nutus Allah; sebab coa ade suang tun de dapet menea mujizat-mujizat de Ko nea'o, amen Allah coa semertonu.”

³Yesus jemawab, “Sesungguakne Uku madeak ngen udi amen suang tun coa laher igai, si coa dapet jijai anggota umat Allah.”

⁴Nadeak nikodemus, “Awei ipe mukin suang tun laher, amen si bi tuai? Jano dapet si masuk igai moi lem rahim indokne ngen laher igai?”

⁵Jawab Yesus, “Sesungguakne Uku madeak ngen ko: amen suang tun coa laher kunei bioa ngen Roh, si coa dapet jijai anggota umat Allah.

⁶Jano de laher seca'o jasmani sifetne jasmani, ngen jano de laher kunei Roh, sifetne rohani.

⁷Jibeakba ko heran, kerno Uku madeak ngen ko, ‘Ko harus laher igai.’

⁸Ibut bertiup moi ipe si lok, ngen ko temi'uk saeine. Tapi ite coa namen kunei ipe si teko ataumoi ipe si lalau. Awei'oba halne ngen tiep-tiep tun de laher kunei Roh Allah.”

⁹Nikodemus madeak ngen-Si, “Awei ipe mukin hal'o tejijai?”

¹⁰Jawab Yesus, “Ko gu'au tun Israel, maso ko coa ngertai hal-hal'o?

¹¹Sesungguakne Uku madeak ngen udi, keme miling tetang jano de keme namen ngen be saksai tetang jano de keme kemliak, tapi udi coa temimo saksai keme.

¹²Udi coa pecayo, waktau Uku miling ngen udi tetang hal-hal duniawi, awei ipe udi bakea pecayo, amen Uku miling ngen udi tetang hal-hal sorgawi?

¹³Coa ade suang tun de sudo kenek moi surgo seluyen Si de sudo tu'un kunei surgo, adeba Anok Manusia.

¹⁴ Serai awei Musa kemnek dung tembaga pado de pun kiyeu neak benei libea, awei yo kulo Anok Manusio harus nelkat,

¹⁵supayo tiep tun de pecayo ngen Si coa benaso, meluyen dapet idup de kekal.”

¹⁶Kerno kembiak lai kasiak Allah bakea dunio yo, sehinggo Si bi melei karunio Anok-Ne de tunggea, supayo tiep tun de pecayo ngen-Si coa benaso, tapi dapet idup de kekal.

¹⁷Sebab Allah mutus Anok-Ne moi lem dunio iso utuk makim dunio, tapi utuk semlamatne.

¹⁸Api bae de pecayo ngen-Si, si coa bakea nukum. Api bae de coa pecayo, si bi ade neak hukuman, sebab si coa pecayo ngen Anok Tunggea Allah.

¹⁹Dioba hukuman'o: Te'ang bi teko lem dunio, tapi manusio lebiak galok kelem kunei pado te'ang, sebab plep tobo'o kidek.

²⁰Sebab api bae de menea kidek, jengik te'ang ngen coa teko ngen te'ang'o, kunyau plepne de kidek'o coa keten.

²¹Tapi api bae de menea de baik, Si teko ngen te'ang, kunyau jijai nyato bahwo plepne sesuoi ngen Allah.

²²Sesudo'o Yesus lalau ngen penotoa-penotoa-Ne moi taneak Yudea ngen Si tinggea neak di besamo-samo tobo'o ngen membaptis.

²³Tapi Yohanes kulo membaptis, kulo neak Ainon pa'ok Salim, sebab neak di dau bioa. Ngen tun-tun teko neak di utuk di baptis.

²⁴ Sebab pado waktau'o Yohanes ati nasuk moi lem panjara.

²⁵Lajau timboa ba selisiak neak antaro penotoa-penotoa Yohanes ngen suang tun Yahudi tetang upacara semucai dirai.

²⁶Lajau tobo'o teko ngen Yohanes ngen madeak, “Rabi, tun de besamo-samo ngen Ko neak dipoa Bioa Yordan, uyo gidong membaptis. Ko kulo melei saksai tetang tun'o. Uyo kute tun teko ngen-Si.”

²⁷Jawab Yohanes, “Coa ade suang tun de dapet mok sesuatau bagiak dirai ne, amen coa nlei karunia ngen si kunei surgo.

²⁸ Udi suang dapet saksai, bahwo Uku bi madeak, ‘Uku iso Rajo Penyelamat, tapi Uku nutus utuk demute-Ne.’

²⁹De temuan ngenyan selawei, adeba maten semanei; tapi kuat maten semanei, de je neak pa'ok Si ngen de temi'ukne, kembiak riang temi'uk suaro maten semanei'o. Do'oba keriang ku, ngen uyo keriang ku'o penuak.

³⁰Si harus tambeak lai, tapi uku harus tambeak titik.”

³¹Api de teko kunei das adeba neak das kutene; api de asalne kunei bumai, adeba kunei bumai ngen miling tetang hal-hal neak bumai. Api de teko kunei surgo adeba neak das kutene.

³²Si saksai tetang jano de kemliak-Ne ngen de temi'uk-Ne, tapi coa suang tun de temimo saksai-Ne o.

³³Api de mimo saksai-Ne o, si ngakau bahwo Allah adeba benea.

³⁴Sebab api de nutus Allah, Siba de senapei Firman Allah, kerno Allah melei karunio Roh-Ne ngen ade batas.

³⁵ Bapa kemasiak anok ngen bi semereak kute sesuatau ngen Si.

³⁶Api bae de pecayo ngen Anok, si dapet idup de kekal. Tapi api bae de coa taat ngen Anok si coa bakea kemliak idup, meluyen murko Allah tep tinggea neak dasne.