Read Rejang 2 KORINTUS 7 Bible Online

2 KORINTUS 7 - Rejang bible

2 KORINTUS 7

¹Saudaro-saudaroku terkasih, kerno ite uyo temuan janjai-janjai o, maroba ite semucai diraite kunei kute de jemijai ite kotor. Lokba ite saben ngen Allah, supayo ite dapet idup khusus utuk Si ngen sempurno.

²Keleiba penan bagiak keme neak lem atei udi! Keme coa perneak menea saleak teadep suang tun kulo, coa suang tun kulo de keme nea jijai rugai, ngen keme coa mesoa utung kunei suang tun kulo.

³Uku madeak awei yo, iso utuk mukum udi, sebab nano bi uku madeak bahwo udi bi dapet penan neak lem atei keme, sehinggo ite sehidup sematei.

⁴Uku kebiak pecayo ngen udi; uku kulo kebiak bangga teadep udi. Sekilai kulo keme meding dau saro, atei keme kebiak riang kerno udi.

⁵ Ketiko keme sapei neak Makedonia, keme samo sekilai coa sepat istirahat. Neak ipe bae keme meding saro: kunei pihok luea tekea, kunei lem atei suang saben.

⁶Tapi Allah, de mibur tun de tembeak atei, bi mibur keme ngen tekone Titus.

⁷Atei keme riang iso bae kerno Titus bi teko, tapi kulo kerno si melei namen awei ipe ateine riang kerno udi. Si melei namen ngen keme bahwo udi indau nien temau ngen uku, bahwo udi nyesal ngen plepnu bel'o ngen uyo rela mbela uku, hal o menea uku lebiak riang igai.

⁸Kunyau su'etku menea ateinu sedih, uku coa nyesoa temulis su'et o. Memang perneak uku nyesoa, kerno uku kemliak su'et o menea ateinu sedih — kunyau utuk sementaro bae ke'anne — .

⁹Tapi uku uyo riang, iso kerno udi bi duko, meluyen kerno dukonu menea udi tobat. Sebab dukonu o adeba temurut kelok Allah, sehinggo udi didik kulo coa rugai kerno keme.

¹⁰Sebab dukocito awei o mbin asea perubahan atei de mbin keselamatan. Tapi dukocito de kunei dunio yo mbin matei.

¹¹Cubo udi perhatikan jano aseane utuk ko ngen kesedihan de temurut kelok Allah! Aseane adeba udi sungguak-sungguak berusaho utuk njeniak de keruh! Udi jijai jengiak teadep duso, udi saben, udi indau, udi jijai semangat, udi rela mukum de saleak! Lem kute persoalan yo udi bi melei namen bahwo udi coa saleak.

¹²Sebab o, amen uku bi temulis su'et ngen udi, mako iso kerno tun de saro menea saleak, meluyen supayo kerelaannu teadep keme jijai nyato bagiak udi neak adep Allah.

¹³Sebab o ba keme jijai riang. Seluyen penghiburan de keme dapet o, keme lebiak igai sukocito kerno sukocito Titus, sebab udi kute semnang ateine.

¹⁴Uku memang bi mujai-mujai udi ngen si. Mujuaba, udi coa semelek uku. Kutene de perneak keme madeak jano de benea ngen udi. Awei o kulo jano de keme nujai tetang udi ngen Titus ternyato benea.

¹⁵Uyo si tambeak mengasihi udi, sebab si tinget awei ipe Saudaro kutene lok temotoa pipinanne ngen awei ipe udi temimo si ngen hormat ngen ta'at.

¹⁶Uku riang, sebab uku dapet pecayo ngen udi lem kute hal.