Read Rejang KISAH RASUL-RASUL 16 Bible Online

KISAH RASUL-RASUL 16 - Rejang bible

KISAH RASUL-RASUL 16

¹Paulus teko kulo moi Derbe ngen moi Listra. Neak di ade suang penotoa de genne Timotius. Indokne suang tun Yahudi ngen bi pecayo, dong tiakne suang tun Yunani.

²Timotius yo tekenal baik ngen pasuak-pasuak de pecayo neak Listra ngen neak Ikonium.

³Paulus lok, supayo si semertone lem pemaneu. Paulus meluak semunat si kerno tun-tun Yahudi neak daerah o, kerno tiep tun namen bahwo tiakne tun Yunani.

⁴Lem pemaneu keliling kunei kota moi kota Paulus ngen Silas semapei keputusan-keputusan de nemok paro rasul ngen pemipin neak Yerusalem, pesenne supayo jemaat-jemaat temotoane.

⁵Awei'oba jemaat-jemaat kemu'et lem imen, tiep bilai tambeak lai jumleakne.

⁶Tobo'o melitas taneak Frigia ngen taneak Galatia, kerno Roh Sucai temgeak tobo'o utuk melei namen Bito Baik neak Asia.

⁷Sapeine neak Misia tobo'o cemubo masuk moi daerah Bitinia, tapi Roh Yesus temgeak tobo'o.

⁸Sesudo melitas Misia, tobo'o sapei neak Troas.

⁹Kelmenne ketenba ngen Paulus suaktau pengeliak: Ade suang tun Makedonia je neak di ngen minoi ngen si, “Nyeb'angba miyo ngen tulungba keme!”

¹⁰Sesudo Paulus kemliak pengeliak o, segroba keme mesoa kesepatan utuk berakat moi Makedonia, kerno kunei pengeliak o keme mok kesipulan bahwo Allah bi menok keme utuk melei namen Bito Baik ngen tun-tun neak di.

¹¹Lajau keme teminggea Troas lasung belayea moi Samotrake, menne sapeiba keme neak Neapolis;

¹²neak di keme moi Filifi, kota pertamo neak bagian Makedonia yo, suaktau kota penan meratau tun Roma. Neak kota o keme tinggea kekedau bilai.

¹³Pado bilai Sabat keme keluea bang kota. Keme lalau moi biding bioa ngen temau penan semyang Yahudi, de sudo keme sako ade neak di; sesudo temot, keme miling ngen seselawei de bekopoa neak di.

¹⁴Saleak suang kunei seselawei o de genne Lidia turut temi'uk. Si asalne kunei kota Tiatira, si suang tun tukang jagea kain ungu de mengasihi Allah. Tuhan mukok ateine, sehiggo si temi'uk jano de nadeak Paulus.

¹⁵Sesudo si dibaptis besamo-samo kute tun neak umeakne, si majok keme, nadeakne, “Amen udi bependapet bahwo uku sungguak-sungguak pecayo ngen Tuhan, maroba nupang neak umeakku.” Si desok sapei keme temimone.

¹⁶Suaktau bilai waktau keme lalau moi penan semyang o, keme temau ngen suang budok selawei de temuan roh kidek; ngen ramalan-ramalanne tuan-tuanne dapet asea lai.

¹⁷Si temotoa Paulus ngen keme kunei belakang samo menggang, “Tun-tun yo hambo Allah De Maha Lekat. Tobo'o melei namen ngenko dalen keselamatan.”

¹⁸Hal o neane selamo kekedau bilai. Tapi waktau Paulus coa taen igai ngen gangguan o, si bepaling madeak ngen roh o, “Lem gen Yesus Kristus uku meluak ko keluea kunei selawei yo.” Seketiko o kulo kelueaba roh o.

¹⁹Ketiko majikan-majikanne o kemliak bahwo harapan tobo'o utuk dapet asea bi nyep, tobo'o temakep Paulus ngen Silas, lajau me'et tobo'o moi pasar utuk madep paro penguaso.

