Read Rejang ROMA 2 Bible Online

ROMA 2 - Rejang bible

ROMA 2

¹ Kerno o, Saudaro-saudaro, api bae udi, de mukum tun luyen, ko suang coa bebas kunei saleak. Sebab, lem mukum tun luyen, ko mukum dirainu suang, kerno ko de mukum tun luyen, menea hal-hal de serai.

²Tapi ite namen, bahwo Allah melei hukuman seca'o jujur das tobo'o de menea awei o.

³Ngen ko, saudaro-saudaro, ko lok mukum tobo'o de menea awei o, tapi ko suang meneane kulo, jano ko peker bahwo ko bakea bebas kunei hukuman Allah?

⁴Jano ko lok manggap mudeak kekayaan kemurahan-Ne, kesabaran-Ne ngen kelapangan atei-Ne? Jano udi coa namen, bahwo maksud kemurahan Allah adeba menea udi jijai tobat?

⁵Tapi udi telo ulau ngen coa lok tobat, udi suangba de menea hukuman udi jijai tambeak benek pado Bilai Kiamat, amen Allah kemten murka-Ne ngen melei hukuman de adea.

⁶ Sebab Allah bakea males tiep tun setimpal ngen plepne.

⁷Allah melei idup kekal ngen tobo'o de taat menea de baik, mesoa kemuliaan, kehormatan ngen de kekal.

⁸Allah murka ngen tobo'o de mesoa kepetingan suang, de coa taat ngen kebenaran, tapi taat ngen kelaliman.

⁹Derito ngen saro bakea neding tun de idup de menea kejahatan, pertamo-tamo tun Yahudi ngen iso Yahudi,

¹⁰tapi kemuliaan, kehormatan ngen damoi sejahtera bakea dapet kute tun de menea baik, pertamo-tamo tun-tun Yahudi ngen kulo iso Yahudi.

¹¹ Sebab Allah coa kemliak api si.

¹²Sebab kute tun de beduso kerno coa namen hukum agamo Yahudi bakea benaso kerno coa namen hukum agamo Yahudi. Ngen kute tun de beduso neak beak hukum agamo Yahudi bakea nukum ngen hukum agamo Yahudi.

¹³Kerno iso tun de temi'uk hukum agamo Yahudi de benea neak adep Allah, tapi tun de kemerjo hukum agamo Yahudiba de bakea benea.

¹⁴Amen bangso-bangso luyen de coa temuan hukum agamo Yahudi ngen kelok diraine suang menea jano de neriteak hukum agamo Yahudi, mako, kunyau tobo'o coa temuan hukum agamo Yahudi, atei tobo'oba de jijai hukum utuk tobo'o suang.

¹⁵Sebab ngen awei'oba tobo'o kemten bahwo isai hukum agamo Yahudi ade tetulis neak lem atei tobo'o. Atei nurani tobo'o kulo de jijai saksai sebab tobo'o suang ade masone senaleak ngen ade masone benea.

¹⁶Hal o bakea keten pado bilai, amen Allah, sesuai ngen Bito Baik de uku melei namen, bakea mukum kute sesuaktau de coa keten lem atei manusio, liwet Kristus Yesus.

¹⁷Tapi, amen udi madeak diraine tun Yahudi ngen bepegong ngen hukum agamo Yahudi, jijai bangga lem Allah.

¹⁸Saudaro namen ngen kelok-Ne, ngen kerno najea lem hukum agamo Yahudi, dapet namen jano de baik ngen jano de coa baik.

¹⁹Ngen yakin, bahwo ko adeba pemipin tun sutai ngen te'ang utuk tobo'o de neak lem kelem.

²⁰Saudaro jijai gu'au tun bodong, majea tun de ati lai, kerno lem hukum agamo Yahudi ko temuan kute pengetahuan ngen ajaran de benea.

²¹Jijai, awei ipe ko majea tun luyen, jano ko coa majea dirainu su'ang? Ko de majea, “Jibeak maling,” getai ko su'ang maling?

²²Ko de madeak, “Jibeak berzina,” getai ko su'ang berzina? Ko de jengik ngen kute patung, getai ko su'ang merapok umeak patung?

²³Ko bangga das hukum agamo Yahudi, getai ko su'ang mino Allah ngen melanggea hukum agamo Yahudi o?

²⁴ Awei ade tetulis, “Sebab kerno ko ba gen Allah di hina neak antaro bangso-bangso luyen.”

²⁵Sunat memang ade gunone, amen ko taat ngen hukum agamo Yahudi, tapi amen ko melangea hukum agamo Yahudi, mako sunatnu coa de gunone.

²⁶Jadi amen tun de coa senunat, temotoa hukum agamo Yahudi, jano Allah bi manggapne sebagai tun de sudo senunat?

²⁷Amen awei o, mako tun de coa senunat, tapi kemerjo hukum agamo Yahudi, bakea mukum udi de temuan hukum tetulis ngen sunat, tapi de melanggea hukum agamo Yahudi.

²⁸Sebab tun de senbut Yahudi iso tun de genne bae Yahudi, ngen de senbut sunat, iso sunat seca'o lahiriah.

²⁹ Tapi tun Yahudi sejati adeba tun de ateine berjiwa Yahudi, ngen sunat adeba sunat neak lem atei, seca'o rohani, iso de tetulis neak lem bukau. Tun de awei o temimo pujian kunei Allah, iso kunei manusio.