Read Rejang 1 KORINTUS 9 Bible Online

1 KORINTUS 9 - Rejang bible

1 KORINTUS 9

¹Uku tun bebas. Uku rasul. Jano uku ati perneak kemliak Yesus, Tuhan ite? Udi adeba asea kerjoku utuk Tuhan.

²Amen tun-tun luyen coa lok makau uku sebagai rasul, paling didik udi makau do'o! Sebab idup nu sebagai tun Kristen adeba bukti bahwo uku suang rasul.

³Amen tun ragau ngen uku, uku bakea jemawab awei yo:

⁴Jano uku coa ade hok temimo kembuk ngen menem kerno kerjoku?

⁵Jano uku coa ade hok mbin suang pengaten selawei de pecayo ngen Kristus besamo-samo uku lem pemaneuku, awei de nea Saudaro-saudaro Tuhan Yesus ngen rasul-rasul luyenne temasuk Petrus?

⁶Atau cuma Barnabas ngen uku bae de seharusne mesoa nafkah suang?

⁷Coa ade anggota tentra de harus temanggung biayane suang neak lem angkatan perang! Coa ade petani de temanem anggur neak kebunne lajau mbuk asea anggur kunei kebun o! Coa ade gembala de semido bebirai, lajau coa mbuk susu kunei bebirai o!

⁸Uku madeak o iso cuma kunei de patut lem kehidupan bebilai, tapi kerno Kiteb Sucai madeak hal kulo.

⁹ Neak lem Bukau Musa tetulis, “Sapai de gidong melat gandum utuk melpas ijat gandum kunei kaleakne, jibeakba tenutup bibiane.” Jano Allah murus sapai?

¹⁰Atau de si maksud adeba ite? Memang do'o tetulis utuk ite. Sebab tun de kemerjo kebun ngen tun mbersih gendumne sudo patut bekerjo ngen harapan utuk temimo pa'o kunei asea kerjone.

¹¹ Keme sudo tembea biniak rohani neak lem idupnu. Mako amen keme kemtem berkat-berkat jasmani kunei udi, jano do'o taine keme minoi kembiak dau kunei udi?

¹²Amen tun-tun luyen berhok ma'ep dio kunei udi, iso keme lebiak berhok igai kunei tobo'o? Tapi uku ati gemuno hok'o. Sebelekne uku lebiak galok temanggung kute sesuaktau kunei pado menea suaktau hal de temutup dalen bagiak Bito Baik tetang Kristus.

¹³ Saudaro paset namen bahwo tun de kerjo neak Bait Allah temimo kembuk tobo'o kunei Bait Allah. Tun-tun de murus penan sedekeak, dapet pao kunei sedekeak'o.

¹⁴ Awei'o kulo Tuhan bi temtau bahwo tun de melei Bito Baik o harus dapet nafkah kunei bito o.

¹⁵Tapi ati perneak uku makei do kulo kunei hok-hok o. Uku temulis su'et yo iso kulo ngen maksud supayo hal-hal o de nea uyo te'adep uku. Lebiak uku matei kunei kelnyep hal de uku mbangga o.

¹⁶Sebab, amen do'o cuma soal melei namen Bito Baik kunei Allah, mako uku coa behok mbangga, sebab Allah bi meriteak uku utuk maneune. Celakoba uku, amen uku coa melei namen Bito Baik o!

¹⁷Amen uku maneu kerjo o das kelok uku suang, mako uku buliak ma'ep utuk dapet upeak. Tapi uku melei namen Bito Baik o justru kerno kewajiban. Uku tenugas Allah utuk maneu o.

¹⁸Amen awei'o, jano upeak uku? Dio upeakne: bahwo uku dapet melei namen Bito Baik o ngen semaro suang tun kulo utuk temanggung biayaku, kerno uku coa temutut hok-hokku sebagai tukang melei namen Bito Baik o.

¹⁹Uku yo iso hamba api bae; uku bebas. Kunyau awei'i, uku bi jijai diraiku yo hamba ngen kute tun. Uku neak o supayo uku dapet mbin dau tun utuk Kristus.

²⁰Te'adep tun Yahudi, uku besikep awei tun Yahudi supayo uku dapet mbin dau tun Yahudi utuk Kristus. Te'adep tun-tun de idup temurut ukum Musa, uku besikep awei uku terikat ngen ukum o, kunyau uku sebeneanea coa terikat ngen si. Uku menea o supayo uku dapet temarik tobo'o jijai penotoa Kristus.

²¹Te'adep tun de iso Yahudi, uku besikep awei suang de iso Yahudi, de idup neak luea ukum Musa. Uku menea o supayo uku dapet temarik tobo'o jijai penotoa Kristus. Tapi do'o coa ade taine bahwo uku coa taat ngen periteak-periteak Allah; sebelekne uku kenuaso periteak-periteak Kristus.

²²Neak tengeak-tengeak tun-tun de imenne de coa kuet, uku kulo besikep awei tun de imenne coa kuet supayo uku dapet temarik tobo'o jijai penotoa Kristus. Siketne, uku jijai kekutene utuk kute tun supayo ngen dalen de awei ipe kulo uku dapet semlamat pao kunei tobo'o.

²³Kute o uku nea Bito Baik kunei Allah o, supayo uku kulo dapet berkat.

²⁴Saudaro paset namen bahwo neak lem perlombaan, kute peserta milau mlilai, tapi cuma do tun de temimo hadiah. Sebab o mlilaiba awei o sehinggo Saudaro temimo hadiahne.

²⁵Tiep tun de gidong latihan, tema'en dirai lem kute hal. Si menea o kerno si lok dapet hadiah. Hadiah o coa taen an. Tapi ite yo temaen dirai lem kute hal kerno ite lok hadiah de taen an.

²⁶Do'o sebabne uku mlilai ngen tujuan de paset. Awei lem pertandingan tinjau, uku coa buliak mokoa sembarangan.

²⁷Uku munyau awokku nelatih ngen bennek sapei uku dapet kemuasone. Uku menea awei'o, sebab uku coa lok sapei tejijai bahwo sesudo uku majok tun luyen milau lem perlombaan o, uku suang tenulok.