Read Rejang YOHANES 8 Bible Online

YOHANES 8 - Rejang bible

YOHANES 8

²Pepueng nien Si ade igai neak Umeak Tuhan, ngen kute rakyat teko ngen-Ne. Si temot ngen ngajea tobo'o.

³Lajau gu'au-gu'au agamo ngen tun-tun Farisi mbin ngen-Si suang selawei de gidong menea zinah.

⁴Tobo'o mpek selawei o neak tengeak-tengeak lajau madeak ngen Yesus, “Rabi, selawei yo tetakep waktau si gidong menea zinah.

⁵ Musa lem ukum agamo Yahudi meriteak ite utuk meluk selawei-selawei de awei yo ngen butau. Awei ipe pedapet-Nu tetang hal o?”

⁶Tobo'o madeak hal o utuk cemubo Si, supayo tobo'o dapet sesuaktau utuk semaleak-Ne. Lajau Yesus mukuk awok-Ne lajau nulis ngen jiai-Ne neak pitok.

⁷Waktau tobo'o bogoa betanye ngen Si, Si kulo je lajau madeak ngen tobo'o, “Api bae neak antaro udi coa beduso, kelokba si de deno melluk butau ngen selawei o.”

⁸Lajau Si mukuk awokne igai ngen nulis neak pitok.

⁹Tapi sesudo tobo'o temi'uk kecek o, lalauba tobo'o sesuang, muloi kunei de tuai. Akherne tinggea ba Yesus suang dirai ngen selawei o de tep neak penanne.

¹⁰Lajau Yesus je ngen madeak ngen si, “Hoi selawei, neak ipe tobo'o? Coa ade suang tun de mukum ko?”

¹¹Jawabne, “Coa ade, Tuhan.” Lajau nadeak Yesus, “Uku kulo coa mukum ko, jibeak menea duso igai muloi kunei uyo.”

¹² Yesus madeak igai ngen tobo'o, “Uku ba te'ang dunio. Api bae de temotoa Uku, si coa bakea paneu lem kelem, tapi si bakea temuan te'ang dunio.”

¹³ Lajau nadeak tun-tun Farisi ngen Si, “Ko besaksai tetang dirai-Nu, Ko besaksai coa benea.”

¹⁴Jawab Yesus, “Uku besaksai tetang dirai-Ku suang, tapi saksai-Ku o benea, sebab Uku namen, kunei ipe Uku teko ngen moi ipe Uku lalau. Udi coa namen kunei ipe Uku teko ngen moi ipe Uku lalau.

¹⁵Udi mukum temurut ukuran manusio, Uku coa mukum suang tun.

¹⁶Ngen kunyau Uku mukum, ukuman-Ku o benea, sebab Uku coa suang dirai, tapi Uku sesamo ngen Bapa de mutus Uku.

¹⁷Lem kiteb agamo tun Yahudi ade tetulis bahwo saksai duai tun adeba sah.

¹⁸Uku ba de besaksai tetang dirai-Ku suang ngen kulo Bapa, de mutus Uku, besaksai tetang Uku.”

¹⁹Lajau nadeak tobo'o ngen Si, “Neak ipe Bapa-Nu?” Jawab Yesus, “Baik Uku jano Bapa-Ku coa udi namen. Sekirone udi namen Uku, udi namen kulo Bapa-Ku.”

²⁰Kecek-kecek o de nadeak Yesus pa'ok kutak-kutak caci, waktau Si majea neak lem Umeak Tuhan. Tapi Coa suang tun de temakep Si, kerno waktaune ati sapei.

²¹Lajau Yesus madeak igai ngen tobo'o, “Uku bakea lalau, ngen udi mesoa Uku tapi udi bakea matei lem dusonu. Moi penan Uku lalau, coa mukin udi teko.”

²²Kerno o padeak tobo penguaso Yahudi o, “Jano si lok beladeu mako de nadeak-Ne: ‘Moi penan uku lalau, coa mukin udi teko?’ ”

²³Lajau si madeak ngen tobo'o, “Udi berasal kunei beak, Uku kunei das. Udi kunei dunio yo; Uku iso kunei dunio yo.

²⁴Kerno o nano Uku madeak ngen udi, bahwo udi bakea matei lem dusonu. Sebab amen udi coa pecayo bahwo ‘Uku ba Si, udi bakea matei lem dusonu’.”

²⁵Lajau padeak tobo'o ngen-Si, “Api Ko?” Jawab Yesus ngen tobo'o, “Jano de sudo Uku madeak ngen udi kunei ke'an yo?

²⁶Dau de arus Uku madeak ngen Kumakim tetang udi. Tapi Si de mutus Uku, adeba benea. Ngen jano de Kutemi'uk kunei Si, do'oba de Uku madeak ngen dunio.”

²⁷Tobo'o coa ngertai bahwo Si miling ngen tobo'o tetang Bapa.

²⁸Mako padeak Yesus, “Amen udi bi melekat Anok Manusio, tembei ba udi namen bahwo, ‘Uku ba Si, bahwo Uku coa menea jejano kunei dirai-Ku suang, tapi Uku miling tetang hal-hal, Uku madeak jano de majea Bapa ngen Uku.’

²⁹Si, de sudo mutus Uku, semerto Uku. Si coa perneak teminggea Uku suang, sebab Uku bogoa menea jano de semnang atei-Ne.”

