Read Rejang KISAH RASUL-RASUL 8 Bible Online

KISAH RASUL-RASUL 8 - Rejang bible

KISAH RASUL-RASUL 8

¹Saulus kulo tujau ngen pembunuhan Stefanus. Pado waktau o muloiba penganiayaan de kembiak kejam te'adep jemaat neak Yerusalem. Tobo'o kute, kecuali Rasul-rasul, tesebea moi kute daerah Yudea ngen Samaria.

²Tun-tun saleh kemubua mayit Stefanus serto mindoine ngen kembiak.

³ Tapi Saulus bogoa bae berusaho majua jemaat. Si lalau kunei umeak moi umeak ngen seme'et moi luea tun-tun masai, lajau mbin masuk tobo'o moi lem penjara.

⁴Tun-tun pecayo de sudo tesebea o melei namen Bito Baik kunei Allah o moi ipe-ipe.

⁵Filipus lalau moi do kota neak Samaria ngen melei namen ngen tun-tun neak di tetang Rajo Penyelamat de jenanjai Allah.

⁶Ketiko tun-tun temi'uk Filipus miling ngen tobo'o kemliak tando-tando de nea ne, dau kunei tobo'o de kemliak jano de nadeak Filipus.

⁷Sebab roh-roh kidek sudo keluea ngen mekik kunei dau tun de pasuk semat. Tun-tun pakuak ngen tipang kulo dau de kena'enne.

⁸Mako tun-tun neak kota o riang sekilai.

⁹Neak kota o ade suang semanei de genne Simon, de sudo kekedau waktau anne menea tun-tun Samaria takjub bakea lemau sihirne. Si madeak ngen tobo'o bahwo si tun de luea biaso.

¹⁰Kute tun, lai titik, temotoa si ngen madeak, “Tun yo adeba kuaso Allah de senbut Kuaso Lai.”

¹¹Tobo'o temotoa ne, kerno sudo an si menakjubkan tobo'o ngen sihirne.

¹²Tapi uyo tobo'o pecayo ngen Filipus de melei namen Bito Baik tetang Allah meriteak sebagai Rajo, tetang gen Yesus Kristus, Tobo'o dibaptis, baik semanei kulo selawei.

¹³Simon suang kulo pecayo. Sesudo dibaptis si bogoa temotoa Filipus. Si takjub ketiko si kemliak tando-tando, mujizat-mujizat lai de tejijai.

¹⁴Ketiko rasul-rasul neak Yerusalem temi'uk bahwo taneak Samaria bi temimo firman Allah, tobo'o mutus Petrus, Yohanes moi mindi.

¹⁵Ketiko sapei neak di keduai rasul o bedu'o, supayo tun-tun Samaria o dapet Roh Sucai.

¹⁶Sebab Roh Sucai ati tu'un neak das suang kulo neak antaro tobo'o, kerno tobo'o tembei dibaptis lem gen Tuhan Yesus.

¹⁷Sesudo keduaine mpek tangen neak das tobo'o, lajau tobo'o temimo Roh Sucai.

¹⁸Simon kemliak bahwo kerno tangen rasul-rasul neltok moi das tun-tun o, Roh Sucai nelei ngen tobo'o. Kerno o Simon mbin caci ngen Petrus ngen Yohanes.

¹⁹Simon madeak, “Neleiba ngen uku kuaso o kulo supayo amen tangen uku neltok pado api bae, tun o bakea temimo Roh Sucai.”

²⁰Tapi Petrus jemawab, “Celakoba ko ngen cacinu! Ko kiro pelei Allah dapet nukua ngen caci?

²¹Ko coa temuan hok utuk milem neak lem kerjo keme, sebab ateinu coa benea te'adep Allah.

²²Sebab o teninggeaba maksudnu de kidek o, ngen minoiba ngen Tuhan supayo Si mapun pekerannu de kidek o!

²³Sebab uku namen ko penuak ngen kidek atei ngen nudok ngen kejahatan.”

²⁴Lajau Simon madeak ngen Petrus ngen Yohanes, “Tulungba minoi ngen Tuhan supayo coa do kulo kunei pepasuak nadeak o tejijai padoku.”

²⁵Sesudo keduaine besaksai ngen melei namen firman Tuhan, belekba tobo'o moi Yerusalem. Lem pemaneune o tobo'o melei namen Bito Baik lem dau sadei neak Samaria.

²⁶Suang malaikat Tuhan madeak ngen Filipus, “Maro berakat! Lalauba moi arah Selatan moi dalen de mubung Yerusalem ngen Gaza.” Dalen o sunyai.

²⁷Lajau Filipus klongon ngen berakat. Adeba suang Etiopia, suang pejabat istana, suang pegawai lekat, kepalo perbendaharaan Sri Kandake, ratu negrai Etiopia. Lajau tun moi Yerusalem utuk semyang.

²⁸Tun o gidong lem pemaneu belek ngen temot lem keritane samo mbaco Kiteb Nebai Yesaya.

²⁹Lajau nadeak Roh ngen Filipus, “Lalauba moi mindi ngen na'okba kerita o!”

³⁰Filipus lalau ma'ok kerita o, lajau si temi'uk tun o mbaco Kiteb Nebai Yesaya. Filipus betanye ngensi, “Jano Tuan ngertai de Tuan baco o?”

³¹Tun o jemawab, “Awei ipe uku ngertai, amen coa ade de jemlasne ngenku?” Lajau si majok Filipus kenek moi kerita ngen temot besamo-samo si.

³² Dioba ayat-ayat de si baco o, “Si awei bebirai de ni'ing utuk senbeliak, awei anok bebirai de coa ngembek amen bulaune genuting, awei'oba Si coa mucep depateak kecek kulo.

³³Lem hino-Ne, keadilan coa nelei ngen-Si. Api de bakea cemrito asal usul-Ne? Sebab nyabai-Ne nemok kunei bumai.”

³⁴Lajau nadeak pejabat istana o ngen Filipus, “Uku betanye ngenko, tetang api nebai madeak aweiyo? Tetang diraine suang jano tetang tun luyen?”

³⁵Filipus kulo muloi miling ngen betulok kunei ayat o si melei namen Bito Baik tetang Yesus ngensi.

³⁶Tobo'o melanjut pemane tobo'o, sapei neak do penan de ade bioa. Lajau nadeak pejabat istana o, “Keliak, neak di ade bioa; jano ade halangan bagiakku utuk dibaptis?” [

³⁷Simbet Filipus, “Amen Tuan pecayo ngen segenep atei, buliak.” Jawabne, “Uku pecayo bahwo Yesus Kristus adeba Anok Allah.”]

³⁸Tun Etiopia o meluak medan kerita o, keduaine tu'un moi lem bioa, baik Filipus kulo pejabat istana o, lajau Filipus membaptis si.

³⁹Sesudo tobo'o keluea kunei bioa, Roh Tuhan tetibo mbin Filipus lalau, pegawai istana o coa kemliakne igai. Si kembiak riang temrus pemaneune.

⁴⁰Filipus sudo ade neak Asdod. Si paneu liwet daerah o samo melei namen Bito Baik neak kute kota sapei si teko neak Kaisarea.