Read Rejang KISAH RASUL-RASUL 2 Bible Online

KISAH RASUL-RASUL 2 - Rejang bible

KISAH RASUL-RASUL 2

¹ Waktau sapei bilai Pentakosta, tobo'o kute bekopoa neak do penan.

²Seketiko'o teni'ukba sa'ei kunei lenget awei ibut lai masuk umeak neak ipe tobo'o temot.

³Ketenba ngen tobo'o dileak-dileak awei opoi de nyebea moi ipe-ipe ngen tetiep tobo'o.

⁴Tobo'o kute kenuaso Roh Sucai, ngen muloi miling lem bahaso-bahaso luyen, awei de nelei Roh'o ngen tobo'o utuk nadeak.

⁵Waktau o neak Yerusalem tinggea tun-tun Yahudi de taat kunei kute bangso neak beak lenget.

⁶Waktau temi'uk sa'ei o, belunggukba tun dau. Tobo'o tekanjet kerno teteip tobo'o temi'uk tun-tun pecayo miling lem bahaso tobo'o suang.

⁷Tobo'o kutene tecengang ngen selle, lajau madeak, “Tun-tun de miling dio kutene tun Galilea?

⁸Awei ipe mukin teteip ite temi'uk tobo'o miling lem bahaso ite suang, adeba bahaso penan ite laher.

⁹Ite yo adeba tun kunei Partia, Media, Elam, penduduk Mesopotamia, Yudea ngen Kapadokia, Pontus ngen Asia,

¹⁰Frigia ngen Pamfilia, Mesir ngen daerah-daerah Libia de pa'ok Kirene, ade kunei ite de teko kunei Roma,

¹¹baik tun Yahudi, tun Kreta ngen tun Arab. Ite kute temi'uk tobo'o miling lem bahaso ite suang tetang mujizat de nea Allah.”

¹²Tobo'o kutene tecengang ngen terpesona samo madeak suang ngen de luyen, “Jano taine yo?”

¹³Tapi de luyen semindir, “Tobo'o gidong mabuk anggur mis.”

¹⁴Lajau Petrus je sesamo kesebelas rasul o, ngen sa'ei nya'ing si madeak ngen tobo'o, “Hoi ko tun Yahudi ngen kute tun de tinggea neak Yerusalem, temi'ukba kecekku yo ngen tenanemba neak lem atei.

¹⁵Tun-tun yo coa mabuk awei de udi sako, kerno uyo tembei jam sembilan.

¹⁶Tapi do'oba de sudo nelei namen Allah liwet Nebai Yoël:

¹⁷ Allah befirman, ‘Bakea tejijai pado Bilai Kiamat bahwo: Uku bakea temu'un Roh-Ku moi das kute manusio. Mako anok-anoknu semanei ngen selawei bakea nelei namen. Ngen bujang semulen bakea dapet pengeliak-pengeliak. Ngen tun-tunnu de tuai bakea dapet mipai.

¹⁸Ngen hamba-hamba-Ku semanei ngen selawei, bakea-Ku temu'un Roh-Ku pado bilai-bilai o. Ngen tobo'o bakea melei namen firman.

¹⁹Uku bakea menea mujizat-mujizat neak das neak lenget, ngen tando-tando neak beak, neak bumai; bakea ade daleak ngen opoi, uep ngen asep.

²⁰Matai bilai bakea bubeak jijai kelem, ngen bulen jijai mileak ayok tekone Bilai Tuhan, bilai de lai ngen mulio o.

²¹Api de menggang ngen Tuhan bakea senlamat.’

²²Hoi tun-tun Israel! Temi'ukba kecek yo: Yesus kunei Nazaret adeba tun de sudo tentau Allah ngen dinyatakan ngen ko. Ngen kekuatan-kekuatan ngen mujizat ngen tando-tando ajaib de menea Allah liwet Si. Neak tengeak-tengeak ko, awei de ko namen.

²³ Si de senreak Allah temurut maksud ngen rencano-Ne, sudo ko semalib ngen ko munuak liwet tangen bangso-bangso durhako.

²⁴ Tapi Allah midup igai Si sesudo melpas Si kunei sikso maut kerno coa mukin Si tep ade neak lem kuaso maut o.

