Read Rejang KISAH RASUL-RASUL 11 Bible Online

KISAH RASUL-RASUL 11 - Rejang bible

KISAH RASUL-RASUL 11

¹Rasul-rasul ngen tun-tun de pecayo neak kute Yudea temi'uk bahwo tun-tun de coa temuan agamo Yahudi kulo sudo temimo kecek Allah.

²Waktau Petrus sapei neak Yerusalem, tun-tun Yahudi de sudo pecayo o, pitneak Petrus.

³Tobo'o madeak, “Getai ko lalau moi umeak tun-tun de ati senunat? Ko mala mukmei kulo besamo-samo ngen tobo'o?”

⁴Tapi Petrus jemlas kute sesuaktau dedo, nadeakne,

⁵“Uku gidong bedu'o neak kota Yope, lajau uku kemliak sewaktau pengeliak. Uku kemliak ade seswaktau de awei delembea kain de libea tenu'un kunei lenget, tegatung pado kepat sudut ne, sudo'o bedan neak depeaku.

⁶Waktau uku kemliak moi lem ne, uku kemliak benatang-benatang kekea pat, benatang-benatang liea, benatang-benatang melata ngen burung-burung.

⁷Lajau uku temi'uk sa'ei de madeak ngen ku, ‘Kelongonba, Petrus, sembeliakba ngen mbukba!’

⁸Tapi uku madeak, ‘Coa, Tuhan sebab ati perneak de haram ngen najis masuk moi lem bibiaku.’

⁹Tapi saei'o madeak igai kunei lenget, ‘Barang de sudo halal denadeak Allah, jibeakba de nadeak haram.’

¹⁰Hal'o tejijai sapei telau kilai, lajau kutene tenarik igai moi lenget.

¹¹Seketiko'o kulo telau tun je neak adep umeak, neak ipe keme nupang; tobo'o nutus kunei Kaisarea ngen ku.

¹²Lajau roh'o madeak, ‘Lalauba besamo tobo'o ngen coa reragau!’ Keenum pasuak yo kulo semerto uku. Keme masuk moi lem umeak tun'o,

¹³si cemrito ngen keme, awei ipe si kemliak suang malaikat je neak lem umeakne, madeak ngen si, ‘Melueakba tun moi Yope utuk mapet Simon de senbut Petrus.

¹⁴Si bakea semapei bito ngen udi de bakea semlamat ko ngen keluargo nu.’

¹⁵Waktau uku muloi miling, tu'unba Roh Sucai moi das tobo'o, serai awei moi das ite mena'o.

¹⁶ Lajau tingetba uku ngen kecek Tuhan, ‘Yohanes membaptis ngen bioa, tapi udi bakea di baptis ngen Roh Sucai.’

¹⁷Jijai, amen Allah melei karunio de serai ngen tobo'o awei ngen ite pado waktau ite pecayo ngen Tuhan Yesus Kristus, awei ipe mukin uku temgeak Si?”

¹⁸Waktau tobo'o temi'uk hal'o, tobo'o jijai tenang, lajau memulikan Allah, nadeakne, “Jijai, bangso-bangso luyen kulo Allah melei karunio utuk tobat kunei duso-dusone.”

¹⁹ Sementaro'o dau tun de tesebea kerno penganiayaan de timboa sesudoh Stefanus matei. Tobo'o tesebea sapei moi Fenisia, Siprus ngen Antiokhia; tapi tobo'o melei namen Bito Baik ngen tun Yahudi bae.

²⁰Tapi, neak antaro tobo'o ade kekedau tun Siprus ngen tun Kirene de sapei neak Antiokhia, madeak kulo nge tun-tun makei bahaso Yunani ngen melei namen tetang Tuhan Yesus.

²¹Tangen Tuhan semerto tobo'o ngen sejumleak lai tun jijai pecayo ngen semreak dirai ngen Tuhan.

²²Bito tetang tobo'o o teni'uk ngen jemaat neak Yerusalem, lajau jemaat'o mutus Barnabas lalau moi Antiokhia.

²³Sesodo Barnabas teko ngen kemliak anugrah Allah, riangba si. Si melei periteak supayo tobo'o kute sungguak-sungguak setia ngen Tuhan,

²⁴kerno Barnabas adeba tun baik, penuak ngen Roh sucai ngen imen. Lajau dau tun nembin ngen Tuhan.

²⁵Sesudo'o, lalauba Barnabas moi Tarsus utuk mesoa Saulus; sesudo temau ngen si, si mbinne moi Antiokhia.

²⁶Tobo'o tinggea besamo-samo ngen jemaat'o sekean de taun penuak samo ngajea dau tun. Neak Antiokhiaba penotoa-penotoa'o utuk pertamo sekilaine de senbut Kristen.

²⁷Pado waktau'o tekoba kekedau nebai kunei Yerusalem moi Antiokhia.

²⁸ Saleak suang kunei tobo'o de genne Agabus idup igai ngen kuaso Roh si madeak bahwo kute dunio bakea jijai kenyemen lai. Hal'o tejijai pado zaman Klaudius.

²⁹Lajau penotoia-penotoa sepakat utuk kemopoa sumbangan sesuoi ngen kemampuan tobo'o sesuang ngen kemirimne ngen pasuak-pasuak do imen de tinggea neak Yudea.

³⁰Hal'o tobo'o menea kulo, tobo'o kemirimne ngen pemipin-pemipin jemaat liwet Barnabas ngen Saulus.