Read Rejang 1 KORINTUS 7 Bible Online

1 KORINTUS 7 - Rejang bible

1 KORINTUS 7

¹Uyo uku lok miling tetang masalah de udi madeak lem su'etnu. Amen suang semanei coa nikeak, do'o baik.

²Tapi supayo coa tegoda utuk menea hal-hal de coa baik, lebiak baik tiep semanei temuan pengaten selawei suang ngen tiep selawei temuan sematenne suang.

³Sematen harus maneu kewajiban sebagai sematen te'adep pengaten selaweine, pengaten selawei harus maneu kewajiban sebagai ngenyan te'adep sematenne; memasing maneu kewajiban te'adep de luyen.

⁴Ngenyan coa ade kuaso das awokne suang; de bekuaso das awokne adeba sematenne. Awei'o kulo sematen coa de kuaso das awokne suang; de bekuaso das awokne adeba pengaten selaweine.

⁵Jibeakba meuak do ngen de luyen seca'o duai keramin. Buliak utuk sementaro waktau, asal keduaine sesamo bi tujua. Ngen awei'o memasing dapet bedu'o ngen coa ade de gemanggau. Tapi sesudo'o, harusba udi baik igai seca'o duai keramin. Amen coa awei o, be udi nam temotoa godaan roh kidek, kerno udi coa kuet temaen nafsu.

⁶Uku madeak dio iso sebagai periteak, tapi sebagai nasehat.

⁷Sebeneane uku lebiak tujua amen kute tun jijai awei uku. Tapi masing-masing bi temimo karunio de khusus kunei Allah. Suang tun de temuan karunio yo, de luyen temuan karunio'o.

⁸Tun-tun de ati nikeak, ngen selawei-selawei de sudo rando, dioba nasehatku: Lebiak baik Saudaro tep idup suang awei uku.

⁹Tapi amen Saudaro cao dapet tema'en nafsu, lokne Saudaro nikeak. Sebab lebiak Saudaro nikeak kunei pado tema'en nafsu de coa benea.

¹⁰ Te, adep tobo'o de sudo nikeak, dioba periteak uku: (Sebeneane iso uku de melei periteak yo, tapi Tuhan.) Suang selawei de sudo nikeak jibeakba teminggea sematenne.

¹¹Tapi amen si sudo teminggeane, si harus tep coa gen sematen, atau belek igai ngen sematenne. Suang sematen coa buliak sema'ok pengaten selaweine.

¹²Ngen de luyen-luyenne, nasehat uku adeba: — dio nasehat uku suang, iso Tuhan — amen suang Kristen temuan pengaten selawei de coa pecayo ngen Kristus, pengaten selawei tujua utuk idup besamo-samo ngen si, tun'o coa buliak sema'ok pengaten selaweine.

¹³Amen suang selawei de temuan sematen de coa pecayo ngen Kristus, ngen sematen tujua utuk idup besamo ngen si, mako pengaten selawei'o coa buliak sema'ok sematenne.

¹⁴Sebab sematen de coa pecayo nam tenimo utuk jijai anggota umat Allah kerno nikeakne ngen pengaten selawei de sudo jijai Allah temuan. Awei'o kulo pengaten selawei de coa pecayo nam tenimo utuk jijai anggota umat Allah, kerno nikeakne ngen sematen de sudo jijai Allah temuan. Amen coa awei'o, anok-anok'o nanggep sebagai anggota umat Allah.

¹⁵Tapi amen tun de coa pecayo'o teminggea pengaten selaweine atau sematenne de Kristen, jibeak tema'en si. Lem hal yo saudari atau Saudaro'o bebas, sebab Allah lok supayo Saudaro idup ngen rukun.

¹⁶Kerno Saudaro sebagai pengaten selawei — de sudo pecayo ngen Tuhan — awei ipe Saudaro pacok namen ngen paset bahwo Saudaro coa dapet semlamat sematennu? Awei'o kulo Saudaro pacok namen ngen paset bahwo Saudaro coa dapet senlamat pengaten selaweinu?

¹⁷Lokba masing-masing matur kehidupanne temurut nasehat Tuhan awei de sudo tentau Allah bagiakne pado waktau Allah menokne utuk pecayo ngen-Si. Do, oba peraturan de uku najea neak tiep-tiep jemaat.

¹⁸Umpamone, amen suang tun sudo senunat pado waktau si temimo kedeu Allah, mako jibeakba tu'o berusaho mapus tando-tando sunat'o. Awei'o kulo amen suang tun ati senunat pado waktau si temimo endeu Allah, jibeak tun'o minoi senunat.

