Read Rejang KISAH RASUL-RASUL 27 Bible Online

KISAH RASUL-RASUL 27 - Rejang bible

KISAH RASUL-RASUL 27

¹Sesudo tentau bahwo keme bakea belayea moi Italia, mako Paulus ngen kekedau tun tahanan luyen senreak ngen suang perwira genne Yulius kunei pasukan Kaisar.

²Keme kenek debueak kepea kunei Adramitium de bakea berakat moi pelabuak-pelabuak neak di provinsi Asia, lajau keme lalau. Aristarkhus, suang Makedonia kunei Tesalonika, belayea kulo besamo-samo keme.

³Menne keme singgeak neak Sidon. Yulius melayan Paulus ngen baik sekilai, neluakne Paulus magea kekuatne, supayo tobo'o dapet melei keperluan Paulus.

⁴Kunei di keme temrus pemaneu, kerno ibut balawen arah ngen arah kepea, keme belayea te'us liwet pantai Siprus.

⁵Sesudo keme liwet laut de sekadep ngen Kilikia ngen Pamfilia lajau sapei neak Mira daerah Likia.

⁶Neak di perwira o temau debueak kepea kunei Aleksandria de lok belayea moi Italia. Si maliak keme moi kepea o.

⁷Kekedau bilai anne keme belayea, keme gesea coa sapei, ngen susah payeak akhirne keme sapei neak Knidus. Kerno cuaca masiak kidek, keme coa dapet temrus pemaneu keme, mako keme belayea moi Selatan Pulau Kreta liwet Tanjung Salmone supayo neak di keme telinduak kunei ibut.

⁸Ngen susah payeak keme belayea liwet pantai Pulau Kreta, akhirne keme sapei neak do penan de genne Pelabuak Ba'es, pa'ok kota Lasea.

⁹Sementaro o bi dau waktau de nyep. Bilai Puaso bi liwet, kembiak bahayo utuk temrus pelayaran. Kerno o Paulus minget tobo'o, nadeakne,

¹⁰“Pasuak-pasuak, uku kemliak bahwo pelayaran te bakea mbin saro ngen rugai lai, iso bae utuk muatan, kepea, tapi kulo utuk nyabai te.”

¹¹Tapi perwira o lebiak pecayo ngen juru mudi ngen nakhoda kunei pado kecek Paulus.

¹²Kerno pelabuak o coa cocok utuk belabuak selamo musim sengok, mako dau kunei tobo'o lebiak tujau utuk belayea te'us ngen berusaho utuk sapei neak kota Feniks utuk tinggea neak di selamo musim sengok. Kota Feniks adeba do pelabuak neak Pulau Kreta, de madep moi arah Barat Dayo ngen moi arah Barat Laut.

¹³Pado waktau o ibut kunei Selatan kembus ngen tenang. Tobo'o sako bahwo maksud tobo'o bi tau bakea tercapai. Tobo'o mukea jangkar, lajau belayea liwet patoi Kreta.

¹⁴Tapi coa an sesudo'o tu'unba kunei arah pulau o ibut lai, de senbut ibut, “Timur Laut.”

¹⁵Kepea keme nelago ibut. Kerno coa mukin kepea belayea te'us melawen ibut, mako keme nyereak bae ngen munyau kepea keme terombang-ambing.

¹⁶Keme telindung didik waktau keme liwet peak Selatan Pulau Kauda de titik o. Ngen payeak keme berasea kemuaso sekoci kepea keme.

¹⁷Sesudo sekoci kenek moi das kepea, tobo'o masang alat-alat penulung ngen melilit kepea o ngen tilai. Kerno saben terdampar neak dasar benei Sirtis, tobo'o temu'un layar ngen munyau kepea o terapung-apung bae.

¹⁸Ibut lai coa bedan, mako menne tobo'o muloi muang muatan kepea moi laut.

¹⁹Pado bilai de ketelau tobo'o muang alat-alat kepea ngen tangen tobo'o suang.

²⁰Kekedau bilai anne keme coa kemliak matai bilai ngen bitang, ibut lai te'us mengamuk. Akherne nyepba kute harapan keme utuk dapet semlamat dirai keme.

²¹Kerno tun-tun'o coa mukmei kekedau bilai anne, je ba Paulus neak tengeak-tengeak tobo'o ngen madeak, “Pasuak-pasuak, sekirone nasihatku tenotoa kunyau ite jibeak belayea kunei Kreta, ite coa meding saro ngen rugai awei yo!

