Read Rejang KISAH RASUL-RASUL 12 Bible Online

KISAH RASUL-RASUL 12 - Rejang bible

KISAH RASUL-RASUL 12

¹Kekiro pado waktau'o Rajo Herodes muloi betindak te'adep kekedau tun kunei jemaat.

²Si meluak munuak Yakobus, pasuak Yohanes, ngen pedang.

³Waktau si kemliak bahwo hal'o semnang atei tun Yahudi, sesudo'o si meluak temaen Petrus kulo. Waktau'o Bilai Rayo Ruti Coa Beagai.

⁴ Sesudo Petrus tenakep, Herodes meluak nasuk moi lem sel ngen jenago pat regu, masing-masing pat prajurit. Maksudne adeba, kunyau sesudo Paskah si nembin moi adep tun dau.

⁵Awei yo ba Petrus tenaen neak lem sel. Tapi jemaat tekun de mu'one ngen Allah.

⁶Pado kelmen ayok Herodes lok mbinne ngen tun dau, Petrus tidua neak antaro duai tun prajurit, neket ngen duai ratoi, dong neak adep bang, tobo pengawal dong jago sel'o.

⁷Tetibo je ba suang malaikat Tuhan pa'ok Petrus ngen cahayo besinea lem bilik sel'o. Malaikat'o minggut Petrus, nadeakne, “Kelongonba!” Lajau putusba ratoi'o kunei tangen Petrus.

⁸Sesudo'o malaikat'o madeak ngen si, “Neketba pinggangnu ngen nakeiba sepatunu!” Si kulo menea awei'o. Sesudo'o, malaikat'o madeak ngen si, “Nakeiba jubahnu, totoaba uku!”

⁹Lajau si motoa malaikat'o keluea, si coa namen bahwo jano de nea malaikat'o benea-benea tejijai, sakone si kemliak sewaktau pengeliak.

¹⁰Sesudo tobo'o liwet penan jago de pertamo ngen penan jago keduai, sapeiba tobo'o moi muko bang besai de menuju moi kota. Bang'o tukok suang utuk tobo'o. Sesudo sapei neak luea, tobo'o paneu sapei moi ujung dalen, tetibo malaikat'o teminggea si.

¹¹Sesudo sadar, Petrus madeak, “Uyo namenba uku benea-benea bahwo Tuhan bi meluak malaikat-Ne ngen semlamat uku kunei tangen Herodes, kunei kute sesuatau de naep tun Yahudi.”

¹²Sesudo bepeker tegoa, lalauba si moi umeak Maria, indok Yohanes de senbut kulo Markus. Neak di dau tun bekopoa ngen beduo.

¹³Waktau si kemtuk bang, tekoba suang pelayan selawei genne Rode utuk namen api de kemtuk bang'o.

¹⁴Si lajau kemnal sa'ei Petrus, tapi kerno riangne, si coa mukok bang'o ngen segro masuk moi lem utuk melei namen bahwo Petrus ade neak adep bang.

¹⁵Tobo'o madeak ngen selawei'o, “Ko mipai.” Tapi si tep madeak bahwo benea-benea awei yo. Nadeak tobo'o, “Do'o malaikatne.”

¹⁶Sementaro'o Petrus bogoa kemtuk bang'to, waktau tobo'o mukok bang ngen kemliak si, tobo'o te'cengang.

¹⁷Tapi Petrus melei isyarat ngen tangenne, supayo tobo'o diem, lajau si cemrito awei ipe Tuhan mbinmoi luea kunei sel. Nadeakne, “Melei namenba hal yo ngen Yakobus ngen pasuak-pasuak te.” Lajau si keluea, lalau moi penan luyen.

¹⁸Menne tejijaiba sutok neak antaro tentra pengawal. Tobo'o betanye-tanye jano de sudo tejijai ngen Petrus.

¹⁹Herodes meluak mesoa Petrus, tapi tobo'o coa temau Petrus. Lajau Herodes meluak merikso pengawal-pengawal'o ngen munuak tobo'o. Sudo'o si berakat kunei Yudea moi Kaisarea ngen tingea neak di.

²⁰Herodes kebiak mengiak teadep tun Tirus ngen Sidon. Das sepakat besamo tobo'o lalau madep si. Tobo'o berasea mbujuk Blastus, tukang murus umeak tanggo rajo, moi pihok tobo'o, lajau tobo'o minoi damoi, kerno negrai tobo'o dapet bahan kembuk kunei wilayah rajo.

²¹Pado suaktau bilai de tentau, Herodes makei keracok kerajaan, lajau temot neak das takhta ngen pidato ngen tobo'o.

²²Laju rakyatne senu'ok males ne, “Dio sa'ei diwo, iso sa'ei manusio!”

²³Seketiko'o kulo si tenpok malaikat Tuhan kerno si coa melei hormat ngen Allah; si matei nembuk gelong-gelong.

²⁴Sementaro'o firman Allah tambeak tesebea ngen tambeak dau teniuk tun.

²⁵Barnabas ngen Saulus belek kunei Yerusalem, sesudo tobo'o semlesai tugas pelayanan tobo'o. Tobo'o mbin Yohanes, de senbut kulo Markus.