Read Rejang ROMA 16 Bible Online

ROMA 16 - Rejang bible

ROMA 16

¹Uku lok melei namen saudari ite, Febe. Si temulung jemaat neak Kengkrea.

²Temimoba si sebagai saleak su'ang kunei umat Tuhan. Memang awei'oba tun-tun de pecayo ngen Allah harus temimo do ngen de luyen. Tulungba si, amen si perlu batuan kunei udi, kerno si su'ang bi temulung dau tun — termasuk uku.

³ Semapei salamku ngen Priskila ngen Akwila, kekuat uku de samo-samo kerjo utuk Kristus Yesus.

⁴Tobo'o gesea matei kerno lok semlamat uku. Uku mokasiak ngen tobo'o — ngen iso uku bae, tapi kute jemaat bangso luyen de iso Yahudi kulo mokasiak ngen tobo'o.

⁵Semapeiba kulo salam uku ngen jemaat de bekopoa neak umeak tobo'o. Salam ngen Epenetus de uku kasihi. Siba tun de pertamo-tamo pecayo ngen Kristus neak daerah Asia.

⁶Salam uku kulo ngen Maria. Si bi kerjo keras utuk udi.

⁷Semapei kulo salamku ngen Andronikus ngen Yunias. Tobo'o do sukau bangso ngen uku, ngen perneak masuk sel besamo-samo uku. Ayok uku pecayo ngen Kristus, tob'o bi lebiak dute pecayo. Tobo'o terkenal neak antaro para rasul.

⁸Salam ngen Ampliatus, de uku kasihi kerno si samo-samo ngen uku bi jijai do ngen Tuhan.

⁹Semapei hormat uku ngen Urbanus, kuat ite de bekerjo besamo-samo ngen ite utuk Kristus. Kulo hormatku ngen Stakhis de uku kasihi.

¹⁰Salam ngen Apeles. Kesetiaanne ngen Kristus bi terbukti. Salam kulo ngen keluargo Aristobulus,

¹¹ngen Herodion. Si do sukau bangso ngen uku. Kulo salam ngen saudaro-saudaro do imen lem keluargo Narkisus.

¹²Salam uku ngen Trifena ngen Trifosa de bekerjo keras melayan Tuhan, ngen Persis de uku kasihi. Si kulo bi kerjo keras utuk Tuhan.

¹³ Salam utuk Rufus ngen indokne, de bagiakku awei indokku su'ang, Rufus adeba tun piliak Tuhan de tepujai.

¹⁴Semapeiba salam uku ngen Asinkritus, Flegon, Hermes, Patrobas, Hermas, ngen kute saudaro do imen de besamo-samo ngen tobo'o.

¹⁵Salam ngen Filologus ngen Yulia; ngen Nereus ngen saudaro selaweine; ngen Olimpas ngen kute tun pecayo de besamo-samo ngen tobo'o.

¹⁶Bersalam-salamba seca'o mesra sebagai saudaro Kristen. Kute jemaat Kristus semapei salam tobo'o ngen Saudaro-saudaro.

¹⁷Saudaro-saudaro! Uku minoi nien: Teateiba teadep tun-tun de menea perpecahan ngen kemacau kepercayaan tun ngen Tuhan. Hal o bertentangan ngen jano de sudo najea ngen udi. Ne'uakba tun-tun awei o.

¹⁸Sebab tun-tun de menea awei o iso bekerjo utuk Kristus Tuhan ite, tapi utuk menea kelok atei tobo'o su'ang jijai puas. Ngen bujukan, kecek-kecek de mis, tobo'o mike tun-tun de coa namen jejano.

¹⁹Kute tun bi namen bahwo udi setia ngen ajaran tetang Bito Baik de kunei Allah. Ngen uku senang das hal o tetang udi. Uku lok supayo udi bijaksana tetang hal-hal de baik, ngen ubo tetang hal-hal de kidek.

²⁰Allah de melei sejahtera ngen manusio, bakea segro mpek Iblis neak beak kuasonu ngen majuane. Semoga Saudaro-saudaro bogoa diberkati Yesus Kristus Tuhan ite!

²¹ Timotius, kuatku, semapei salamne ngen udi. Awei o kulo Lukius, Yason ngen Sosipater, de do sukau bangso ngen uku.

²²De temulis su'et yo adeba uku, Tertius. Uku mucep salam persaudaraan ngen udi.

²³ Gayus mbo salam ngen udi. Uku nupang neak umeakne ngen jemaat keme kulo berbakti neak di. Erastus, pemipin keuangan kota, mbo salamne ngen udi. Awei o kulo saudaro ite Kwartus. [

²⁴Semoga Tuhan ite Yesus Kristus melei berkat ngen Saudaro kutene. Amin.]

²⁵Tepujaiba Allah! Si bekuaso kemuet imen Saudaro sesuai ngen Bito Baik kunei Allah de uku melei namen tetang Yesus Kristus. Uku melei namen bito o sesuai ngen jano de nelei namen Allah; adeba tetang rencano Allah de sudo berabad-abad anne coa tun namen.

²⁶Tapi uyo, das periteak Allah de abadi, rencano o bi nadeak ngen nelei namen ngen kute bangso liwet tulisan-tulisan tobo nebai, supayo tobo'o kutene pecayo, taat ngen Allah.

²⁷Siba do-done Allah, Si mahabijaksana. Semoga Si jenunjung selamo-lamone liwet Yesus Kristus! Amin. Hormat keme, Paulus, hamba Kristus Yesus