Read Rejang KISAH RASUL-RASUL 15 Bible Online

KISAH RASUL-RASUL 15 - Rejang bible

KISAH RASUL-RASUL 15

¹ Kekedau tun teko kunei Yudea moi antiokhia ngen majea ngen tun-tun pecayo neak di, “Amen udi coa senunat temurut adat istiadat hukum Musa, udi coa dapet senlamat.”

²Tapi Paulus ngen Barnabas temtang melawen pendapet tobo'o. Akherne tentep, supayo Paulus ngen Barnabas serto kekedau tun luyen kunei jemaat o lalau ngen rasul-rasul ngen pemipin-pemipin neak Yerusalem utuk madeak hal o.

³Tobo'o nembes ngen jemaat sapei moi luea kota, lajau tobo'o paneu liwet Fenisia ngen Samaria, cemrito tetang pertobatan tun-tun iso Yahudi. Hal o kembiak semnang atei tun-tun de pecayo neak di.

⁴Sapeine neak Yerusalem tobo'o senambut ngen jemaat, rasul-rasul ngen pemipin-pemipin, lajau tobo'o cemrito kute seseuaktau de Allah menea liwet tobo'o.

⁵Tapi kekedau tun kunei aliran Farisi, de sudo jijai pecayo, je ngen madeak, “Tun-tun iso Yahudi harus senunat ngen wajib utuk temurut hukum Musa.”

⁶Lajau sidangba rasul-rasul ngen pemipin-pemipin utuk berunding hal o.

⁷ Sesudo bedebat kekedau anne, jeba Petrus, madeak ngen tobo'o, “Hoi pasuak-pasuak, udi namen bahwo sejok pertamo Allah miliak uku kunei antaro udi, supayo liwet uku bangso-bangso luyen temi'uk Bito Baik ngen jijai pecayo.

⁸ Allah, de kemnal atei manusio, melei saksai utuk tobo'o ngen melei karunio Roh Sucai ngen tobo'o serai awei ngen ite.

⁹Allah samo sekilai coa mbeda antaro ite ngen tobo'o, sesudo Si semucai atei tobo'o ngen imen.

¹⁰Amen awei o, getai udi lok cemubo Allah ngen mpek moi das bau penotoa-penotoa o kewajiban de benek, baik ngen ninik puyang te atau ite su'ang?

¹¹Sebelekne, ite pecayo bahwo liwet anugrah Tuhan Yesus Kristus ite bakea senlamat serai awei tobo'o kulo.”

¹²Lajau diemba kute umat o, lajau tobo'o temi'uk Paulus ngen Barnabas cemrito kute tando ngen mujizat de nea Allah ngen perantaro tobo'o neak antaro bangso-bangso luyen.

¹³Sesudo Paulus ngen Barnabas selesei miling, Yakobus madeak, “Hoi pasuak-pasuak, teni'ukba uku:

¹⁴Simon bi cemrito bahwo pado mulone Allah temunjuk rahmat-Ne ngen bangso-bangso luyen, miliak suaktau umat kunei antaro tobo'o bagiak gen-Ne.

¹⁵Hal o sesuoi ngen kecek-kecek paro nebai awei de tetulis:

¹⁶ ‘Sesudo'o Uku bakea belek igai ngen temgok igai umeak Daud de sudo ubuak, ngen menea igai umeak de ubuak'o ngen bakea Uku temgokne igai.

¹⁷Supayo kute tun luyen mesoa Tuhan ngen kute bangso de dasne, gen-Ku senbut. Awei'oba firman Tuhan de menea kutene yo,

¹⁸de sudo namen sejok semulo.’

¹⁹Sebab'o Uku bependapet bahwo ite coa buliak menea kesaro bagiak tobo'o kunei bangso-bangso luyen de belek ngen Allah.

²⁰ Tapi ite harus temulis su'et ngen tobo'o, supayo tobo'o meu'ak dirai kunei kembuk de sudo nelei ngen berhala-berhala, kunei percabulan, kunei daging benatang de matei ncit ngen kunei daleak.