²⁰Sesudo tobo'o mbin keduaine madep pejabat-pejabat kota o, tobo'o madeak, “Tun-tun yo macau kota te yo; tobo'o adeba tun Yahudi.

²¹Tobo'o majea adat istiadat de coa buliak tenimo atau tenurut tun Roma.”

²²Tun dau kulo turut semrang Paulus ngen Silas. Lajau pejabat-pejabat kota o meluak cema'ik keracok kunei awok tobo'o ngen cemambuk tobo'o.

²³Sesudo tobo'o cenambuk kekedau kilai, tobo'o nasuk moi lem sel. Kepalo sel neriteak utuk jemago tobo'o ngen sungguak-sungguak.

²⁴Sesuoi ngen periteak o, kepalo sel mbin tobo'o moi ruang sel de paling tengeak, meket kekea tobo'o moi kieu.

²⁵Tapi kekiro tengeak malem Paulus ngen Silas bedu'o ngen mbin legau puji-pujian ngen Allah, tun-tun hukuman luyen temi'uk tobo'o.

²⁶Tapi tejijaiba gepo de lai, sehinggo fondasi-fondasi sel o gucang; seketiko o kulo tukokba kute bang ngen tukokba ratoi-ratoi de meket tobo'o kute.

²⁷Waktau kepalo sel o kelongon kunei tiduane ngen kemliak bang-bang sel tukok, si kemluea pedangne lok bunuak dirai. Si sako bahwo tun-tun hukuman o bi melilai diraine.

²⁸Tapi Paulus menggang ngen sa'ei lek, Paulus madeak, “Jibeak cemlako dirainu, kerno keme kutene masiak ade neak piyo!”

²⁹Kepalo sel o meluak mbin lapu, lajau melilai masuk, ngen gemtea sujudba si neak adep Paulus ngen Silas.

³⁰Si mbes tobo'o moi luea, samo madeak, “Tuan-tuan, jano de harus uku nea, supayo uku senlamat?”

³¹Tobo'o jemawap, “Cayoba ngen Tuhan Yesus Kristus, ko ngen kute isai umeaknu bakea selamat.”

³²Lajau tobo'o melei namen firman Tuhan ngen si, ngen kute tun de ade neak umeakne.

³³Pado jam o kulo kepalo sel o mbin tobo'o ngen mersi sileak tobo'o. Seketiko o kulo si ngen keluargone melei dirai utuk dibaptis.

³⁴Lajau si mbin tobo'o moi umeak ne, melei kembuk ngen tobo'o. Si kembiak riang bahwo si ngen kute isai umeakne bi jijai pecayo ngen Allah.

³⁵Pueng menne, pejabat-pejabat pemeriteak Roma mutus polisi moi sel utuk semapei periteak, “Nepasba Paulus ngen Silas!”

³⁶Kepalo sel temrus pesen o ngen Paulus, nadeakne, “Pejabat-pejabat kota bi meluak mpas udi; jijai kelueaba udi uyo, lalauba ngen damoi!”

³⁷Tapi Paulus madeak ngen tun-tun o, “Coa pakei sidang tobo'o bi cemambuk keme, tun Roma, neak adep umum, lajau mbin keme moi lem sel. Uyo tobo'o lok kemluea keme seca'o diem-diem? Coa mukin awei yo! Kunyauba tobo'o teko sung ngen mbin keme moi luea.”

³⁸Petugas-petugas polisi o melei nemen hal o ngen pejabat-pejabat kota. Ketiko tobo'o temi'uk bahwo Paulus ngen Silas adeba tun Roma, mako sabenba tobo'o.

³⁹Tobo'o teko minoi maaf lajau mbin keduai rasul o moi luea nge minoi, supayo tobo'o teminggea kota o.

⁴⁰Lajau tobo'o teminggea sel o ngen lalau moi umeak Lidia; sesudo temau ngen pasuak-pasuak de pecayo neak di ngen mibur tobo'o, berakatba keduai rasul o.