²⁵ Sebab bel'o Daud madeak tetang Si: ‘Uku kemliak Tuhan bogoa neak adepku; kerno Si je neak depeak kanenku, uku coa guyang.

²⁶Sebab o ateiku besukocito, ngen bibiaku besu'ok-su'ok: ngen awokku bakea diem lem kubua.

²⁷Sebab Ko coa semreak uku ngen dunio tun matei, ngen Ko coa munyau Tun Sucai-Nu kemliak benaso.

²⁸Ko melei namen ngen uku dalen kehidupan. Ko bakea melei uku keriang neak adep-Nu.’

²⁹Pasuak-pasuak, uku dapet madeak ngen te'us te'ang ngen udi tetang Daud, bapok bangso ite. Si bi matei ngen kenubua, kubuane masiak ade sapei bilai yo.

³⁰ Tapi si adeba suang nebai ngen si namen, bahwo Allah bi janjai ngen si ngen supeak bahwo saleak suang kunei royot Daud suang neak das takhtane.

³¹Kerno o si bi kemliak moi muko ngen bi miling tetang idup igai Rajo Penyelamat, waktau si madeak, ‘Bahwo Si coa teninggea neak lem dunio tun matei, bahwo daging-Ne coa benaso.’

³²Yesus yo ba de Allah midup igai. Tetang hal o keme kutene adeba saksai.

³³Sesudo Si nelekat ngen tangen kanen Allah ngen temimo kunei Bapa, Roh Sucai de jenanjai o, mako nelei-Ne Roh o awei de udi kemliak ngen temi'uk neak yo.

³⁴ Daud suang coa kenek moi surgo. Tapi Daud suang madeak: ‘Tuhan bi befirman ngen Tuanku:

³⁵Temotba neak depeak kanen-Ku, sapei Uku menea musuak-musuak-Nu jijai takluk.’

³⁶Do'o sebabne kute tun Israel arus namen nien bahwo Yesus de udi senalib o, Yesus do'oba kulo de sudo jenanjai Allah jijai Tuhan ngen Rajo Penyelamat!”

³⁷Waktau tun-tun o temi'uk hal o, atei tobo'o betanye ngen Petrus ngen rasul-rasul de luyen, “Jano de arus keme menea, pasuak-pasuak?”

³⁸Petrus jemawab, “Tobatba kunei duso-dusonu. Lokba tetiep udi baptis das gen Yesus Kristus, supayo duso-dusonu napun. Mako udi bakea temimo hadiah Roh Sucai kunei Allah.

³⁹Sebab de jenanjai Allah o adeba utuknu ngen royotnu serto utuk tun-tun de ade neak penan-penan de uak — adeba kute tun de menok Allah Tuhan ite utuk teko ngen-Si.”

⁴⁰Ngen dau kecek de luyen igai si saksai ngen demsok tobo'o, nadeakne, “Neleiba dirainu senlamat kunei tun-tun de kidek yo.”

⁴¹Tun-tun de temimo kecekne o neak baptis ngen pado bilai o jumlah tobo'o betambeak kekiro telau ribau jiwo.

⁴²Tobo'o tekun lem pengajaran rasul-rasul ngen bogoa bekopoa sesamo. Tobo'o mukmei sesamo ngen bedu'o sesamo.

⁴³Dau nien mujizat de nea ngen rasul-rasul o sehinggo kute tun kagum ngen saben.

⁴⁴ Kute tun de pecayo tep jijai do, ngen kute tobo'o temuan adeba temuan sesamo.

⁴⁵Bogoa ade kunei tobo'o de jemua hokne, lajau magiakne ngen kute tun sesuoi ngen perlune sesuang.

⁴⁶Tiep bilai tobo'o bogoa bekopoa neak Bait Allah; serto mukmei serpok, ngen riang ngen rendeak atei neak umeak-umeak tobo'o.

⁴⁷Tobo'o bogoa mujai Allah ngen kute tun senang ngen si. Tiep bilai jumlah tobo'o bogoa betambeak kerno Tuhan melei ngen tobo'o tun-tun de gidong senlamat.