Read Rejang 2 KORINTUS 12 Bible Online

2 KORINTUS 12 - Rejang bible

2 KORINTUS 12

¹Memang coa ade utungne uku ombong. Tapi uku lok kulo ombong ngen hal-hal de Allah kemten ngen uku lem Wahyu atau lem pengeliak.

²Uku namen tetang suang tun neak lem Kristus; pat blas taun de sudo — teak neak lem awok, uku coa namen, teak neak luea awok, uku coa namen, Allah de namenne — tun o seketiko'o naket moi tiket ke telau kunei surgo.

³Uku kulo namen tetang tun o — teak neak lem awok teak neak lluea awok, uku coa namen, Allah de namenne —

⁴seketiko'o si naket moi Firdaus ngen si temi'uk kecek-kecek de coa nadeak, de coa buliak nucep manusio.

⁵Tetang tun o ba de lok uku mbangga, iso tetang diraiku suang, seluyen das kelemahan-kelemahanku.

⁶Seandaine uku lok kulo mbangga sesuaktau, uku coa lok jijai tukang mike de miling coa benea. Tapi uku temaen diraiku, supayo jibeak ade tun de peker tetang uku lebiak kuneipado de tobo'o kemliak ngen uku atau de tobo'o temi'uk kunei uku.

⁷Ngen supayo uku jibeak ombong kerno pengeliak-pengeliak de luea biaso o, uku nelei olon moi awokku de adeba utusan Iblis. Olon o nelei utuk mokoa uku supayo uku coa jijai ombong.

⁸Telau kilai uku bedu'o ngen Tuhan supayo olon o naket kunei uku.

⁹Tapi Tuhan jemawab, “Cukupba anugerah-Ku bagiaknu, sebab justru lem kelemahanba kuaso-Ku jijai sempurno.” Sebab o, uku lebiak galok ombong das kelemahanku, supayo kuaso Kristus tu'un moi uku.

¹⁰Kerno o, uku riang ngen rela neak lem kelemahan, neak lem sikso, neak lem saro, neak lem penganiayaan ngen sengsaro kerno Kristus. Sebab amen uku lemah, mako uku kuet.

¹¹Sungguak uku bi jijai bodong; tapi udi de makso uku. Sebeneane uku harus udi nujai. Kerno kunyau uku coa ade taine, tapi neak lem kute hal uku coa aleak teadep rasul-rasul de luea biaso o!

¹²Tando-tando suang rasul bi kenten neak tengeak-tengeak udi ngen kute kesabaran liwet tando-tando, mujizat-mujizat ngen kuaso-kuaso.

¹³Lem hal jano udi ku'ang coa denulai, mbanding ngen jemaat-jemaat de luyen? Paling-paling cuma lem hal yo, bahwo uku coa jijai beban udi. Uku minoi maaf das saleak o.

¹⁴Sesunggukne uyo yo bi telau kilaine uku siap utuk semulau udi. Ngen uku coa lok jijai beban udi, sebab de uku lok isoba jano de udi temuan, seluyen dirainu. Kerno isoba anok-anok de kesoa kembuk utuk tun tuaine, tapi tun tuaiba de harus kesoa kembuk utuk anok-anokne.

¹⁵Kerno o, ngen riang atei uku rela melei kekutene utuknu, bahkan diraiku suang kulo, jano patas udi ku'ang mengasihi uku?

¹⁶Nah, udi tujau bahwo uku coa perneak menea udi saro. Tapi ade de madeak bahwo uku yo licik; bahwo uku dapet utung kunei udi kerno pikeku.

¹⁷Jano perneak uku mok utung kunei udi liwet suang kunei antaro tobo'o de nutusku ngen udi?

¹⁸Uku bi meluak Titus lalau magea udi, ngen uku meluak saudaro do imen de luyen o lalau besamo-samo ngen si. Jano Titus mok utung kunei udi? Tapi keme beduai kerjo ngen tujuan de serai ngen betindok ngen ca'o-ca'o de serai.

¹⁹Bi an agokne udi sako bahwo keme lok mbela dirai te'adep udi. Neak adep Allah ngen demi Kristus keme madeak: Kutene yo, Saudaro-saudaroku terkasih, tejijai utuk mbangun imen udi.

²⁰Uku khawatir bahwo pado waktau uku mulau udi be, uku kemliak udi coa awei jano de uku lok, ngen udi kulo bakea kemliak uku coa awei de udi lok. Jibeak sapei be ade de tekea, iri atei, panes atei, mementingkan dirai suang, fitneak, majung, ombong ngen kemacau.

²¹Uku khawatir bahwo amen uku teko igai, Allahku bakea merendeak uku neak adep udi ngen uku duko das dau tun de bel'o menea duso ngen ati tobat kunei de kotor, cabul, ngen hal-hal de kidek de tobo'o nea.