²²Tapi uyo kulo uku minoi nien supayo udi tep semangat, kerno coa suang kulo neak antaro udi de bakea matei, kecuali kepea yo.

²³Kerno kelemen nano suang malaikat kunei Allah de uku sembeak, adeba Allah de temuan uku, teko ngen uku.

²⁴Malaikat o madeak, ‘Jibeak saben Paulus! Ko harus madep Kaisar. Sesungguakne kerno rahmat Allah ngen ko, mako kute tun de ade neak kepea besamo-samo ngen ko yo bakea selamat.’

²⁵Kerno o tepba semangat, Pasuak-pasuak! Kerno uku pecayo ngen Allah bahwo kutene pasti tejijai serai awei de nadeak malaikat pado ku.

²⁶Tapi ite bakea terdampar be neak saleak do pulau.”

²⁷Malem de ke pat belas bi sapei, keme masiak tep terombang-ambing neak Laut Adria. Tapi kekiro tengeak malem paro awak kepea meding bahwo tobo'o bi pa'ok da'et.

²⁸Lajau tobo'o mulua tilai ngen butau utuk mukur lemne laut. Ternyato penan o lemne kekiro pat puluak meter. Coa an sesudo'o tobo'o mukua igai, ternyato lemne kekiro telau puluak meter.

²⁹Tobo'o saben kepea bakea kandas neak butau karang, jijai tobo'o temu'un pat bueak sauh kunei bagian belakang kepea, keme kebiak ma'ep mudah-mudahan bilai gacang pueng.

³⁰Tapi paro awak kepea beusaho melilai dirai kunei kepea. Tobo'o temu'un sekoci ngen menea seolah-olah tobo'o lok temu'un sauh kunei adep kepea.

³¹Kerno o Paulus madeak ngen perwira, prajurit-prajuritne, “Amen tobo'o coa tinggea neak kepea, udi coa bakea selamat.”

³²Lajau prajurit-prajurit o mtok tilai sekoci, sehinggo sekoci o monot.

³³Ayok pueng, Paulus majok kute tun utuk mukmei, nadeakne, “Sudo pat blas bilai udi cuma mbot bae, maen nyemen ngen coa mbuk jejano.

³⁴Kerno o uku melei nasihat ngen udi, supayo udi mukmei kileak. Hal o perlu utuk keselamatannu. Kerno udi kutene bakea selamat ngen coa ku'ang jejano.”

³⁵Sesudo Paulus madeak awei o, si mok ruti, mucep syukur ngen Allah neak adep tobo'o kutene, mecuak-mecuakne, lajau muloi mbuk.

³⁶Mako tobo'o kute semangat igai ngen tobo'o milau kulo mbuk.

³⁷Jumleak keme kute de neak kepea o duai otos tujuak puluak num tun.

³⁸Sesudo kenyang, tobo'o muang muatan gendum moi laut supayo kepea jijai lengan.

³⁹Ketiko bilai muloi pueng, tobo'o kemliak daratan, tapi coa namen daratan jano do'o. Tobo'o kemliak debueak teluk ngen patoine. Tobo'o menea putusan amen dapet mbedan kepea neak di.

⁴⁰Mako tilai-tilai sauh notong lajau sauh-sauh o nunyau tendem moi laut. Sementaro o tobo'o mulua tilai-tilai kemudi, masang layar bagian muko, supayo ibut temuluk kepea o moi patoi.

⁴¹Tapi kepea o temumbua dasar benei, sehinggo kandasba kepea o. Bagian mukone kandas ngen coa begerok, bagian belakangne ajua nlatok ombak.

⁴²Prajurit-prajurit neak kepea o beniat utuk munuak kute tahanan, supayo jibeak ade suang tahanan de melilai dirai ngen ca'o berenang.

⁴³Tapi perwira o lok semlamat Paulus. Kerno o si temgeak tobo'o kemerjo niatne ngen melei periteak, supayo tun-tun de pacok berenang lebiak dute tejun moi laut ngen kenek moi da'et,

⁴⁴ngen supayo tun-tun luyen semsung ngen bepegong moi papen-papen atau pecahan kepea. Awei'oba tobo'o kute selamat kenek moi da'et.