Read Rejang ROMA 7 Bible Online

ROMA 7 - Rejang bible

ROMA 7

¹Saudaro-saudaro, — uku madeak ngen tobo'o de namen hukum — bahwo hukum bekuaso das su'ang tun selamo tun o idup.

²Su'ang ngenyan terikat hukum ngen matenne selamo matenne o idup. Tapi amen matenne o matei, si bebas kunei hukum o.

³Jijai selamo matenne idup si nanggap berzina, amen si jijai ngenyan semanei luyen; tapi amen matenne bi matei, si bebas kunei hukum, sehinggo si iso berzina, amen si jijai ngenyan semanei luyen.

⁴Sebab o, saudaro-saudaroku, udi kulo bi matei utuk hukum agamo Yahudi ngen awok Kristus, supayo udi jijai de tun luyen temuan, adeba Si de temuan, de sudo idup igai kunei antaro tun matei, kunyau ite melei asea utuk Allah.

⁵Sebab waktau ite masiak idup temurut sifet-sifet manusio de ade kerno hukum agamo Yahudi, kerjo lem anggota-anggota awok ite, kunyau ite melei asea utuk maut.

⁶Tapi uyo ite bi bebas kunei hukum agamo Yahudi, sebab ite bi matei utuk si, de kem'ung ite, sehinggo ite uyo melayani lem keadaan blau temurut Roh ngen iso lem keadaan an temurut hukum agamo Yahudi.

⁷ Amen awei o, jano de lok ite nadeak? Jano hukum agamo Yahudi o duso? Paset bae coa! Sebelekne, justru kerno hukum agamo Yahudi uku bi kemnal duso. Kerno uku kulo coa namen jano do'o kelok, amen hukum agamo Yahudi coa madeak, “Jibeak lok!”

⁸Tapi lem periteak o duso dapet kesepatan utuk menea kute mecem kelok de tamak neak lem atei ku, sebab amen coa ade hukum agamo Yahudi, mako duso matei.

⁹Bel o uku coa idup ngen hukum agamo Yahudi. Tapi sesudo teko periteak o, duso muloi idup,

¹⁰sebelekne uku matei. Ngen periteak de seharusne mbin idup, ternyato utukku justru mbin matei.

¹¹ Sebab lem periteak o, duso dapet kesepatan utuk ngike uku ngen kerno periteak o si munuak uku.

¹²Jijai hukum agamo Yahudi adeba sucai, ngen periteak o kulo adeba sucai, benea ngen baik.

¹³Amen awei o, jano de baik o menea uku matei? Paset bae coa! Tapi supayo nyato, bahwo si adeba duso, mako duso makei de baik utuk menea uku matei, supayo ngen periteak o duso lebiak nyato igai keadaanne sebagai duso.

¹⁴Sebab ite namen. Bahwo hukum agamo Yahudi adeba rohani, tapi uku yo manusio lemah, jenua utuk jijai hamba duso.

¹⁵ Sebab jano de uku nea, uku coa namen. Kerno iso jano de uku kenlok de uku nea, tapi jano de uku jengik, do'oba de uku nea.

¹⁶Jijai amen uku nea jano de coa uku kenlok, uku tujau, bahwo hukum agamo Yahudi o baik.

¹⁷Amen awei o iso uku igai de meneane, tapi duso de ade neak lem uku.

¹⁸Sebab uku namen, bahwo neak lem uku, adeba neak lem uku sebagai manusio, coa ade sesuaktau de baik. Sebab kelok memang ade neak lem uku, tapi iso hal menea jano de baik.

¹⁹Sebab iso jano de uku kelok, adeba de baik, de uku nea, tapi jano de coa uku kelok, adeba de coa baik, de uku nea.

²⁰Jijai amen uku menea jano de coa uku kelok, mako iso igai uku de meneane, tapi duso de tingea neak lem uku.

²¹Awei'oba uku dapet hukum Yo: amen uku lok menea jano de baik, de coa baik o ade ngen uku.

²²Sebab neak lem batin uku galok ngen hukum Allah,

²³tapi neak lem anggota-anggota awok ku uku kemliak hukum luyen de berjuang melawen hukum akal budiku ngen menea uku jijai tawanan hukum duso de ade neak lem anggota-anggota awokku.

²⁴Uku, manusio celako! Api de bakea mbebas uku kunei awok maut yo?

²⁵Syukur ngen Allah! Ngen Yesus Kristus, Tuhan ite.

²⁶Jijai ngen akal budiku uku melayan hukum Allah, tapi ngen awok manusio uku melayan hukum duso.