Read Rejang 1 KORINTUS 6 Bible Online

1 KORINTUS 6 - Rejang bible

1 KORINTUS 6

¹Getai ade neak antaro udi de binai lalau ngen hakim de coa kemnal Allah, utuk madau Saudaro do imen, amen si selisiak ngen Saudarone o? Getai si coa minoi umat Allah semelsei pekaro o?

²Atau udi coa namen, bahwo umat Allah bakea mukum dunio yo? Jijai, amen memang udi bakea mukum dunio yo, jano udi coa sanggup semlesei pekaro-pekaro pengadilan de coa ade taine?

³Coa namen kah udi, bahwo ite bakea mukum malaikat-malaikat? Lebiak-lebiak igai pekaro-pekaro idup tiep bilai.

⁴Mako amen timboa pekaro-pekaro awei o, jano udi semreak pekaro o ngen tun-tun de coa beguno lem jemaat?

⁵Hal yo uku madeak utuk semelek udi. Paset neak antarone ade suang tun de cukup bijaksano utuk semlesei sutok antaro Saudaro-saudaro de sesamo Kristen.

⁶Tapi sebelekne suang Kristen lalau magea tun de iso Kristen utuk madau pekarone te'adep Saudarone de Kristen.

⁷Iso bae menea pekaro ngen tun de iso Kristen, adene selisiak-selisiak neak antaro udi kulo bi jijai kekalahan bagiaknu. Lebiak baik udi nea coa adea, atau rugai.

⁸Tapi udi suang malah de menea tun luyen coa adea. Udi suang kulo de menea tun luyen rugai. Hal o ko nea te'adep Saudaro-saudaronu.

⁹Jano udi namen bahwo tun-tun de coa motoa kelok Allah, coa bakea jijai anggota umat Allah? Jibeak keno pike! Tun-tun de menea uleak kidek, tun-tun de nyembeak patung, de nga'em, semanei de menea perbuatan kidek de semelek te'adep sesamo jenisne ngen pasanganne,

¹⁰de maling, de serakeak, tukang mabuk, de galok kemidek tun luyen, tukang mike, coa bakea jijai anggota umat Allah.

¹¹Kekedau tun neak antaro Saudaro memang aweiyo kileak. Tapi Saudaro bi melei dirainu senucai, Saudaro bi senucai, Saudaro bi jijai bnea neak lem gen Tuhan Yesus Kristus kulo lem Roh Allah ite.

¹² Ade de madeak bahwo tiep tun buliak menea kute sesuaktau. Tapi bagiakku coa kutene beguno. Jijai kunyau uku buliak menea jano bae, tapi uku coa lok munyau diraiku kenuaso jano bae.

¹³Ade kulo de madeak bahwo kembuk adeba utuk tenei, tenei seniap utuk kembuk. Tapi keduaine bakea nlenyep Allah. Awok manusio coa buliak nakei utuk menea hubungan de coa baik, tapi cuma utuk melayan Tuhan. Ngen Tuhan bakea miaro awok o.

¹⁴Allah bi midup igai Tuhan Yesus kunei matei, awei o kulo Allah bakea midup ite ngen kuaso-Ne.

¹⁵Saudaro-saudaro namen bahwo awoknu adeba anggota awok Kristus. Jijai, jano buliak uku mok do anggota awok Kristus lajau jenijaine anggota awok suang selawei nakea? Sekilai bae coa!

¹⁶ Atau mukin udi ati namen bahwo tun de capua ngen selawei nakea, jijai do ngen selawei nakea o! Sebab lem Kiteb Sucai tetulis, “Keduaine jijai do.”

¹⁷Tapi tun de jemijai do diraine ngen Tuhan, Roh Tuhan ngen roh tun o jijai do.

¹⁸Neuakba perbuatan-perbuatan de kidek. Sebab kute duso luyen de nea tun, tejijai neak luea awok tun o. Tapi tun de menea perbuatan kidek, taine menea duso te'adep awokne suang.

¹⁹ Udi harus namen bahwo awoknu adeba penan tinggea Roh Allah. Roh o tinggea neak lem udi. Ngen Allah suangba de melei roh o ngen udi. Awok Saudaro iso de ko temuan. Do'o Allah de temuan.

²⁰Allah bi temukua udi ngen bi masen udi lunas. Sebab'o, muliakanba Allah ngen awoknu.