Read Rejang 2 KORINTUS 1 Bible Online

2 KORINTUS 1 - Rejang bible

2 KORINTUS 1

¹ Saudaro-saudaro jemaat Allah neak Korintus ngen kute umat Allah neak kute Akhaya. Uku, Paulus, rasul Kristus Yesus, de naket das kelok Allah, besamo-samo ngen saudaro ite Timotius,

²ma'ep semoga Allah Bapa ite ngen Tuhan Yesus Kristus melei berkat ngen sejahtera ngen udi. Yesus Kristus semerto udi.

³Tepujaiba Allah, Bapa Tuhan te Yesus Kristus, Bapa de penuak kemurahan ngen Allah sumber kute penghiburan.

⁴Si mibur keme lem kute derito keme, sehinggo keme sanggup mibur tobo'o de ade lem memecem derito.

⁵Derito-derito de nding Kristus bi dau keme meding kulo. Ngen liwet Kristus kulo, batin keme kebiak kuet.

⁶Amen keme menderito, do'o adeba utuk kemuet batinnu, utuk keselamatannu. Amen batin keme kenuet, mako udi kulo kuet, sehinggo udi jijai sabar lem derito-derito awei de keme meding kulo.

⁷Keme yakin ngen coa perneak ragau tetang Saudaro, sebab keme namen bahwo udi milau saro ngen keme. Kerno o udi kulo kenuet besamo-samo keme.

⁸ Saudaro-saudaro! Keme lok udi namen tetang derito de keme meding neak wilayah Asia. Derito de keme tanggung o kebiak benek temken keme, sehinggo keme cigai lok idup igai.

⁹Keme meding, awei keme bi nukum matei. Tapi hal o tejijai, supayo keme jibeak pecayo ngen dirai keme suang, tapi cuma ngen Allah de midup igai tun matei.

¹⁰Allah bi ngen bakea semlamat keme kunei matei de kebiak ngeri: Ngen-Si keme mpek harapan keme bahwo Si bakea semlamat keme igai.

¹¹Udi kulo milau du'o keme, supayo dau tun mucep syukur das karunio de keme dapet kunei daune du'o tobo'o utuk keme.

¹²Keme bangga, sebab atei nurani keme melei saksai ngen keme bahwo idup keme neak dunio yo, khususne lem hubungan keme ngen udi, kenuaso ketulusan ngen kemurnian kunei Allah iso kunei dunio, tapi ngen kekuatan anugerah Allah.

¹³Sebab keme cuma temulis ngen udi jano de dapet udi baco ngen udi paham. Uku lok, mudah-mudahan udi bakea paham sepenuakne,

¹⁴awei de sudo udi paham pa'one kunei keme, adeba bahwo pado waktau Tuhan Yesus teko igai, udi bakea bangga das keme awei keme kulo bakea bangga das udi.

¹⁵Kerno keyakinan o ba uku perneak rencano utuk mulau udi dute, supayo udi buliak temimo anugerah utuk keduai kilaine.

¹⁶ Sudo'o uku lok temrus pemaneuku moi Makedonia, lajau kunei Makedonia belek igai ngen udi, supayo udi temulung uku lem pemaneuku moi Yudea.

¹⁷Jijai, jano uku ngen awei o bae menea rencano o? Atau jano uku menea rencano o temurut kelokku suang, sehinggo tun nam madeak ngen diraiku ade “Au” ngen “Coa”?

¹⁸Demi Allah de setia, janjai keme ngen udi iso “Ya” ngen “Coa”.

¹⁹ Kerno Yesus Kristus, Anok Allah, de sudo keme melei namen neak tengeak-tengeak udi, ngen Silas, Timotius, ngen uku suang isoba tun “Au” ngen “Coa” tapi sebelekne neak lem Si cuma ade “Au”.

²⁰Sebab liwet Si Allah bi madeak “Au” teadep kute janjai-Ne. Kerno o ba ite mucep “Amin” ngen Allah kerno Yesus Kristus. Keme menea awei o supayo Allah mulio.

²¹Allah suangba de menea keme ngen Saudaro jijai do ngen Kristus; Siba kulo de miliak ite cuma utuk dirai-Ne.

²²Utuk o Allah sudo menea ite jijai de Allah temuan ngen melei Roh-Ne neak lem ateite sebagoi jaminan bahwo Si bakea melei ngen ite kute de jenanjai-Ne.

²³Allah saksaiku — sebab Si namen ateiku — bahwo uku coa lalau moi Korintus, kerno uku coa lok menea ateinu ibo.

²⁴Uku coa makso udi tetang jano de udi harus pecayo, sebab udi bi kembiak pecayo ngen Kristus. Uku cuma kerjosamo ngen udi supayo udi tambeak bahagia.