Read Rejang YOHANES 4 Bible Online

YOHANES 4 - Rejang bible

YOHANES 4

¹Yesus namen, bahwo tun-tun Farisi bi temi'uk, bahwo Si membaptis lebiak dau panotoa kunei pado Yohanes. (

²Kunyau Yesus suang coa membaptis, meluyen penotoa-penotoa-Ne.)

³Si kulo teminggea Yudea ngen belek igai moi Galilea.

⁵Lajau sapei ba Si neak do kota Samaria, genne Sikhar pa'ok taneak de nelei Yakub bel'o ngen anok ne, Yusuf.

⁶Neak di ade sumua Yakub. Yesus kembiak litok kerno pemaneu, sebab'o Si temot neak biding sumua'o. Bilai kiro-kiro jam duai belas kebilai.

⁷Lajau teko suang selawei Samaria lok nimbo bioa. Nadeak Yesus ngen si, “Keleiba Uku menem!”

⁸Sebab penotoa-penotoa-Ne bi lalau moi kota mukua kembuk.

⁹ Nadeak selawei Samaria o ngen Si, “Maso ko, suang tun Yahudi, minoi bioa ngenku, suang tun Samaria?” (Sebab tun Yahudi coa bekuat ngen tun Samaria.)

¹⁰Jawab Yesus ngen si, “Amen ko namen tetang karunio Allah ngen api Si de madeak ngen ko, ‘Melei ba Uku menem!’ Paset ko bi minoi ngen-Si ngen Si bi melei ngen ko bioa idup.”

¹¹Nadeak selawei'o ngen Si, “Tuan, Ko coa temuan timbo ngen sumua yo kembiak lem; kunei ipe Ko dapet bioa idup'o?

¹²Jano Ko lebiak lai kunei bapok leluhur keme Yakub, de melei sumua yo ngen keme ngen de sudo menem suang kunei lemne, si beserto anok-anokne ngen ternok ne?”

¹³Jawab Yesus, “Api bae de menem bioa yo, si bakea haus igai,

¹⁴Tapi api bae de menem bioa de bakea Uku melei, si coa bakea haus utuk seke'anne. Sebelekne bioa de bakea Uku melei, bakea jijai matai bioa neak lem dirai ne, de terus bae kemluea bioa sapei pado idup de kekal.”

¹⁵Nadeak selawei'o, “Tuan, neleiba uku bioa'o, supayo uku coa haus ngen coa teko igai miyo utuk tenimbo bioa.”

¹⁶Nadeak Yesus, “Lalauba, menok ba sematennu ngen teko miyo.”

¹⁷Nadeak selawei'o, “uku coa temuan sematen.” Madeak Yesus, “Tepat nadeaknu, bahwo ko coa temuan sematen.

¹⁸Sebab ko bi temuan lemo sematen ngen de ade uyo ngenko, isoba sematenko. Lem hal yo ko bi madeak benea.”

¹⁹Nadeak selawei'o, “Tuan, nyato uyo ngen uku, bahwo Ko suang nebai.

²⁰Ninik puyang keme sembeak neak das tebo yo, tapi ko madeak bahwo, Yerusalemba penan tun nyembeak.”

²¹Nadeak Yesus, “Pecayoba ngen Uku, hoi indok, saatne bakea sapei, bahwo udi bakea nyembeak Bapa iso neak tebo yo ngen iso kulo neak Yerusalem.

²²Udi nyembeak jano de coa udi namen, keme nyembeak jano de keme namen, sebab keselamatan teko kunei bangso Yahudi.

²³Tapi saatne bakea teko ngen sudo sapei uyo, bahwo penyembeak-penyembeak benea; bakea menyembeak Bapa lem Roh ngen de benea; sebab Bapa mesoa tun-tun de nyembeak Si seca'o awei yo.

²⁴Allah'o Roh ngen api bae de nyembeak Si, harus nyembeak lem Roh ngen de benea.”

²⁵Jawab selawei'o, “Uku namen, bahwo Rajo Penyelamat de senbut kulo Kristus, bakea teko. Amen Si teko, Si bakea meriteak kute sesuatau ngen keme.”

²⁶Nadeak Yesus, “Ukuba Si, de gidong miling ngen ko.”

²⁷Pado waktau'o teko penotoa-penotoa-Ne ngen tobo'o indeak, bahwo Si dong miling ngen suang selawei, tapi coa suang tun de betanye, “Jano de ko madeak ngen Si?”

