Read Rejang GALATIA 2 Bible Online

GALATIA 2 - Rejang bible

GALATIA 2

¹ Pat blas taun sesudo'o, uku lalau igai moi Yerusalem ngen Barnabas ngen Titus kulo uku mbin.

²Uku lalau moi Yerusalem kerno Allah bi madeak ngen uku bahwo uku harus lalau. Ngen lem do pertemuan khusus ngen pemipin-pemipin neak di, uku tem'ang Bito Baik de uku melei namen ngen tun-tun de iso Yahudi. Sebab uku coa lok usaho uku de bel'o atau uyo, cuma sio-sio.

³Titus, de kemuat uku, adeba tun Yunani, tapi si coa terpakso utuk semunat diraine.

⁴Memang ade tun-tun de makso hal o. Tobo'o adeba tun-tun de makso masuk moi lem golongan ite ngen nyamar sebagoi pasuak. Tobo'o masuk seca'o dediem utuk semlidik kebebasan de ade ngen ite kerno ite jijai do ngen Kristus Yesus, supayo ngen ca'o o tobo'o dapet menea ite jijai hambane.

⁵Tapi keme coa nyereak didik kulo ngen tobo'o, kerno keme lok jemago supayo Bito Baik o tep sucai utuk udi.

⁶ Kunyau awei o, coa ade hal-hal de tenuntut kunei uku ngen tun-tun de nanggap terpandang — bagiakku coa ade bedane amen tobo'o terpandang jano coa, sebab Allah coa kemliak papea.

⁷Sebelekne, tun-tun de nanggap terpandang o makau bahwo Allah bi meriteak uku utuk melei namen Bito Baik ngen tun iso Yahudi, serai awei Si sudo meluak Petrus utuk Melei namen Bito Baik o ngen tun Yahudi.

⁸Sebab Allah de melei ngen Petrus kemampuan utuk jijai rasul tun Yahudi, melei kulo ngen uku kemampuan utuk jijai rasul tun iso Yahudi.

⁹Yakobus, Petrus ngen Yohanes, de ketenne jijai pemipin-pemipin jemaat, makau bahwo Allah bi melei ngen uku tugas de khusus yo. Mako tobo'o jabat tangen ngen Barnabas ngen uku sebagoi tando persahabatan. Lajau tobo'o ngen keme tujau bahwo keme bakea kerjo neak antaro bangso-bangso de iso Yahudi, ngen tobo'o neak antaro tun Yahudi.

¹⁰Do-done kinoi tobo'o adeba supayo keme minget tun-tun peset, ngen memang do'oba de sungguak-sungguak lok uku nea.

¹¹Ketiko Petrus teko moi Antiokhia, uku terus te'ang temtangne, sebab si saleak.

¹²Mulo-mulo si temot mukmei besamo-samo ngen saudaro-saudaro de iso Yahudi. Tapi sesudo tun-tun utusan Yakobus teko, si lalau kunei saudaro-saudaro iso Yahudi ngen coa lok igai mukmei ngen tobo'o, sebab saben teadep tun-tun de lok kunyau kute tun senunat.

¹³Saudaro-saudaro Yahudi de luyen kulo milau bersikap munafik awei Petrus, sehinggo Barnabas kulo terpengaruh utuk bersikap awei tobo'o.

¹⁴Tapi waktau uku kemliak bahwo tobo'o coa bersikap sesuoi ngen kebenaran Bito Baik o, uku madeak ngen Petrus neak adep kute tun de ade neak di, “Amen Saudaro sebagoi tun Yahudi bi idup awei tun iso Yahudi, getai Saudaro uyo lok makso tun-tun luyen idup awei tun Yahudi?”

¹⁵Memang temurut laherne, keme adeba tun Yahudi ngen iso “tun iso Yahudi de beduso”.

¹⁶ Kunyau awei o keme namen bahwo tun baik igai ngen Allah cuma kerno pecayo ngen Yesus Kristus, ngen iso kerno maneu hukum agamo. Keme suang kulo pecayo ngen Yesus Kristus, supayo keme baik igai ngen Allah liwet imen keme o, iso kerno keme maneu hukum agamo. Sebab ngen maneu hukum agamo, coa suang kulo nam baik igai ngen Allah.

¹⁷Keme berusaho baik igai ngen Allah liwet idup jijai do ngen Kristus. Tapi amen sudo menea de awei o, ternyato keme masiak “tun-tun beduso” kulo awei tun-tun iso Yahudi, jano dio taine bahwo Kristusba de jijai sebab keme beduso? Paset bae coa!

¹⁸Amen uku muloi menea igai pola hukum agamo de sudo uku musak, mako uku melei namen bahwo uku bi jijai pelanggar hukum.

¹⁹Tapi uku bi matei ngen hukum agamo utuk hukum agamo, supayo uku idup utuk Allah. Uku bi senalib ngen Kristus.

²⁰Uyo iso igai uku de idup, tapi Kristus de idup lem dirai uku. Idup de uyo uku maneu seca'o jasmani adeba idup ngen imen lem Anok Allah de sudo mengasihi uku ngen semreak dirai-Ne utuk uku.

²¹Uku coa manggap remeh rahmat Allah. Amen hubungan tun ngen Allah jijai baik igai kerno maneu hukum agamo, do'o taine mateine Kristus coa ade gunone.