Read Rejang KISAH RASUL-RASUL 20 Bible Online

KISAH RASUL-RASUL 20 - Rejang bible

KISAH RASUL-RASUL 20

¹Sesudo keadaan neak Efesus aman igai, Paulus kemopoa jemaat, melei semangat ngen tobo'o. Sesudo'o si mucep selamat tinggea lajau temrus pemaneune moi Makedonia.

²Si moi daerah-daerah Makedonia, melei dau nasihat ngen tun-tun de pecayo ngen Yesus neak di utuk melei semangat ngen tobo'o. Sesudo'o si lalau moi Yunani.

³Telau bulen anne si tinggea neak di. Lajau ketiko si dong siap-siap utuk belayea moi Siria, ade bito bahwo tun-tun Yahudi dong sepakat utuk munuakne. Kerno'o si melei keputusan utuk belek liwet Makedonia.

⁴Sopater anok Pirus de asalne kunei Berea lalau besamo-samo si; awei o kulo Aristarkhus ngen Sekundus tun Tesalonika, ngen Gayus tun Derbe. Kulo Timotius, Tikhikus ngen Trofimus, tun-tun kunei provinsi Asia.

⁵Tobo'o demute keme lajau mbot keme neak Troas.

⁶Sesudo Perayaan Ruti Coa Beagai, keme belayea teminggea Filifi. Lemo bilai sesudo'o keme bekopoa igai ngen tobo'o neak Troas. Neak di keme tinggea deminggau.

⁷Malem minggau keme bekopoa utuk mukmei besamo secao keluargo. Paulus miling ngen tun-tun, kerno menne si niat berakat. Sapei tengeak malem Paulus miling terus.

⁸Lem bilik neak tiket das, penan keme bekopoa o, ade dau lapu.

⁹Suang anok bujang genne Eutikhus temot neak kemdan. Kerno Paulus coa bedan miling, bujang o jijai stekuk nien sapei si tidua neak ndea o, lajau us moi mimbeak kunei tiket telau. Waktau tobo'o maketne, si bi matei.

¹⁰Tapi Paulus tu'un moi mimbeak, lajau gulek neak das awok bujang o ngen megepne. Paulus madeak, “Jibeak kuatir, si masiak idup!”

¹¹Sesudo'o Paulus kenek igai moi das, lajau magiak ruti ngen mbuk besamo-samo. Bi an miling ngen tun-tun sapei pueng, Paulus berakat.

¹²Tun-tun mbin belek bujang o lem keadaan idup moi umeakne. Tobo'o meding riang ngen kembiak terhibur.

¹³Keme lalau moi kepea lajau belayea lebiak dute moi Asos utuk mapet Paulus moi kepea neak di. Si sudo matur aweiyo kerno si bakea moi mindi liwet dalen da'et.

¹⁴Sesudo betemau neak Asos, Paulus segro kenek moi kepea lajau keme belayea moi Metilene.

¹⁵Kunei di keme belayea kulo, menne sapei neak penan de sekadep ngen Khios. Sebilaine keme sapei neak Samos, menne neak Miletus.

¹⁶Paulus bi temtep utuk coa singgeak neak Efesus, supayo jibeak muang waktau neak daerah Asia. Sedapet mukin si lok gacang sapei neak Yerusalem pado bilai rayo Pentakosta.

¹⁷Kunei Miletus Paulus kemirim bito moi Efesus utuk minoi ngen pemipin jemaat neak di utuk teko magea si.

¹⁸Ketiko tobo'o sapei, Paulus madeak ngen tobo'o, “Udi namen awei ipe uku idup selamo yo neak antaro udi sejok bilai pertamo uku sapei neak Asia.

¹⁹Rendeak atei ngen dau bioa matai, uku kerjo utuk Tuhan ngen dau meding saro kerno rancano kidek tun-tun Yahudi.

²⁰Udi namen bahwo uku coa segan melei namen ngen udi jano de beguno utuknu. Uku majea udi neak muko umum ngen neak umeak-umeak.

²¹Baik ngen tun-tun Yahudi atau tun-tun bangso luyen uku bogoa melei peringatan supayo tobo'o tobat kunei duso-duso tobo'o, teko ngen Allah, serto pecayo ngen Tuhan Yesus.

²²Uyo utuk taat ngen periteak Roh Sucai, uku lalau moi Yerusalem. Ngen uku coa namen jano de bakea tejijai ngen uku neak di.

²³Uku cuma namen bahwo neak tiep-tiep kota, Roh Sucai bi tegas melei namen ngen uku, bahwo uku bakea masuk sel ngen bakea saro.

²⁴ Tapi uku coa dulai ngen idupku yo, asal uku dapet semlesei tugas de Tuhan Yesus nelei ngen uku, asal uku setia sapei uku matei utuk melei namen Bito Baik o tetang anugrah Allah.

²⁵Uku bi magea udi kutene ngen bi melei namen kulo tetang awei ipe Allah meriteak sebagoi Rajo. Uyo uku meding coa bakea temau igai ngen udi.

²⁶Kerno o ngen tegas uku madeak ngen ko pado bilai yo bahwo amen ade neak antaro udi de matei be, do'o iso saleak ku.

²⁷Coa perneak uku lalai ngen tugasku utuk jemlas ngen udi kute rencano Allah.

²⁸Lokba udi jago dirai, jagoba kulo kute jemaat de sudo senreak Roh Sucai ngen ko utuk jenago; sebab udi coa naket jijai pengawas jemaat o. Lokba udi jemago jemaat Allah do'o awei gembala jemago dombane, kerno Allah bi jemijai jemaat o temuan-Ne suang liwet mateine Anok-Ne suang.

²⁹Sesudo uku lalau, pasti bakea teko serigala-serigala de buas moi tengeak-tengeak udi. Tun-tun de udi jago o bakea jijai mangsa serigala-serigala o.

³⁰Bahkan kunei antaro udi suang bakea ade tun-tun de bakea melei namen bito de coa benea. Tobo'o nea awei o kunyau tun-tun de sudo pecayo ngen Yesus jijai seset ngen temotoa tobo'o.

³¹Kerno o bejago-jagoba! Inget bahwo telau taun anne ngen dau bioa matai, pueng kelmen uku coa perneak bedan majea tiep tun kunei udi.

³²Uyo uku semreak udi ngen Allah kunyau Si de miaro udi, kunyau udi bepegong pado bito anugrah Allah. Allah temuan kuaso utuk kemuet udi, melei ngen ko berkat-berkat de sudo sendio-Ne utuk kute umat-Ne.

³³Ati perneak uku lok caci atau keracok kunei suang kulo.

³⁴Udi suang namen, bahwo ngen tenago uku suang uku kerjo utuk keperluanku ngen kekuatku de milau ngen uku.

³⁵Lem kute pekaro uku bi melei contoh ngen ko bahwo ngen kerjo awei yo ite harus temulung tun-tun de lemah. Kerno ite harus inget ngen jano de Tuhan Yesus suang bi nadeak, ‘Lebiak riang melei kunei pado mimo.’ ”

³⁶Sesudo Paulus selesei miling, si sujud ngen tobo'o kute lajau bedu'o.

³⁷Tobo'o kutene ngindoi samo megeb Paulus ngen mucep selamat jalan.

³⁸Tobo'o kebiak ibo, terutamo kerno Paulus madeak bahwo tobo'o coa bakea kemliak si igai. Lajau tobo'o mbesne sapei moi kepea.