Read Rejang 1 KORINTUS 4 Bible Online

1 KORINTUS 4 - Rejang bible

1 KORINTUS 4

¹Anggepba keme pelayan-pelayan Kristus, de betanggung jawab melei namen rencano-rencano Allah de ati dunio namen.

²De pertamo sekilai tenuntut kunei pelayan de awei yo adeba bahwo si setia ngen tuanne.

³Bagiakku coa penting nien jano de udi atau api bae meker tetang diraiku suang. Malah diraiku suang coa uku peker.

⁴Uku coa meraso saleak lem hal jano bae, tapi do'o iso jijai bukti bahwo uku memang coa saleak. Tuhan suangba de temtau uku saleak jano coa.

⁵Kerno o, jibeakba mukum ayok waktaune, mbotba sapei Tuhan teko be. Allahba de bakea mukok kute resio-resio de coa keten lem kegelapan. Allahba de bakea mukok kute niat de tependam lem atei manusio. Pado waktau o baruba tiep tun temimo kunei Allah de patas tenimone.

⁶Saudaro-saudaro! Utuk kepentingannu, uku bi makei kutene o ngen Apolos ngen diraiku suang. Maksudne supayo kunei contoh keme o udi dapet belajea jano tai ungkapan, “Bepegongba pado peraturan de ade.” Ngen awei o coa suang tun kulo kunei udi dapet ombong tetang suang tun, lajau mino de luyen.

⁷Api de manggap Saudaro lebiak kunei tun luyen? Iso kute sesuaktau Saudaro temimo kunei Allah? Jijai, getai lok ombong, seolah-olah jano de ade ngen Saudaro o iso sesuaktau de nelei?

⁸Memang udi coa perlu jejano igai! Udi bi kayo! Udi bi jijai rajo! Ngen keme coa. Padeak baikne amen udi benea-benea bi jijai rajo, supayo keme dapet meriteak besamo ko.

⁹Kerno temurut pendapetku, keme rasul-rasul, bi jenijai Allah sebagai totonan neak adep manusio ngen para malaikat. Keme awei tun-tun hino de nukum matei neak adep umum ngen tenawai dunio.

¹⁰Kerno Kristus, keme adeba tun bodong, udi tun Kristen de pacok! Keme lemah, udi kuet! Keme nino tun, udi nujai tun!

¹¹Sapei uyo keme nyemen ngen haus; keracok keme tinggea de neak awok bae; tun semikso keme; keme coa ade penan utuk tinggea;

¹² keme kerjo keras utuk mesoa kembuk. Amen keme senupeak, keme males ngen berkat; amen keme senikso, keme sabar;

¹³amen tun kemidek keme, keme males ngen kecek-kecek de baik. Keme coa lebiak kunei sampah dunio; sapei uyo keme masiak nanggap awei sampah bumai.

¹⁴Uku temulis dio iso utuk menea udi jijai selek, tapi utuk melei nasihat udi awei anok-anokku suang.

¹⁵Sebab ukuba de jijai bak udi, mukin sebagai tun Kristen, udi bi temuan puluak ribau gu'au. Neak lem idupnu sebagai tun-tun de jijai do ngen Kristus, uku de jijai baknu, kerno uku de mbin Bito Baik tetang Kristus ngen ko.

¹⁶ Sebab o uku minoi nien supayo udi motoa contohku.

¹⁷Utuk o uku bi mutus Timotius ngen ko. Sebagai penotoa Kristus, si serai awei anokku suang de uku sayang. Si anok de dapet uku pecayo. Be si bakea minget udi tetang ca'o idup de uku totoa sesudo pecayo ngen Kristus, adeba ca'o idup de uku majea neak tiep jemaat neak ipe bae.

¹⁸Kekedau tun kunei antaro udi bi jijai ombong, sebab tobo'o sako uku coa bakea teko ngen ko.

¹⁹Tapi amen Tuhan melei izin uku bakea teko kulo ngen ko coa an igai. Be pado waktau o uku bakea kemliak kulo jano de dapet nea tun-tun de ombong o; iso cuma kecek tobo'o bae.

²⁰Kerno amen Allah meriteak idup suang tun, hal o jijai bukti kekuatan idup tun o, iso kunei kecek-kecekne.

²¹Jijai, jano kelok udi? Jano udi lok uku teko utuk majea udi ngen tegas, lemah lembut ngen sayang?