Read Rejang YOHANES 7 Bible Online

YOHANES 7 - Rejang bible

YOHANES 7

¹Sesudo'o Yesus paneu keliling Galilea, sebab Si coa lok tep tinggea neak Yudea, kerno neak yo tun-tun Yahudi berusaho utuk munuak-Ne.

² Waktau o sudo pa'ok Bilai Rayo tun Yahudi, adeba Bilai Rayo Pondok Dawen.

³Lajau madeak pasuak-pasuak Yesus ngen-Si, “Berakatba kunei yo ngen lalau moi Yudea, supayo penotoa-penotoa-Nu kulo kemliak plep de Ko menea.

⁴Sebab coa suang tun menea sesuaktau neak penan tebunyin, amen si lok ngakau neak muko umum. Amen Ko menea hal-hal de awei yo, kentenba dirai-Nu ngen dunio.” (

⁵Sebab pasuak-pasuak-Ne suang coa pecayo ngen-Si.)

⁶Lajau jawab Yesus ngen tobo'o, “Waktau Uku ati sapei, tapi bagiak ko bogoa ade waktau.

⁷Dunio coa dapet jengik ngen udi, tapi si jengik Uku, sebab Uku saksai tetang si bahwo kerjo-kerjone kidek.

⁸Lalauba udi moi pesta o. Uku coa lalau moi mindi, kerno waktau Uku ati sapei.”

⁹Awei yo ba nadeak-Ne ngen tobo'o, ngen Si kulo tinggea neak Galilea.

¹⁰Sesudo pasuak-pasuak-Ne lalau moi pesta o, Si kulo lalau moi mindi, seca'o dediem ngen coa ade tun de namen.

¹¹Tobo penguaso Yahudi mesoa Si neak pesta o ngen madeak, “Neak ipe Si?”

¹²Neak antaro tun dau teti'uk dau bisik tetang Si. Ade de madeak, “Si tun baik.” Tapi ade kulo de madeak, “Coa! Si jemijai tun dau limau.”

¹³Coa suang kulo de binai madeak seca'o tete'ang tetang Si kerno saben te'adep tobo penguaso Yahudi.

¹⁴Tengeak-tengeak pesta, Yesus masuk moi lem Umeak Tuhan, lajau muloi majea.

¹⁵Tobo penguaso Yahudi meding selle ngen madeak, “Awei ipe tun yo temuan pengetahuan awei yo ngen coa belajea?”

¹⁶Jawab Yesus, “Ajaran-Ku coa be'asal kunei dirai-Ku suang, tapi kunei si de bi mutus Uku.

¹⁷Api bae lok menea kelok-Ne, si bakea namen jano Ajaran-Ku yo berasal kunei Allah, jano Uku madeak kunei dirai-Ku suang.

¹⁸Api bae gi madeak kunei diraine suang, Si mesoa hormat bagiak dirai-Ne suang. Tapi api bae de mesoa hormat bagiak si de mutusne, si benea ngen coa ade de coa benea ngen Si.

¹⁹Musa de bi melei ukum agamo Yahudi ngen ko? Tapi coa suang tun neak antaro udi de menea ukum agamo Yahudi o. Getai udi berusaho munuak Uku?”

²⁰Tun dau o jemawab, “Ko pasuk semat! Api de berusaho munuak Ko?”

²¹Jawab Yesus, “Cuma do plep de Uku menea, udi kute bi selle.

²² Jijai, Musa temtep supayo udi sunat — sebeneane sunat o iso kunei Musa, tapi kunei ninik puyang ite ngen ko semunat tun pado bilai Sabat!

²³ Amen suang tun temimo sunat pado bilai Sabat, supayo ukum Musa jibeak nelanggea, getai udi mengiak ngen Uku, kerno Uku kema'en kute awok suang tun pado bilai Sabat.

²⁴Jibeakba mukum temurut jano de keten, tapi mukum ba ngen adea.”

²⁵Sesudo'o kekedau tun Yerusalem madeak, “Iso dio tun de nesoa utuk nunuak?

²⁶Tapi keliakba, Si miling leluaso, ngen tobo'o coa madeak jejano ngen-Si. Mukin pemipin ite benea-benea bi namen bahwo Si adeba Kristus Rajo Penyelamat?

²⁷Tapi tetang tun yo ite namen kunei ipe asal-Ne, sebelekne tengen Kristus teko, coa ade suang tun de namen kunei ipe asal-Ne.”