³⁰Sesudo Yesus madeak kutene o, dau tun-tun Yahudi de sudo pecayo ngen Si.

³¹Lajau padeak-Ne ngen tun-tun Yahudi de sudo pecayo ngen Si, “Amen udi idup temurut Firman-Ku, udi benea-benea penotoa-Ku.

³²Ngen udi bakea namen kebenea ngen kebenea o bakea mbebas udi.”

³³ Jawab tobo'o, “Keme adeba royot Abraham ngen coa perneak jijai pelayan api bae. Awei Ko dapet madeak: ‘Udi bakea mbebas’?”

³⁴Padeak Yesus ngen tobo'o, “Sesungguakne Uku madeak ngen udi, tiep tun de menea duso, adeba hamba duso.

³⁵Hamba coa temuan penan lem umeak seke'anne.

³⁶Jijai, amen Anok o mbebas udi, udi kulo benea-benea mbebas.”

³⁷Uku namen bahwo udi adeba royot Abraham, tapi udi berusaho munuak Uku kerno Firman-Ku coa dapet penan neak lem udi.

³⁸Jano de Uku kemliak ngen Bapa-Ku, do'oba de Uku madeak. Awei o kulo udi menea tetang jano de udi temi'uk kunei Bapa-Nu.”

³⁹Jawab tobo'o ngen Si, “Bak keme adeba Abraham.” Padeak Yesus ngen tobo'o, “Amen sekirone udi anok-anok Abraham, udi kemerjo de kenerjo Abraham.

⁴⁰Tapi uyo udi berusaho munuak Uku, suang tun de madeak de benea ngen udi, adeba de benea Uku temi'uk kunei Allah; kerjo de awei yo coa kenerjo ngen Abraham.

⁴¹Udi kemerjo kerjo baknu suang.” Jawab tobo'o, “Keme coa laher kunei nga'em. Bak keme do, adeba Allah.”

⁴²Nadeak Yesus ngen tobo'o, “Amen Allah adeba Baknu, udi bakea kemasiak Uku. Sebab Uku teko kunei Allah ngen uyo uku ade neak yo. Uku coa teko ngen kelok-Ku suang, tapi Siba mutus Uku.

⁴³Jano sebabne udi coa ngertai bahaso-Ku? Sebab udi coa dapet temakep firman-Ku.

⁴⁴Udi berasal kunei baknu, adeba Iblis, ngen udi lok menea kenlok baknu. Si adeba tukang munuak manusio kunei ke'an yo ngen coa idup lem de kebenea, kerno neak lemne coa ade kebenea. Amen si miling coa benea, si miling kunei diraine suang. Sebab si adeba tukang ngike ngen bak tukang ngike.

⁴⁵Tapi kerno Uku madeak de benea ngen udi, udi coa pecayo ngen Uku.

⁴⁶Api neak antaro udi de melei bukti bahwo Uku menea duso? Amen Uku madeak de benea, getai udi coa pecayo ngen Uku?

⁴⁷Api bae berasal kunei Allah, si temi'uk firman Allah. Do'oba sebabne udi coa temi'ukne, kerno udi coa berasal kunei Allah.”

⁴⁸Tobo penguaso Yahudi jemawab Yesus, “Jano ba benea amen keme madeak bahwo Ko tun Samaria ngen pasuk semat?”

⁴⁹Jawab Yesus, “Uku coa pasuk semat. Tapi Uku mego Bapa-Ku ngen udi coa mego Uku.

⁵⁰Uku coa mesoa hormat bagiak-Ku. Ade do de mesoane ngen Si kulo de mukum.

⁵¹Sesungguakne Uku madeak ngen udi: Api bae temotoa firman-Ku, si coa bakea meding maut sapei keke'anne.”

⁵²Nadeak tun-tun Yahudi ngen Si, “Uyo keme namen bahwo Ko pasuk semat. Sebab Abraham sudo matei ngen awei yo kulo nebai-nebai. Tapi Ko madeak, ‘Api bae de temotoa firman-Ku, si coa bakea meding maut sapei keke'anne.’

⁵³Jano Ko lebiak lai kunei bak ite Abraham, de sudo matei, nebai-nebai kulo bi matei ngen api Ko semrai dirai-Nu?”

⁵⁴Jawab Yesus, “Amen Uku de mulio dirai-Ku suang, mako kemulio-Ku o didik kulo coa gen taine. Bapa-Ku ba de mulio Uku, tetang api udi madeak: Si adeba Allah keme,

⁵⁵pado hal udi coa kemnal Si. Tapi Uku kemnal Si. Amen Uku madeak: Uku coa kemnal Si, mako Uku adeba tukang ngike, serai awei udi, tapi Uku kemnal Si ngen Uku temotoa firman-Ne.

⁵⁶Abraham baknu beriang bahwo si bakea kemliak bilai-Ku ngen si bi kemliakne ngen si besukocito.”

⁵⁷Lajau nadeak tobo penguaso Yahudi o ngen Si, “Omor-Nu ati lemo puluak taun ngen Ko bi kemliak Abraham?”

⁵⁸Nadeak Yesus ngen tobo'o, “Sesungguakne Uku madeak ngen udi, ayok Abraham ade, Uku bi ade.”

⁵⁹Lajau tobo'o mok butau utuk meluk Si; tapi Yesus nyep ngen teminggea Umeak Tuhan.