Read Rejang EFESUS 3 Bible Online

EFESUS 3 - Rejang bible

EFESUS 3

¹Do'oba sebabne uku, Paulus, nasuk sel kerno Kristus Yesus utuk kepetingan tun-tun iso Yahudi.

²Memang udi bi temi'uk bahwo Allah, kerno atei-Ne baik, bi melei ngen uku tugas yo utuk kepetingannu.

³Allah melei namen resio rencano-Ne ngen uku, awei de uku temulis neak das ngen siket.

⁴ Amen udi mbacone, udi dapet namen resio tetang Kristus awei de uku mahamne.

⁵De pado zaman tun-tun bel'o coa nelei namen ngen anok-anok manusio, tapi uyo Roh Allah bi melei namenne ngen rasul-rasul ngen nebai-nebai-Ne.

⁶Resio o adeba: Liwet Bito Baik o, tun iso Yahudi milau jijai ahli-ahli waris ngen anggota-anggota awok ngen milau temimo jano de jenanjai Allah liwet Kristus Yesus.

⁷Kunei Bito Baik o uku bi jijai pelayanne temurut pelei anugerah Allah, de nelei ngen uku liwet kuaso Allah de kerjo neak lem diraiku.

⁸Neak antaro kute umat Allah, ukuba de kebiak hino. Tapi Allah melei karunio o ngen uku, utuk melei namen ngen tun-tun iso Yahudi Bito Baik tetang kekayaan Kristus de coa pakei abis,

⁹ngen utuk menea kute tun namen awei ipe Allah, pencipta alam semesta yo, kemerjo rencano-Ne de sejok bel'o nunyin-Ne ngen dunio.

¹⁰Maksud Allah adeba supayo uyo, liwet jemaat, kute de megong kuaso neak surgo namen kebijaksanaan Allah lem kute mecem bentukne.

¹¹Allah menea o sesuoi ngen rencano-Ne ngen perantara Kristus Yesus Tuhante.

¹²Pecayo ngen Kristus ngen jijai do ngen-Si, ite nelei kebebasan utuk ma'ok Allah ngen penuak kepercayaan.

¹³Sebab o, uku minoi ngen udi, jibeakba khawatir tetang kesaroku kerno udi, sebab kutene o utuk kebaikannu.

¹⁴Do'oba sebabne uku sujud neak adep Bapa.

¹⁵Kunei Siba tiep keluargo neak surgo ngen neak bumai temimo gen-Ne.

¹⁶Uku bedu'o semoga Allah de maho mulio kemuet batinnu ngen Roh-Ne.

¹⁷Sehinggo kerno udi pecayo ngen Kristus, Kristus tinggea neak lem ateinu das dasar ngen kenuaso neak lem kasiak.

¹⁸Uku bedu'o, supayo udi besamo-samo ngen kute umat Allah dapet paham, padeak libeane ngen panjangne serto lekatne ngen lemne kasih Kristus,

¹⁹de ngen akea manusio coa dapet naham nien. Semoga udi namen kasiak Kristus o, sehinggo udi penuak ngen kepribadian Allah de sempurno.

²⁰Allah dapet nea lebiak dau kunei pado de ite demu'o atau ite neker, awei kuaso Allah de giat bekerjo neak lem diraite.

²¹Lokba Allah dimuliakan tu'un temu'un neak lem jemaat, liwet Kristus Yesus. Tepujaiba Allah utuk selamo-lamone. Amin.