²⁸Waktau Yesus ngajea neak Bait Allah, Si menggang, “Memang Uku udi namen ngen udi namen kunei ipe asal-Ku; tapi Uku teko iso das kelok-Ku suang, tapi Uku nutus ngen Si de benea de coa udi namen.

²⁹Uku namen Si, sebab Uku teko kunei Si, ngen Siba de mutus Uku.”

³⁰Tobo'o berusaho temakep Si, tapi coa ade suang tun de binai gemindoa Si, sebab waktaune ati sapei.

³¹Tapi neak antaro tun dau o ade dau de pecayo ngen-Si ngen tobo'o madeak, “Amen Kristus teko, mukin Si bakea menea lebiak dau tando mujizat kunei de sudo nea-Ne yo?”

³²Tun-tun Farisi temi'uk tun dau misik hal-hal o tetang Si, ngen kerno o imem-imem kepalo ngen tun-tun Farisi meluak tukang jago Bait Allah utuk temakep-Ne.

³³Lajau padeak Yesus, “Tinggea didik waktaune Uku ade sesamo udi ngen sesudo'o Uku bakea lalau ngen Si de sudo mutus Uku.

³⁴Udi bakea mesoa Uku, tapi coa bakea temau Uku; sebab udi coa dapet teko moi penan neak ipe Uku berade.”

³⁵Kerno o, tobo penguaso Yahudi o madeak suang tun ngen de luyen ne, “Moi ipe Si bakea lalau, sehinggo ite coa dapet temau ngen Si? Jano si be niat lok lalau ngen tun-tun Yahudi de tinggea neak ratau, neak antaro tun Yunani, utuk majea tun Yunani?

³⁶Jano tai kecek de madeak-Ne yo: Udi bakea mesoa Uku, tapi udi coa bakea temau Uku, ngen: Udi coa dapet teko moi penan neak ipe Uku berade?”

³⁷ Pado bilai akhir kunei perayaan'o, adeba bilai de paling peting, Yesus je neak Umeak Tuhan ngen menggang, “Api bae de aus, lok ba si teko ngen Uku ngen menem!

³⁸ Api bae de pecayo ngen Uku, awei de nadeak ngen Kiteb Sucai, ‘Kunei lem ateine bakea ngalau aliran-aliran bioa idup.’ ” (

³⁹De taine adeba Roh de bakea tenimo ngen tobo'o de pecayo ngen Si; kerno Yesus ati mulio.)

⁴⁰Kekedau tun neak antaro dau tun, de temi'uk kecek-kecek o, madeak, “Si yo benea-benea nebai de bakea teko.”

⁴¹De luyen madeak, “Si yo Rajo Penyelamat.” Tapi de luyen igai madeak, “Iso, Rajo Penyelamat coa teko kunei Galilea!

⁴² Iso kiteb Sucai madeak, bahwo Rajo Penyelamat berasal kunei royot Daud ngen kunei sadei Betlehem, penan Daud bel'o tinggea?”

⁴³Lajau timboa ba belawen neak antaro tun dau kerno Si.

⁴⁴Kekedau tun neak antaro tobo'o lok temakep Si, tapi coa ade suang tun de binai gemindoa-Ne.

⁴⁵Sesudo penjago-penjago o belek ngen imem-imem kepalo ngen tun-tun Farisi, de madeak ngen tobo'o, “Getai udi coa mbin-Ne?”

⁴⁶Jawab penjago-penjago o, “Ati perneak suang kulo madeak awei tun o!”

⁴⁷Lajau jawab tun-tun Farisi o ngen tobo'o, “Jano udi kulo limau?

⁴⁸Ade coa suang tun neak antatro pemipin-pemipin de pecayo ngen Si, jano suang neak antaro tun-tun Farisi?

⁴⁹Tapi tun dau yo de coa kemnal ukum agamo Yahudi, tekutukba tobo'o!”

⁵⁰ Nikodemus, suang kunei tobo'o, de bel'o teko ngen Si, madeak ngen tobo'o,

⁵¹“Temurut ukum, suang tun coa buliak nukum ayok pekarone teni'uk ngen ayok tun namen jano de sudo nea-Ne?”

⁵²Jawab tobo'o, “Jano ko kulo tun Galilea? Senlidikba Kiteb Sucai ngen bakea namen bahwo coa ade nebai de teko kunei Galilea.”

⁵³Lajau tobo'o belek moi umeakne sesuang.