Read Rejang KISAH RASUL-RASUL 5 Bible Online

KISAH RASUL-RASUL 5 - Rejang bible

KISAH RASUL-RASUL 5

¹Ade suang semanei de genne Ananias. Si ngen ngenyanne Safira jemuoa debidang taneak.

²Caci kunei jemuoa taneak o tengeakne si tema'en utuk diraine suang ngen de luyenne si semreak ngen rasul-rasul. Si menea o ngen ngenyanne namen.

³Mako Petrus madeak ngen si, “Ananias, getai ko munyau Iblis kemuaso atei nu, sapei ko mike ngen Roh Sucai, seca'o dediem tema'en utuk dirainu suang tengeak kunei caci jemuoa taneak o?

⁴Seke'an taneak o coa jenuoa, iso si do'o tep ko temuan, sesudo jenuoa, iso aseane o tep lem kuaso nu? Getai ko merencano plep o lem atei nu? Ko iso mike manusio, tapi mike Allah.”

⁵Waktau temi'uk kecek o, Ananias ubuak lajau matei. Kute tun de temi'uk tetang hal o jijai saben.

⁶Mako tun-tun uai teko mukus mayit Ananias, lajau mbinne moi luea utuk kenubuane.

⁷Kekiro telau jam sesudo'o ngenyanne masuk. Si coa namen jano de tejijai.

⁸Petrus madeak ngen si, “Cubo melei namen ngen uku: Jano taneak de ko ngen sematennu jenuoa o, kedau gone?” “Betoa, do'o gone,” jawab ngenyan Ananias.

⁹Lajau Petrus madeak ngen si, “Getai ko ngen sematennu sepakat utuk cemubo Roh Tuhan? Temi'ukba! Tun-tun de kemubua sematennu bi belek. Tobo'o bakea mbin ko moi luea kulo.”

¹⁰Waktau o kulo ngenyan Ananias o ubuak ngen matei neak adep Petrus. Waktau tun-tun uai o masuk, tobo'o temau si bi matei. Lajau tobo'o mbin mayitne moi luea ngen kemubuane neak depeak sematenne.

¹¹Mako kute tun-tun pecayo o ngen tun-tun luyenne, de temi'uk tetang hal o, jijai saben.

¹²Dau tando ngen mujizat de nea rasul-rasul neak antaro tun dau. Kute tun pecayo bogoa kopoa neak latet Salomo lem Bait Allah.

¹³Tun-tun luyen coa ade de binai bundok ngen tobo'o. Tapi tobo'o kembiak nego tun dau.

¹⁴Goyo an goyo betambeakba jumlah tun de pecayo ngen Tuhan, baik semanei jano selawei.

¹⁵Tobo'o mbin tun-tun bolon moi luea, moi dalen lai, gemulingne neak das penan tidua ngen neak tikea, supayo amen Petrus liwet, tobo'o paling didikne nam keno bayangan Petrus.

¹⁶Tun dau neak kota-kota neak rogok Yerusalem teko dedau serto mbin tun-tun de pasuk roh kidek. Ngen tun-tun o kena'en kutene.

¹⁷Akherne Imem Lai ngen kute tun penotoa-penotoane, adeba golongan tun-tun Saduki, muloi betindak kerno tobo'o iri atei.

¹⁸Rasul-rasul o tenakep, lajau nasuk moi lem sel umum.

¹⁹Tapi kelemenne, suang Malaikat Tuhan mukok bang-bang sel, lajau mbin rasul-rasul o moi luea. Malaikat o madeak ngen rasul-rasul o,

²⁰“Lalauba je neak Bait Allah ngen melei namenba ngen tun-tun tetang idup de belau yo.”

²¹Mako rasul-rasul o temotoa pesen malaikat o. Kekabuk nien tobo'o lalau moi Bait Allah ngen muloi ngajea neak di. Sementaro Imem Lai ngen tobo penotoane teko, lajau menea sidang mahkamah ngen tobo pemipin Yahudi. Sesudo'o tobo'o meluak tun lalau mok rasul-rasul o kunei sel utuk nembin madep tobo'o.

²²Tapi waktau tun-tun de neluak o sapei neak sel, tobo'o coa temau rasul-rasul o neak di. Jijai tobo'o belek, lajau melei namen hal o ngen mahkamah.

