Read Rejang GALATIA 4 Bible Online

GALATIA 4 - Rejang bible

GALATIA 4

¹De uku maksud adeba: selamone suang ahli waris masiak neak beak omor, si nanggap tun serai awei suang hamba, kunyau sebeneane si de temuan kute hok o.

²Ade suang tun de ngawas si ngen murus kepentingan-kepentinganne sapei si beromor de tentau bakne.

³Awei o kulo ngen ite: Selamone ite ati dewasa, ite jijai budok roh-roh de kemuaso dunio yo.

⁴Tapi sesudo genep waktaune, mako Allah mutus Anok-Ne de laher kunei suang selawei de idup neak beak kuaso hukum agamo.

⁵ Ngen awei o Si mbebas tun-tun de idup neak beak kuaso hukum agamo, supayo ite tenimo jijai anok-anok Allah.

⁶Kerno udi adeba anok, mako Allah bi meluak Roh Anok-Ne moi lem atei te, de menggang, “Ya Abba, ya Bapa!”

⁷Jijai, udi iso igai budok, meluyen anok; kerno udi Anok Allah, mako Allah bakea melei ngen udi kute sesuaktau de seniap-Ne utuk anok-anok-Ne.

⁸Bel'o ketiko udi coa kemnal Allah, do'o sebabne udi jijai budok kunei kuaso-kuaso de nanggap sebagoi ilah tapi sebeneane iso Allah samo sekilai.

⁹Tapi uyo udi kemnal Allah, atau lebiak tepat igai, Allah kemnal udi. Nah, getai udi lok belek igai ngen roh-roh dunio yo, de lemah ngen peset? Getai udi lok jijai bodok roh-roh o igai?

¹⁰Udi merayokan bilai-bilai tertentu, bulen-bulen tertentu, ngen taun-taun tertentu.

¹¹Uku khawatir, jibeak sapei jerih payeakku utuk udi sio-sio bae.

¹²Saudaro-saudaro! Uku minoi nien supayo udi jijai awei uku. Kerno uku kulo bi jijai awei udi. Udi coa menea sesuaktau kulo de saleak te'adep uku.

¹³Udi paset masiak tinget jano sebabne uku pado mulone melei namen Bito Baik o ngen udi. Sebabne adeba uku bolon.

¹⁴Pado waktau o udi coa meraso janjing te'adep uku, kunyau keadaan awokku adeba cobaan bagiak udi. Tapi udi temimo uku awei temimo malaikat Allah atau awei temimo Kristus Yesus suang.

¹⁵Udi kebiak riang pado waktau o! Tapi uyo, neak ipe keriangnu o? Uku namen bahwo pado waktau o udi rela cemukea matainu suang utuk meleine ngen uku, amen do'o dapet nea.

¹⁶Jano udi uyo bi manggap uku sebagoi musuak, kerno uku madeak kebenaran ngen ko?

¹⁷Tun-tun de luyen o ngen penuak semangat mesoa udi, tapi maksud-maksud tobo'o coa baik. Tobo'o cuma lok mutus hubungan ko ngen keme, supayo udi temotoa tobo'o ngen penuak semangat.

¹⁸Memang baik utuk semangat lem hal-hal de baik, asal bogoa awei o bae ngen jibeak cuma amen uku ade besamo-samo udi.

¹⁹Hoi, anok-anokku, uku uyo menderita igai kerno udi. Uku menderita awei suang ibu menderita pado waktau melaher. Uku bakea terus menderita, amen sifet-sifet Kristus ati ade neak lem ateinu.

²⁰Uku indau nien ade neak tengeak-tengeak udi uyo, supayo uku dapet miling ngen udi ngen sa'ei de luyen, kerno uku bi coa namen lok menea jano igai ngen udi.

²¹Nadeakba ngen uku, hoi saudaro-saudaro de lok idup neak beak kuaso hukum agamo, cubo temi'uk uku! Uku bakea melei namen ngen udi jano de sebeneane tetulis lem Kiteb Hukum Musa.

²² Neak di tetulis bahwo Abraham temuan duai anok, indok kunei anok de do adeba suang budok, ngen indok kunei anok de luyenne o adeba suang de bebas.

²³Anok kunei selawei de jijai budokne o laher awei biasone, tapi anok kunei selawei de bebas o laher kunei janjai.

²⁴Dio dapet nakei sebagoi kiasan. Duai selawei o adeba ibarat duai janjai: de done asalne kunei Tebo Sinai — do'oba Hagar; anok-anokne laher sebagoi budok.

²⁵Hagar adeba Tebo Sinai neak taneak Arab — ngen si serai ngen Yerusalem de uyo, kerno si idup lem perbudakan ngen anok-anokne.

²⁶Tapi Yerusalem de neak surgo o adeba Yerusalem de bebas, ngen siba indokte.

²⁷ Kerno neak lem Kiteb Sucai tetulis: “Beriangba ko, hoi selawei mandul de coa bakea temuan anok! Besukocito ngen tetawaiba, hoi ko de coa perneak meding gis waktau lok melaher! Sebab selawei de teninggea matenne bakea dapet lebiak dau anok kunei pado de temuan maten.”

²⁸Saudaro-saudaro! Udi suang adeba anok-anok Allah de laher kerno janjai Allah, udi serai awei Ishak.

²⁹ Pado waktau o anok de laher temurut kelok manusio, semikso anok de laher kerno kelok Roh Allah, awei o kulo uyo.

³⁰Tapi jano de tetulis lem Kiteb Sucai? Neak di tetulis “Nusirba budok selawei o beserto anokne, sebab anok budok selawei o coa bakea jijai ahli waris besamo-samo ngen selawei de bebas o.”

³¹Kerno o, Saudaro-saudaro, ite isoba anok-anok budok selawei, meluyen anok-anok selawei bebas.