Read Rejang KISAH RASUL-RASUL 9 Bible Online

KISAH RASUL-RASUL 9 - Rejang bible

KISAH RASUL-RASUL 9

¹Sementaro o atei Saulus masiak bae lok macam, munuak murid-murid Tuhan Yesus. Si madep Imem Lai,

²minoi su'et kuaso utuk nembin moi pemipin-pemipin umeak-umeak semyang tun Yahudi neak Damsyik, supayo amen si temmau neak di tun-tun de pecayo ngen Yesus, si dapet temakep tobo'o lajau mbin tobo'o moi Yerusalem.

³Lem pemaneune moi Damsyik, ketiko si sudo pa'ok kota o, tetibo cahayo besinea kunei lenget kemliling Saulus.

⁴Si us moi taneak lajau temi'uk do sa'ei madeak ngensi, “Saulus, Saulus! Jano sebabne ko semikso Uku?”

⁵Jawab Saulus, “Api Ko, Tuan?” Nadeak-Ne, “Ukuba Yesus de ko semikso o.

⁶Tapi klongonba, lalauba moi lem kota. Neak di bakea nadeak ngenko, jano de harus ko menea.”

⁷Tun-tun de milem besamo-samo Saulus tekanjet sehinggo coa dapet besa'ei; kerno tobo'o temi'uk sa'ei o tapi coa kemliak suang kulo.

⁸Saulus klongon, lajau mukok mataine, tapi si coa dapet kemliak jejano; tobo'o harus mapeak si masuk moi Damsyik.

⁹Selamo telau bilai si coa dapet kemliak, selamo o kulo si cao mukmei, menem.

¹⁰Neak Damsyik ade suang murid Tuhan Yesus de genne Ananias. Neak lem do pengeliak, Tuhan miling ngensi. Tuhan madeak, “Ananias!” Ananias jemawab, “Uku Tuhan.”

¹¹Tuhan madeak, “Maro berakat uyo. Lalauba moi umeak Yudas neak Dalen Lu'us. Tanye neak di tun de genne Saulus de asalne kunei kota Tarsus. Tun o gidong bedu'o,

¹²neak lem do penglihatan si kemliak suang semanei, de genne Ananias, teko ngensi lajau meltok tangen moi dasne supayo si dapet kemliak igai.”

¹³Ananias jemawab, “Tuhan, uku sudo temi'uk dau tun miling tetang tun yo, te'utamo tetang penganiayaan-penganiayaan de si menea te'adep umat-Nu neak Yerusalem.

¹⁴Igai kulo neak yo si temuan kuaso kunei imem-imem kepalo utuk temakep kute tun de menok gen-Nu.”

¹⁵Tuhan madeak ngensi, “Lalauba, sebab tun yo adeba alat piliak bagiak-Ku utuk melei namen gen-Ku neak adep bangso-bangso luyen serto rajo-rajo ngen tun-tun Israel.

¹⁶Uku suang bakea temunjuk ngensi kute penderitaan de harus si tanggung kerno Uku.”

¹⁷Mako Ananias kulo lalau moi umeak o lajau meltok tangenne moi das Saulus. “Pasuak Saulus,” nadeak Ananias, “Tuhan Yesus de udi keliak neak tengeak dalen ketiko Pasuak gidong miyo, Siba de meluak uku teko supayo Pasuak nam kemliak igai, ngen penuak Roh Sucai.”

¹⁸Saat o kulo sesuaktau de awei sisik kan telpas kunei matai Saulus, si dapet kemliak igai. Mako si kulo klongon lajau dibaptis.

¹⁹Sesudo si mukmei, si jijai kuet igai. Saulus tinggea kekedau bilai besamo-samo murid-murid Yesus neak Damsyik.

²⁰Si lasung lalau moi umeak-umeak semyang muloi melei namen bahwo Yesus do'oba Anok Allah.

²¹Kute tun selle temi'uk Saulus. Tobo'o madeak, “Tun yo neak Yerusalem sudo munuak kute tun de pecayo ngen Yesus. Si teko moi miyo kerno utuk temakep lajau mbin tobo'o moi adep imem-imem kepalo!”