²³“Pado waktau keme sapei neak sel.” Nadeak tobo'o ngen mahkamah, “Keme kemliak bang sel o tekucai, ngen pengawal-pengawal gidong bejago neak bang. Tapi waktau keme mukok bang o, keme coa temau suang tun neak lem ne.”

²⁴Waktau pemipin pengawal Bait Allah ngen imem-imem kepalo temi'uk laporan o, tobo'o reyeng ngen rasul-rasul o ngen saben ngen jano de bakea tejijai.

²⁵Sesudo'o teko suang semanei mbin bito yo, “Ni'uk! Tun-tun de Tuan-tuan taen neak sel o uyo gidong ngajea tun dau neak Bait Allah!”

²⁶Sesudo'o lalauba pengawal serto tun-tunne moi Bait Allah, lajau mok rasul-rasul o, tapi coa ngen kekerasan, kerno tobo'o saben, jibeak-jibeak tun dau meluk tobo'o ngen butau.

²⁷Tobo'o mbin rasul-rasul o ngen madep tobo'o ngen mahkamah agamo. Lajau Imem Lai muloi temanye tobo'o.

²⁸ Nadeakne, “Keme sudo temgeak udi supayo jibeak ngajea tetang Tun o. Tapi uyo cubo kemliak jano de udi menea! Udi melei namen ajarannu o neak kota Yerusalem, udi malah lok temuduak bahwo kemeba de ijai sebab Tun o matei.”

²⁹Petrus ngen rasul-rasul de luyenne jemawab, “Keme arus temotoa Allah, iso temotoa manusio.

³⁰Yesus, de udi senalib, bi idup igai kunei mateine ngen Allah ninik puyang ite.

³¹Allah sudo melei ngen Si penan ngen kuaso de lekat awei Pemipin ngen Penyelamat; supayo bangso Israel nelei kesempatan utuk betobat kunei duso-dusone ngen dapet apun.

³²Kemeba saksai-saksai tetang kutene o — keme ngen kulo Roh Sucai de nelei Allah ngen tun-tun de temotoa periteak-Ne.”

³³Waktau anggota-anggota Mahkamah Agamo o temi'uk o, tobo'o mengiak nien, tobo'o sepakat utuk munuak rasul-rasul o.

³⁴Tapi neak antaro anggota-anggota mahkamah o ade suang Farisi genne Gamaliel. Si gu'au agamo de kembiak kute tun hormat. Si je lajau meluak tun mbin moi luea rasul-rasul o tegoa.

³⁵Sesudo'o si madeak ngen Mahkamah Agamo o, “Udi tun-tun Israel! Pekerba baik-baik tetang jano de bakea udi menea te'adep tun-tun yo.

³⁶Sebab bel o perneak ade Teudas, de manggap diraine tun pacok, sehinggo kekiro pat otos tun temotoa si. Tapi si nunuak tun ngen kute penotoane ce'ei ngen nyep.

³⁷Sesudo'o, pado waktau ade sensus, timboaba Yudas, tun kunei Galilea. Kerno pengaruhne, dau kulo tun de temotoane. Tapi si kulo matei ngen kute penotoa-penotoane ce'ei.

³⁸Kerno o uku madeak ngen udi: Jibeakba betindak jejano te'adep tun-tun yo. Nunyau bae tobo'o. Sebab amen ajaran ngen gerakan tobo'o adeba kunei manusio, mako ajaran ngen gerakan o bakea nyep.

³⁹Tapi amen do'o teko kunei Allah, mako udi-udi coa bakea dapet maleak tobo'o. Mukin bakea nyato bahwo udi-udi melawen Allah.” Nasehat Gamaliel tenimo Mahkamah.

⁴⁰Mako rasul-rasul o endeu, lajau nembas, sesudo'o, tobo'o mebebas.

⁴¹Rasul-rasul o teminggea Mahkamah Agamo ngen riang sebab Allah bi manggap tobo'o patut utuk dapet hino kerno Yesus.

⁴²Ngen tiep bilai neak Umeak Tuhan ngen neak umeak-umeak tun, tobo'o bogoa ngajea ngen melei namen Bito Baik tetang Yesus bahwo Siba Rajo Penyelamat de jenanjai o.