¹⁹Sebab temotoa peraturan sunat atau coa temotoane, keduaine sesamo coa ade taine. De penting adeba temotoa periteak-periteak Allah.

²⁰Lokba tiep tun tep idup lem keadaan awei ketiko si temimo kedeu Allah.

²¹Amen pado waktau endeu, Saudaro adeba suang hamba, jibeakba Saudaro payeak meker hal o. Tapi amen be Saudaro dapet kesempatan utuk jijai bebas, genunoba kesempatan'o.

²²Sebab suang hamba de sudo pecayo ngen Tuhan, adeba tun de bebas utuk Tuhan. Tun bebas de sudo pecayo ngen Tuhan, adeba hamba Kristus.

²³Allah sudo temukua ngen masen lunas Saudaro. Kerno o, jibeakba Saudaro semreak dirai utuk jijai hamba manusio.

²⁴Jijai, Saudaro-saudaro, awei ipe kulo keadaannu pado waktau endeu, lokba Saudaro tep idup awei'o besamo ngen Allah.

²⁵Uyo tetang tun-tun de ati nikeak. Tetang hal'o, uku coa temimo periteak kunei Tuhan. Tapi sebagai tun de kerno rahmat Tuhan patut cenayo, uku lok melei nasehat ku.

²⁶Minget kute kesaro de macam uyo yo, asaiku lebiak baik amen tun tep maneu idup awei keadaanne de uyo.

²⁷Amen Saudaro sudo ade pengaten selawei jibeak be'usaha lepas kunei pengaten selawei'o. Amen Saudaro ati ade pengaten selawei jibeakba mesoa pengaten selawei.

²⁸Tapi amen Saudaro nikeak, do'o iso duso. Awei'o kulo suang semulen nikeak, coa be, artai si beduso. Cuma, tobo'o de nikeak'o bakea meding kesaro. Ngen uku lok Saudaro uak kunei kesaro'o.

²⁹Maksud uku awei yo, Saudaro-saudaro: Ite coa dau waktau igai. Muloi kunei uyo, tiep tun de sudo ade pengaten selawei lokba si idup awei coa gen pengaten selawei;

³⁰tun de ngindoi, idup awei si coa ibo atei; tun de tawai, awei si coa riang; tun de sudo temukua, awei si coa ade jejano;

³¹ngen tun de sibuk lem hal dunio, lokba si idup awei tun de coa sibuk ngen hal-hal'o. Sebab coa an igai dunio yo, lem keadaanne de uyo bakea nyep!

³²Uku lok supayo Saudaro bebas kunei kesaro. Tun de coa temuan pengaten selawei bakea bogoa meker hal-hal tetang Tuhan, kerno si lok semnang Tuhan.

³³Tapi tun de sudo nikeak bakea dau meker hal-hal dunio yo, sebab si lok semnang atei pengaten selaweine;

³⁴akibatne perhatianne tebagiak. Suang selawei de coa ade sematen, atau suang semulen, bakea dau meker hal-hal tetang Tuhan, sebab si lok supayo diraine jijai Allah temuan. Tapi suang selawei de sudo ade sematen, bogoa meker hal-hal dunio yo, sebab si lok semnang atei sematenne.

³⁵Uku temulis kutene'o utuk kebaikkanne suang, iso ngen maksud temgea dio ngen do'o. De uku lok cuma supayo Saudaro menea de benea ngen patut, supayo Saudaro bogoa meker Tuhan.

³⁶Amen suang tun meding coa maneu de sepatut te'adep asenne, amen si coa dapet tema'en nafsune, ngen si meding perlu nikeak ngen selawei'o, kunyauba si menea jano de medingne baik. Si coa beduso, amen tobo'o nikeak.

³⁷Tapi amen suang sudo menea keputusan neak lem ateine utuk coa nikeak ngen asenne ngen keputusanne'o coa tepakso, mako de neane o baik, amen si kuet meneane.

³⁸Taine, tun de nikeak baik perbuatanne, ngen tun coa nikeak lebiak baik igai perbuatanne.

³⁹Suang semulen de sudo nikeak tepeket ngen sematenne cuma selamo sematenne idup. Amen sematenne bi ninggea, semulen o bebas nikeak igai ngen tun de si cito; asal nikeak o nikeak Kristen.

⁴⁰Tapi si bakea lebiak butung amen coa nikeak igai. Do'o pendapet uku suang, tapi meding bahwo de uku madeak o adeba ngen kuaso Roh Allah.