²¹Sebab sejok zaman mena'o hukum Musa nelei namen neak tiep-tiep kota, ngen sapei uyo hukum'o mbaco tiep-tiep bilai Sabat neak umeak-umeak semyang.”

²²Sesudo'o rasul-rasul ngen pemipin-pemipin serto kute jemaat o mok keputusan utuk miliak kunei antaro tobo'o kekedau tun de bakea nutus moi Antiokhia besamo-samo Paulus ngen Barnabas, adeba Yudas de senbut Barsabas ngen Silas. Keduaine adeba tun tepandang neak antaro tun-tun de pecayo.

²³Ngen tobo'o senreak su'et de sa'eine, “Salam kunei rasul-rasul ngen pemipin-pemipin, kunei pasuak-pasuaknu ngen pasuak-pasuak neak Antiokhia, Siria ngen Kilikia de asal kunei bangso-bangso luyen.

²⁴Keme bi temi'uk bahwo ade kekedau tun neak antaro keme, de coa dapet pesen kunei keme, bi menea keme liseak ngen menea keme bingung ngen ajaran tobo'o.

²⁵Kerno o ngen bulet atei keme bi berunding utuk miliak ngen mutus kekedau tun ngen udi besamo-samo Barnabas ngen Paulus de keme kasiak.

²⁶Duai tun de bi melei nyabaine kerno gen Tuhan ite Yesus Kristus.

²⁷Jijai, keme bi mutus Yudas ngen Silas de seca'o lisan bakea semapei suang hal-hal yo ngen udi.

²⁸Kerno adeba keputusan Roh Sucai ngen keputusan keme, supayo ngen udi jibeak tenanggung lebiak dau ban kunei pado de perlu yo:

²⁹Udi harus me'uak dirai kunei kembuk de senembeak ngen berhala, kunei daleak, kunei daging benatang de matei ncit ngen kunei percabulan. Amen udi jemago dirai teadep hal-hal yo, udi menea baik. Sapei piyoba, selamat.”

³⁰Sesudo pamit, Yudas ngen Silas berakat moi Antiokhia. Neak di tobo'o menok kute jemaat bekopoa, lajau semreak su'et o ngen tobo'o.

³¹Sesudo mbaco su'et o, jemaat riang nien kerno si'ing su'et o de melei penghiburan.

³²Yudas ngen Silas, de adeba kulo nebai, dau melei penghiburan ngen pasuak-pasuak de pecayo o ngen kemu'et atei tobo'o.

³³Sesudo kekedau anne Yudas ngen Silas tinggea neak di, pasuak-pasuak o mpas tobo'o lem damoi utuk belek ngen tobo'o de mutusne. [

³⁴Tapi Silas Melei keputusan utuk tinggea neak di.]

³⁵Paulus ngen Barnabas tinggea kekedau an neak Antiokhia. Tobo'o besamo-samo ngen dau tun luyen majea ngen melei namen firman Tuhan.

³⁶Paulus madeak ngen Barnabas, “Baikba ite belek ngen pasuak-pasuak ite neak tiep kota, neak ipe ite bi melei namen firman Tuhan, utuk kemliak, awei ipe keadaan tobo'o.”

³⁷Barnabas lok mbin kulo Yohanes de senbut Markus;

³⁸ tapi Paulus madeak ngen tegas bahwo coa baik mbin serto tun de sudo teminggea tobo'o neak Pamfilia ngen coa lok milau kerjo besamo-samo tobo'o.

³⁹Hal o jijai tekea, sehinggo tobo'o pisah, Barnabas mbin Markus kulo belayea moi Siprus.

⁴⁰Tapi Paulus miliak Silas, sesudo senreak ngen pasuak-pasuak de pecayo o ngen anugrah Tuhan.

⁴¹Berakatba si kemliling Siria ngen Kilikia samo kemu'et jemaat-jemaat neak di.