Read Rejang 1 KORINTUS 10 Bible Online

1 KORINTUS 10 - Rejang bible

1 KORINTUS 10

¹ Saudaro lokne minget jano de tejijai ngen ninik puyangte ketiko tobo'o temotoa Musa. Tobo'o selamat nyebe'ang Laut Mileak kerno tenutup embun.

²Utuk jijai penotoa-penotoa Musa, tobo'o kutene dibaptis neak lem embun ngen laut o.

³ Tobo'o kutene embuk kembuk rohani de serai,

⁴ ngen embuk bioa rohani de serai. Tobo'o kutene embuk bioa kunei tebo butau rohani de semerto tobo'o; tebo butau o adeba Kristus suang.

⁵ Kunyau awei'o, Allah coa senang te'adep kekedau kunei tobo'o, do'oba sebabne mayit-mayit tobo'o bergulek neak padang gurun.

⁶ Kutene o jijai contoh bagiak ite, utuk minget ite supayo jibeak kemlok hal-hal de kidek awei tobo'o.

⁷ Supayo ite kulo jibeak sembeak patung awei de nea pa'o kunei tobo'o. Neak lem Kiteb Sucai, “Mako bangso o muloi embuk ngen menem, ngen na'ai utuk sembeak patung.”

⁸ Ite coa buliak menea hal-hal de kidek awei de nea pa'o kunei tobo'o. Sebab, duai puluak telau ribau tun kunei tobo'o matei lem debilai kerno menea hal o.

⁹ Ite coa buliak cemubo Tuhan awei de nea pa'o kunei tobo'o bel'o, sehinggo tobo'o matei nenget dung bisai.

¹⁰ Ite kulo coa buliak ngerunyam; awei de nea pa'o kunei tobo'o bel'o sehinggo tobo'o nunuak Malaikat Maut.

¹¹Kute hal o tejijai ngen tobo'o utuk jijai contoh bagiak tun luyen. Ngen kutene o tetulis kulo utuk jijai penginget ngen ite. Sebab ite uyo idup neak maso akhir zaman.

¹²Tun de sako diraine kuet, lokba te'atei; jibeak sapei si us.

¹³Tiep cobaan de Saudaro meding adeba cobaan de patut ending manusio. Tapi Allah setia pado janjai-Ne. Si coa bakea munyau Saudaro cemubo lebiak kunei kemampuannu. Pado waktau Saudaro dapet cobaan, Tuhan bakea melei dalen ngen ko utuk jijai kuet supayo Saudaro dapet betaen.

¹⁴Kerno'o, Saudaro-saudaro de uku kemasiak, lokba udi jengik te'adep tun de sembeak patung.

¹⁵Uku miling ngen ko awei ngen tun-tun de bijaksana. Lokba udi peker suang kecekku yo.

¹⁶ Pado waktau ite menem anggur ngen mucep syukur ngen Allah, do'o kemten bahwo ite jijai ngen Kristus lem kematei-Ne. Pado waktau ite magiak ruti utuk nembuk besamo, do'o kemten bahwo ite jijai do lem awok Kristus.

¹⁷Kerno cuma ade do ruti, ngen ite kute embuk kunei ruti de do o, mako ite kutene yo adeba do awok.

¹⁸ Cubo kemliak tun-tun Yahudi. Tobo'o de embuk kembuk de mpek neak das penan kurban, adeba tun-tun de jijai do ngen penan o.

¹⁹Jano maksud uku ngen do'o? Patung atau kembuk de senreak ngen patung coa gen tai samo sekilai.

²⁰ Jano de senreak neak penen kurban utuk patung coa senreak ngen Allah, tapi senreak ngen roh-roh kidek. Ngen uku coa lok jijai do ngen roh kidek.

²¹Udi coa buliak menem kunei caker anggur Tuhan sekaligus caker roh kidek kulo. Udi coa buliak embuk neak mija Tuhan ngen mija roh kidek.

²² Jano ite lok menea Tuhan kidek atei? Jano ite lebiak kuet kunei Tuhan?

²³ Nadeak tun, “Ite buliak menea jano bae de ite lok.” Benea! Tapi coa kute de ite lok o beguno. “Ite buliak menea jano bae de ite lok” — tapi coa kute de ite lok o mbangun idupte.

²⁴Jibeakba suang kulo bejuang utuk diraine suang. Tiep tun harus bejuang utuk tun luyen.

²⁵Udi buliak embuk jano bae de jenuo neak peken daging. Jibeak semlidik lebiak dute, kunyau atei nuraninu coa tujau.

²⁶ Sebab lem Kiteb Sucai tetulis, “Bumai ngen kute isaine adeba Tuhan temuan.”

²⁷Amen udi nundang embuk ngen suang tun de iso Kristen, ngen udi temimo undangan o, embukba jano de nidang. Jibeak semlidik kunei ipe tekone kembuk o, supayo atei nuraninu coa ragau.

²⁸Tapi amen ade de madeak ngenko, “Kembuk yo bi senreak ngen patung,” jibeakba embuk kembuk o. Do'o ko nea utuk tun o ngen atei nurani.

²⁹Maksud uku iso atei nuraninu, tapi atei nurani tun o. Mukin ade de betanye, “Woi, getai kebebasan uku harus natur ngen atei nurani tun luyen?

³⁰Amen uku embuk kembuk ngen ca'o mokasih ngen Allah, getai tun harus mino uku das kembuk o, padahal uku sudo mokasih ngen Allah?”

³¹Jano bae de Saudaro nea — Saudaro embuk atau Saudaro menem — neaba kutene o utuk menea Allah mulio.

³²Naturba idupnu ngen baik supayo tun luyen coa menea duso; jano tobo'o tun Yahudi atau iso tun Yahudi, atau anggota jemaat Allah.

³³Idupba awei uku. Uku berusaho semnang atei kute tun lem dau hal, coa gen maksud utuk kepentingan dirai suang. Tujuan uku cuma supayo tobo'o kutene dapet selamat.