Read Rejang ROMA 4 Bible Online

ROMA 4 - Rejang bible

ROMA 4

¹Jijai jano de bakea ite madeak tetang Abraham, Bapa leluhur ite?

²Sebab amen Abraham benea kerno plepne, mako si dapet dasar utuk bangga, tapi coa neak adep Allah.

³ Sebab jano de nadeak Kiteb Sucai, “Lajau pecayoba Abraham ngen Tuhan, ngen Tuhan nitung hal o ngen si sebagai kebenaran.”

⁴Amen ade tun de kerjo, upeakne coa nitung sebagai hadiah, tapi sebagai hokne.

⁵Tapi amen ade tun de coa kerjo, tapi pecayo ngen Si de mbenea tun durhako, imenne nitung jijai kebenaran.

⁶Awei o kulo Daud madeak riangba tun de nitung benea ngen Allah iso kerno plepne:

⁷ “Riangba tun de napun pelanggaran-pelanggaranne, ngen de tenutup duso-dusone!

⁸Riangba manusio de saleakne coa nitung Tuhan.”

⁹Jano ade kecek riang yo cuma utuk tun de senunat bae atau kulo utuk tun de coa senunat? Sebab sudo keme madeak, bahwo ngen Abraham imen nitung sebagai kebenaran.

¹⁰Nah, tengen Allah madeak hal o? Ayok atau sesudo si senunat? Iso sesudo senunat, tapi ayokne.

¹¹ Ngen tando sunat o tenimone sebagai matrai kebenaran das dasar imen de kentenne, ayok si senunat. Awei'oba si dapet jijai bapa kute tun pecayo de coa senunat, supayo kebenaran nitung ngen tobo'o.

¹²Si kulo jijai Bapa tun-tun de senunat, adeba tobo'o de iso cuma senunat, tapi kulo temotoa jejak imen Abraham, Bapa leluhur ite, pado maso si ati senunat.

¹³ Sebab iso kerno hukum agamo Yahudi sudo nelei janjai ngen Abraham ngen royotne, bahwo si bakea temuan dunio, tapi kerno kebenaran, das dasar imen.

¹⁴ Sebab amen tobo'o de ma'epne kunei hukum agamo Yahudi, temimo jano de jenanjai Allah, mako sio-sioba imen ngen buyeba janjai o.

¹⁵Kerno hukum agamo Yahudi mako tejijaiba hukuman Allah, tapi neak ipe coa ade hukum agamo Yahudi, neak di kulo coa ade pelanggaran.

¹⁶ Kerno do'oba kebenaran das dasar imen supayo jijai kasih karunio, sehinggo janjai o berlaku utuk kute royot Abraham, iso cuma utuk tobo'o de idup kunei hukum agamo Yahudi, tapi kulo utuk tobo'o de idup kunei imen Abraham. Sebab Abraham adeba Bapa ite kute.

¹⁷ Awei ade tetulis, “Ko sudo uku menea jijai Bapa dau bangso.” Awei'oba Allah melei janjai o ngen Abraham. Ngen Abraham pecayo ngen-Si. Siba Allah de midup tun matei, Siba kulo Allah de ngen madeak bae menea jano de coa perneak ade jijai ade.

¹⁸ Sebab kunyau coa ade dasar utuk berharap, tapi Abraham ma'ep kulo ngen pecayo, bahwo si bakea jijai Bapa dau bangso, temurut de sudo tetulis lem Kiteb Sucai, “Royotnu bakea jijai kembiak dau.”

¹⁹ Imenne coa jijai lemah kunyau si namen, bahwo awokne bi kembiak litok, kerno omorne bi kekiro sotos taun, ngen bahwo Sarah, ngenyanne, bi mandoa.

²⁰Tapi teadep janjai Allah si coa ragau kerno si pecayo. Sebelekne imenne tambeak kuet ngen si memuliakan Allah.

²¹Ngen penuak keyakinan, bahwo Allah bekuaso utuk menea jano de sudo Si janjai.

²²Kerno o hal yo nitung ngen si sebagai kebenaran.

²³Kecek-kecek yo, adeba “Hal yo nitung ngen si,” coa tenulis utuk Abraham bae,

²⁴tapi tenulis kulo utuk ite. Sebab ngen ite kulo Allah mitungne, kerno ite pecayo ngen Si, de sudo midup igai Yesus, Tuhan ite, kunei antaro tun matei.

²⁵ Adeba Yesus, de sudo senreak kerno duso ite ngen nidup igai kerno pembenaran ite.