Read Rejang 2 KORINTUS 13 Bible Online

2 KORINTUS 13 - Rejang bible

2 KORINTUS 13

¹ Dio adeba utuk ketelau kilaine uku teko ngen udi. Lem Kiteb Sucai tetulis, “Tiep pekaro harus ngen keterangan saksai kunei duai atau telau tun, mako pekaro o sah.”

²Tun-tun de bel'o bi menea duso ngen kute tun luyenne, bi uku melei penginget lebiak dute ketiko uku mulau udi keduai kilaine. Uyo, sementaro keme samo-samo uak, uku minget igai bahwo amen uku teko igai, coa suang kulo kunei tobo'o de bakea bebas kunei hukuman.

³Mako udi bakea dapet kute bukti de udi kenlok bahwo Kristus benea-benea miling liwet uku. Amen Kristus bertindok te'adep udi, Si coa bertindok lemah, sebelekne Si kemten kuaso-Ne neak antaro udi.

⁴Memang pado waktau Si senalib, Si lemah, tapi uyo Si idup kerno kuaso Allah. Keme kulo lemah lem idup keme de jijai do ngen Kristus, tapi amen madep udi, keme kulo kuet besamo Kristus kerno kuaso Allah.

⁵Cubo udi cemubo dirai suang jano udi benea-benea idup das dasar pecayo ngen Kristus! Paset udi sadar bahwo Kristus Yesus ade neak lem udi! Sebab amen coa awei o, udi coa taen cenubo.

⁶Tapi uku ma'ep udi namen bahwo iso keme de coa taen cenubo.

⁷Keme bedu'o nge Allah, semoga udi jibeak menea plep kidek, iso supayo keme ternyato taen cenubo, meluyen supayo udi buliak menea jano de baik, kunyau keme suang ketenne coa taen cenubo.

⁸Kerno keme coa dapet menea jejano melawen kebenaran; de dapet keme nea adeba utuk kebenaran.

⁹Keme senang amen keme lemah, ngen udi kuet. Keme bedu'o kulo supayo udi jijai sempurno.

¹⁰Do'oba sebabne uku temulis su'et yo pado waktau uku ati ade neak tengeak-tengeak udi. Ngen awei o, amen uku teko be, coa perlu uku bertindok tegas teadepnu ngen makei kuaso de nelei Tuhan ngen uku. Kuaso o nelei utuk mbangun udi, iso utuk majua.

¹¹Akhirne, Saudaro-saudaroku, lokba udi riang, berusahoba jijai sempurno. Temimoba kute nasihat uku. Lokba udi do atei ngen idup rukun; mako Allah, sumber kasih ngen damoi sejahtera bakea semerto udi!

¹²Keleiba salam suang ngen de luyenne seca'o mesra. Salam kunei kute tun sucai ngen udi.

¹³Tuhan Yesus Kristus memberkati udi, Allah mengasihi udi, ngen Roh Allah semerto udi kutene. Hormat keme, Paulus