²²Tapi Saulus lebiak kuet pengaruhne. Bukti-bukti de si nadeak tetang Yesus kembiak benea bahwo Yesus do'oba Rajo Penyelamat, sapei tun-tun Yahudi de tinggea neak Damsyik coa dapet igai mbantah.

²³ Sesudo liwet kekedau anne tun-tun Yahudi sepakat utuk munuak Saulus.

²⁴Tapi maksud kidek o Saulus namen. Lueng kelmen tun-tun Yahudi mbot neak bang gerbang kota utuk munuak si.

²⁵Tapi pado do kelmen, penotoa-penotoa Saulus mok si, lajau temu'unne neak lem do rago liwet tembok kota.

²⁶Saulus lalau moi Yerusalem, neak di si berusaho begabung ngen murid-murid Yesus. Tapi tobo'o saben ngensi, sebab tobo'o coa pecayo bahwo si benea-benea bi jijai murid Yesus.

²⁷Sesudo'o Barnabas teko ngensi, lajau mbinne ngen rasul-rasul. Barnabas cemrito ngen tobo'o tetang aweiipe Saulus kemliak Tuhan neak tengeak dalen, aweiipe Tuhan miling ngensi. Barnabas melei namen kulo tetang aweiipe binaine Saulus majea neak Damsyik lem gen Yesus.

²⁸Mako o Saulus tinggea besamo tobo'o, binai bekhotbah neak kute Yerusalem lem gen Tuhan.

²⁹Saulus miling ngen bedebat kulo ngen tun-tun Yahudi de makei bahaso Yunani, tapi tobo'o berusaho munuak si.

³⁰Ketiko tun-tun pecayo luyenne namen tetang hal o, tobo'o mbin Saulus moi Kaisarea, sesudo'o mbo si moi Tarsus.

³¹Mako jemaat neak kute Yudea, Galilea, Samaria jijai aman. Roh Sucai temulung, tobo'o idup lem saben bakea Tuhan, jemaat-jemaat o betambeak kuet, betambeak dau.

³²Petrus lalau moi ipe-ipe magea jemaat-jemaat. Pado do bilai si magea umat Tuhan de tinggea neak Lida.

³³Neak di si temau suang semanei de genne Eneas, de pakuak sudo lapen taun, coa nam klongon kunei penan tiduane.

³⁴Petrus madeak ngen Eneas, “Eneas, Yesus Kristus kema'en ko. Klongonba lajau mberes penen tiduanu.” Saat o kulo Eneas klongon.

³⁵Kute penduduk neak Lida, Saron kemliak Eneas, lajau tobo'o kutene pecayo ngen Tuhan.

³⁶Neak Yope ade suang selawei de genne Tabita — lem bahaso Yunani Dorkas. Selawei o dau sekilai menea baik ngen melei sedekeak.

³⁷Tapi pado waktau o si bolon lajau meninggea. Sesudo'o jenazahne endai, si neltok neak kamar de neak das.

³⁸Yope coa seberapo uak kunei Lida. Jijai pado waktau murid-murid Yesus neak Yope temi'uk Petrus ade neak Lida, tobo'o mbo duai tun lalau ngen Petrus melei pesen yo, “Gacang-gacangba teko miyo.”

³⁹Petrus lasung klongon lajau temotoa tobo'o. Sapeine neak di, si nembin moi bilik de neak das. Kute jando neak di gemlung Petrus samo ngindoi lajau temunjuk ngensi bajau-bajau, jubah de endet Dorkas utuk tobo'o waktau si masiak idup.

⁴⁰Petrus meluak tobo'o kutene keluea, lajau si sujud ngen bedu'o. Sesudo'o si madep jenazah Dorkas lajau madeak, “Tabita, klongon!” Mako Dorkas mukok matai ketiko si kemliak Petrus, si temot.

⁴¹Lajau Petrus megong tangenne lajau temulung si je. Sesudo'o Petrus menok tun-tun pecayo neak di sesamo jando-jando o, lajau semreak Dorkas de sudo idup o ngen tobo'o.

⁴²Bito tetang kejijai o tesebea moi kute Yope, sehinggo dau tun pecayo ngen Yesus sebagai Rajo Penyelamat tobo'o.

⁴³Petrus tinggea neak di kekedau bilia igai neak umeak suang pengrajin babok de genne Simon.