Read Rejang ROMA 11 Bible Online

ROMA 11 - Rejang bible

ROMA 11

¹ Mako uku betanye: Jano mukin Allah bi coa temimo umat-Ne? Coa samo sekilai! Kerno uku su'ang kulo tun Israel, kunei royot Abraham, kunei sukau Benyamin.

²Allah iso coa temimo umat-Ne de niliak-Ne. Atau udi coa namen, jano de nadeak Kiteb Sucai tetang Elia, waktau si ngadau Israel ngen Allah:

³ “Tuhan, nebai-nebai-Nu bi tobo'o munuak, mezbah-mezbah-Nu bi tobo'o majaune; cuma uku su'ang diraiba de masiak idup ngen tobo'o lok mok nyabaiku.”

⁴ Tapi, awei ipe firman Allah ngen si? Jemawab Allah, “Uku masiak teminggea tujuak ribau tun bagiak-Ku, de coa perneak sujud nyembeak Diwo Baal.”

⁵Awei o kulo pado waktau yo ade tinggea do sisa, temurut pilihan kasih karunio.

⁶Tapi amen hal o tejijai kerno kasih karunio, mako iso igai kerno plep, sebab amen coa awei o, mako kasih karunio o iso igai kasih karunio.

⁷Jijai awei ipe? Israel coa dapet jano de nesoane, tapi tun-tun de terpiliak bi dapetne. Ngen tun-tun de luyenne bi teguak ateine.

⁸ Awei ade tetulis, “Allah bi menea tobo'o tidua teklep, melei matai utuk coa ngeliak ngen ti'uk utuk coa temi'uk, sapei ngen bilai uyo yo.”

⁹ Ngen Daud madeak: “Kunyauba pesta-pesta tobo'o jijai tanjoa penyesatan ngen balasan utuk tobo'o.

¹⁰Ngen kunyauba matai tobo'o jijai kelem, sehinggo tobo'o coa ngeliak, ngen neaba kedong tobo'o bogoa bukuk.”

¹¹Mako uku betanye: Jano tobo'o tatuk ngen harus us? Coa samo sekilai! Tapi kerno pelanggaran tobo'o, keselamatan bi sapei ngen bangso-bangso luyen, supayo menea tobo'o nyebu'au.

¹²Sebab amen pelanggaran tobo'o temuan tai kekayaan bagiak dunio, ngen kekurangan tobo'o kekayaan bagiak bangso-bangso luyen, lebiak-lebiak igai kesempurnaan tobo'o.

¹³Uku madeak ngen udi, hoi bangso-bangso iso Yahudi. Justru kerno uku adeba rasul utuk bangso-bangso iso Yahudi, uku kembiak mego tugas ku.

¹⁴Uku ma'ep tun-tun do bangsoku bakea kidek atei sehinggo ngen awei yo pa'ok kunei tobo'o dapet selamat.

¹⁵Kerno Allah coa temimo tobo'o, mako hubungan dunio ngen Allah jijai baik igai, jano igai amen tobo'o tenimo Allah! Paset bae do'o serai awei tun matei idup igai!

¹⁶Amen ruti de pertamo adeba sucai, mako kute adonan kulo sucai, ngen amen balet pun adeba sucai, mako dan-danne kulo sucai.

¹⁷Kerno o amen kekedau dan bi natiak ngen udi sebagai sping bi cenakuk neak antarone ngen dapet bagian lem balet pun zaitun de penuak geteak,

¹⁸jibeakba udi bangga teadep dan-dan o! Amen udi bangga, tingetba, bahwo iso udi de melei mbuk balet o, tapi balet o de melei kembuk udi.

¹⁹Mukin udi bakea madeak: “Ade dan-dan de natiak, supayo uku bi cenakuk neak antarone sebagai sping.”

²⁰Baikba! Tobo'o natiak kerno tobo'o coa pecayo, ngen udi idup kerno imen. Jibeakba udi ombong, tapi sabenba!

²¹Sebab amen Allah coa sayang ngen dan-dan asli, Si kulo coa bakea sayang ngen udi.

²²Sebab o kemliakba kemurahan Allah ngen kulo kekerasan-Ne, adeba kekerasan teadep tun-tun de sudo us, tapi das udi kemurahan-Ne, adeba amen udi tep lem kemurahan-Ne; amen coa, udi kulo coa bakea tentok.

²³Tapi tobo'o kulo bakea bi cenakuk igai, amen tobo'o coa tep coa pecayo, sebab Allah bekuaso utuk cemakuk tobo'o igai.

²⁴Sebab amen udi bi tentok sebagai dan kunei pun zaitun liar, ngen belawen ngen keadaannu o udi bi cenakuk neak pun zaitun sejati, lebiak igai tobo'o yo, de temurut asal tobo'o bakea cenakuk neak pun zaitun tobo'o su'ang.

²⁵Sebab, saudaro-saudaro, supayo udi jibeak manggap dirainu pacok, uku lok udi namen resio yo: Pa'o kunei Israel bi jijai telok atei sapei jumleak de penuak kunei bangso-bangso luyen bi masuk.

²⁶ Ngen awei o kute Israel bakea senlamat, awei ade tetulis, “Kunei Sion bakea teko Rajo Semlamat; Si bakea semikir kute kejahatan kunei anok-anok Yakub.

²⁷ Ngen dioba janjai-Ku ngen tobo'o, amen Uku mapus duso tobo'o.”

²⁸Kerno tun Yahudi coa lok temimo Bito Baik kunei Allah, mako tobo'o jijai musuak Allah; justru do'o jijai utung utuk Saudaro-saudaro de iso Yahudi. Tapi kerno piliak Allah, mako tun-tun Yahudi o tep Allah kasihi utuk ninik puyang tobo'o.

²⁹Sebab amen Allah miliak tun ngen memberkati tun o, Allah coa perneak mbuye jano de sudo nea ne.

³⁰Sebab serai awei udi bel'o coa taat ngen Allah, tapi uyo dapet kemurahan kerno tun Yahudi coa taat.

³¹Awei o kulo tobo'o uyo coa taat, supayo kerno kemurahan de sudo udi dapet, tobo'o kulo bakea dapet kemurahan.

³²Sebab Allah bi kem'ung kute tun lem ketidaktaatan, supayo Si dapet kemten kemurahan-Ne das tobo'o kute.

³³ Padeak hebatne kekayaan, hikmat ngen pengetahuan Allah! Sungguak coa dapet senlidik keputusan-Ne ngen sungguak coa dapet ngertai dalen-dalen-Ne!

³⁴ Sebab, api de namen pekeran Tuhan? Atau api de perneak jijai penasehat-Ne?

³⁵Atau api de perneak melei sesuaktau ngen-Si, sehinggo Si harus gemiteine?

³⁶ Allah de menea kute sesuaktau. Kutene kunei Allah. Kutene utuk Allah. Tepujaiba Allah utuk selamo-lamone! Amin.