Read Rejang EFESUS 1 Bible Online

EFESUS 1 - Rejang bible

EFESUS 1

¹ Umat Allah neak Efesus, de setia ngen Kristus Yesus!

²Uku, Paulus, rasul Kristus Yesus das kelok Allah ma'ep semoga Allah Bapa ite ngen Tuhan Yesus Kristus melei berkat ngen sejahtera ngen udi.

³Tepujaiba Allah ngen Bapa Tuhante Yesus Kristus bi melei karunio ngen ite kute berkat rohani neak lem surgo.

⁴Ayok dunio yo jenijai, Allah bi miliak ite liwet Kristus ngen maksud supayo ite sucai ngen coa cacet neak adep-Ne.

⁵Lem kasih Si bi temtau ite kunei semulo liwet Yesus Kristus utuk jijai anok-anok-Ne, sesuoi ngen kerelaan kelok-Ne.

⁶Tepujaiba Allah de agung, kerno liwet Anok-Ne de tecito Si kebiak sayang ngen ite.

⁷ Sebab, ngen mateine Kristus, Allah mbebas ite, taine Allah bi mapun ite kunei duso-duso ite.

⁸Si menea o kerno Si kebiak sayang ngen ite, ngen kasih o nelei-Ne ngen ite ngen penuak kebijaksanoan ngen pengertian.

⁹Sebab Allah bi melei namen ngen ite resio rencano-Ne, Si bi melei keputusan bahwo rencano-Ne o bakea senlesei liwet Kristus.

¹⁰Rencano o adeba supayo kute sesuaktau, baik de neak surgo atau de neak bumai, jijai do ngen Kristus sebagoi pemipin. Hal o bakea senlesei ngen Allah amen bi sapei waktaune.

¹¹Uku madeak “neak lem Kristus”, kerno neak lem Siba keme nelei warisan — ite de kunei semulo bi niliak-Ne sesuoi ngen maksud Allah, de kemerjo kute sesuaktau temurut keputusan kelok-Ne —

¹²supayo keme, de ayokne bi mpek harapan ngen Kristus, buliak jijai puji-pujian bagiak kemulioan-Ne.

¹³Udi kulo bi jijai umat Allah sewaktau udi temi'uk pesen Allah, adeba Bito Baik de melei keselamatan ngen ko. Udi pecayo ngen Yesus Kristus kerno o Allah melei tando de temuan-Ne ngenko, adeba Roh-Ne de jenanjai-Ne.

¹⁴Roh Sucai o ba jaminan bahwo ite bakea temimo jano de sudo jenanjai Allah ngen umat-Ne. Dio melei keyakinan ngen ite bahwo Allah bakea mbebas umat-Ne. Tepujaiba Allah kerno keagungan-Ne.

¹⁵Kerno o, sesudo uku temi'uk bahwo udi pecayo ngen Tuhan Yesus, ngen udi mengasihi kute umat Allah,

¹⁶uku kulo coa bedan mucep syukur ngen Allah kerno udi. Uku bogoa minget udi lem du'oku,

¹⁷ngen minoi ngen Allah Tuhante Yesus Kristus, Bapa de mulio, supayo Si melei Roh-Ne ngen udi. Roh o bakea jemijai udi bijaksano, ngen bakea kemnal Allah ngen udi sehinggo udi kemnal Si.

¹⁸Uku minoi supayo Allah mukok pekerannu sehinggo jijai te'ang: supayo udi ngertai jano de udi ma'ep kunei Allah de menok udi. Kulo supayo udi namen kebiak dau berkat-berkat de baik de seniap Allah utuk umat-Ne;

¹⁹ngen padeak hebat kuaso-Ne utuk ite de pecayo, sesuoi ngen kekuatan kuaso-Ne de lai,

²⁰ de nakei-Ne ketiko midup igai Kristus kunei mateine ngen melei ngen-Si kedudukan de lekat besamo-samo Allah neak surgo.

²¹Kedudukan Kristus o uak lebiak lekat kunei kute pemeritek, penguaso, kuaso, kerajaan ngen tiep-tiep gen de dapet senbut, iso cuma neak dunio yo bae, meluyen kulo neak dunio de bakea teko.

²² Kute sesuaktau bi mpek-Ne neak beak kuaso Kristus, ngen melei Kristus ngen jemaat sebagoi pemipin kunei kute sesuaktau.

²³Jemaat adeba awok Kristus, jijai sempurno ngen Si de jemijai sempurno kute sesuaktau neak ipe bae.