Read Rejang ROMA 1 Bible Online

ROMA 1 - Rejang bible

ROMA 1

¹Saudaro-saudaro kute neak Roma de kenasiak Allah ngen de sudo nok Allah utuk jijai umat-Ne. Allah sudo miliak ngen maket uku khusus utuk melei namen Bito Baik kunei Allah.

²Bito Baik o sudo jenanjai-Ne ayokne liwet nebai-nebai-Ne lem Kiteb Sucai.

³Bito Baik o tetang Anok Allah, Tuhan ite Yesus Kristus. Seca'o manusiawi, Si adeba royot Daud,

⁴tapi seca'o ilahi ternyato adeba Anok Allah. Do'o tebukti ngen kuaso de luea biaso liwet idup-Ne igai kunei matei.

⁵Liwet Si kulo Allah melei ngen uku karunio jijai rasul, supayo uku — utuk menghormati Kristus — mbimbing tun-tun kunei kute bangso supayo pecayo ngen taat.

⁶Maksud kunei kute bangso adeba udi kulo de ade neak Roma; udi kulo bi nok utuk jijai umat Yesus Kristus.

⁷Do'o sebabne uku temulis ngen udi. Semoga Allah Bapa ite ngen Tuhan Yesus melei berkat ngen sejahtera ngen udi.

⁸Pertamo-tamo liwet Yesus Kristus, uku mucep syukur ngen Allah kerno Saudaro-saudaro kutene, sebab kute dunio bi temi'uk bahwo udi pecayo nien ngen Kristus.

⁹Uku bogoa minget udi amen uku bedu'o. Allah saksaine bahwo jano de uku madeak o benea. Siba Allah de uku melayan sepenuak atei ngen melei namen Bito Baik tetang Anok-Ne.

¹⁰Uku bedu'o, supayo ngen kelok Allah uku akhirne dapet kesepatan utuk semulau udi.

¹¹Sebab uku lok kemliak udi utuk melei karunio rohani ngen udi utuk kemuet udi,

¹²adeba, supayo uku ade neak antaro udi ngen sesamo riang kerno imen ite, baik imennu atau imenku.

¹³ Saudaro-saudaro, uku lok, supayo udi namen, bahwo uku bi cet beniat utuk teko ngen udi — tapi sapei uyo ade bae halangan — kunyau neak tengeak-tengeak udi uku dapet aseane, awei kulo neak tengeak-tengeak bangso iso Yahudi de luyen.

¹⁴Uku ade kewajiban ngen tun Yunani, atau tun iso Yunani, baik ngen tun terpelajar, atau ngen tun de coa terpelajar.

¹⁵Do'oba sebabne uku lok melei namen Bito Baik ngen udi de tinggea neak Roma.

¹⁶ Sebab uku temuan keyakinan de kuet lem Bito Baik o, kerno Bito Baik adeba kekuatan Allah de semlamat tiep tun de pecayo, pertamo-tamo tun Yahudi, tapi kulo tun Yunani.

¹⁷ Sebab neak lemne nyato kebenaran Allah, de bertolak kunei imen ngen mipin imen, awei ade tetulis, “Tun benea bakea idup ngen imen.”

¹⁸Kunei surgo Allah kemten murko-Ne teadep kute duso ngen kejahatan manusio, sebab kejahatan menghalangi manusio utuk kemnal ajaran benea tetang Allah.

¹⁹Jano de dapet tobo'o namen tetang Allah nyato utuk tobo'o, sebab Allah bi kemtenne ngen tobo'o.

²⁰Sebab jano de coa keten kunei pado-Ne, adeba kekuatan-Ne de kekal ngen keilahian-Ne, dapet keten ngen pekeran kunei karya-Ne sejok dunio ceniptone, sehinggo tobo'o coa temuan alasan.

²¹ Sebab kunyau tobo'o kemnal Allah, tobo'o coa memuliakan Si sebagai Allah atau mucep syukur ngen Si. Sebelekne pekeran tobo'o jijai sio-sio ngen atei tobo'o de bodong jijai kelem.

²²Tobo'o menea seolah-olah tobo'o penuak hikmat, tapi tobo'o jijai bodong.

²³ Tobo'o gemitei kemuliaan Allah de coa fana ngen gambaran de awei manusio de fana, burung-burung, benatang-benatang de kekea pat atau benatang-benatang merayap.

²⁴Kerno o Allah semreak tobo'o ngen kelok atei tobo'o ngen kecemaran, sehinggo tobo'o sesamo mencemarkan awok tobo'o,

²⁵Sebab tobo'o gemitei kebenaran Allah ngen dusta, mujai ngen nyembeak makhluk ngen coa tinget Penciptane de harus nujai selamo-lamone, amin.

²⁶Kerno manusio menea de awei yo, mako Allah munyau tobo'o temurut nafsu tobo'o de hino. Selawei-selawei tobo'o coa lok igai ngen semanei-semanei awei de lazimne pado manusio.

²⁷Semanei kulo awei'o; tobo'o coa lok igai behubungan ngen selawei tapi ngen sesamo semanei. Semanei menea plep de semelek teadep sesamo semanei, sehinggo tobo'o temimo pembalasan de setimpal ngen plep tobo'o de kidek.

²⁸Sebab manusio coa meraso perlu kemnal Allah, mako Allah munyau pekeran tobo'o jijai usak, sehinggo tobo'o menea hal-hal de tobo'o coa buliak menea.

²⁹Atei tobo'o penuak ngen kute de kidek, serakah, kidek atei, munuak, belago, ngike dendem. Tobo'o galok madeak tun luyen,

³⁰galok ngupet; tobo'o ombong ngen ku'ang ajea, jengik ngen Allah ngen galok ngike. Tobo'o pacok neak lem kejahatan ngen coa taat ngen tun tuai;

³¹coa ade akea, coa setia, coa ade perasaan, coa namen belas kasiak.

³²Sebab kunyau tobo'o namen tuntutan-tuntutan hukum Allah, adeba bahwo tiep tun de menea hal-hal o, patut nukum matei, tobo'o iso bae meneane suang, tapi tobo'o kulo tujau ngen tobo'o de meneane.