²⁸Selawei'o teminggea emberne neak di lajau lalau moi kota ngen cemrito ngen tun-tun neak di,

²⁹“Maro, Keliakba tun de madeak ngen uku kute sesuatu de sudo uku menea. Mukin Si'o Kristus?”

³⁰Mako tun-tun'o lalau moi luea kota lajau teko ngen Yesus.

³¹Sementaro penotoa-penotoa-Ne majok Si, nadeakne, “Rabi, mbukba!”

³²Tapi, Si madeak ngen tobo'o, “Ngen Uku ade kembuk de coa ko namen.”

³³Kerno'o penotoa-penotoa'o madeak do ngen de luyenne, “Jano ade tun de ngembin sesuatau ngen Si utuk nembuk?”

³⁴Nadeak Yesus ngen tobo'o, “Kembuk-Ku adeba menea kelokne de mutus Uku ngen semelesei kerjo-Ne.

³⁵Udi madeak, ‘Pat bulen igai sapei ba musim panen.’ Tapi Uku madeak ngen udi, ‘Keliak ba sekelilingnu ngen denong ba kebun-kebun de sudo nguning ngen mesok utuk panen.’

³⁶Uyo kulo tukang panen bi temimo upeakne ngen si melungguk buak utuk idup de kekal, sehinggo tukang tanem ngen tukang panen samo-samo riang.

³⁷Beneaba pribahasa yo, ‘De do temanem ngen de luyen panen.’

³⁸Uku mutus udi utuk manen jano de coa udi usaho; tun-tun luyen berusaho ngen udi teko mopoa asea usaho tobo'o.”

³⁹Dau tun Samaria kunei kuta pecayo ngen Si kerno selawei'o besaksai, “Si madeak ngen uku kute sesuatau de sudo uku menea.”

⁴⁰Ketiko tun-tun Samaria o sapei ngen Yesus, tobo'o minoi ngen Si, supayo Si tinggea ngen tobo'o. Si kulo tinggea neak di duai bilai ke'anne.

⁴¹Kerno kecek Ne, lebiak dau igai tun de pecayo.

⁴²Tobo'o madeak ngen selawei'o, “Keme pecayo, tapi iso igai kerno jano de ko nadeak, sebab keme suang bi temi'uk Si ngen keme namen, bahwo Siba benea-benea Juru Selamat dunio.”

⁴³Sesudo duai bilai Yesus berakat kunei di moi Galilea,

⁴⁴ sebab Yesus suang bi saksai bahwo, suang nebai coa tun mego neak negraine suang.

⁴⁵ Sesudo Si sapei neak Galilea, tun-tun Galilea senambut Si, kerno tobo'o bi kemliak kute sesuatau de kenerjo-Ne neak Yerusalem pado pesta'o, sebab tobo'o suang milau moi pesta'o.

⁴⁶ Sesudo'o Yesus belek igai moi Kana neak Galilea, neak ipe Si bel'o menea bioa jijai anggur. Neak Kapernaum ade suang pegawai istana, anok semaneine dong bolon.

⁴⁷Ketiko si temi'uk bahwo Yesus bi teko kunei Yudea moi Galilea, lalauba si ngen Si lajau mino, supayo Si teko ngen kema'en anokne, sebab anokne gesea matei.

⁴⁸Nadeak Yesus ngen si, “Amen udi coa kemleak tando ngen mujizat, udi coa pecayo.”

⁴⁹Pegawai istana'o madeak ngen Si, “Tuan, tekoba ayok anokku matei.”

⁵⁰Nadeak Yesus ngen si, “Lalauba, anoknu idup!” Tun'o pecayo ngen kecek Yesus ngen si, lajau lalau.

⁵¹Ketiko si masiak neak tengeak dalen pelayan-pelayanne bi teko ngen Si ngen bito, bahwo anokne idup.

⁵²Si betanye ngen tobo'o jam kedau anokne muloi ka'en. Jawab tobo'o, “Bilai lebeak jam satu dememne ka'en.”

⁵³Bak'o kulo tinget, bahwo pado waktau'oba Yesus madeak ngen si, “Anoknu idup.” Lajau si ngen kute keluargone pecayo.

⁵⁴Do'oba tando keduai de nea Yesus ketiko Si belek kunei Yudea moi Galilea.