Read Rejang EFESUS 5 Bible Online

EFESUS 5 - Rejang bible

EFESUS 5

¹Udi adeba anok-anok Allah de tekasiak, sebab o udi harus temotoa teladan Allah.

² Idupba neak lem kasih, awei ipe Kristus Yesus kulo bi mengasihi udi ngen bi semreak dirai-Ne utuk ite sebagoi persembahan ngen kurban de semnang atei Allah.

³Udi adeba umat Allah, sebab o, plep-plep kidek de coa patut, atau serakah, coa patas ade neak tengeak-tengeak udi. Jibeak sapei tun luyen temuan alasan utuk madeak bahwo udi menea hal-hal awei o.

⁴Awei o kulo kecek de coa baik, de kosong atau basing bae — kerno hal-hal o coa patas — tapi sebelekne mucepba syukur.

⁵Tingetba dio baik baik: tun de menea plep kidek, atau coa wajar, atau serakeak, taine nyembeak patung, tun o coa dapet jijai anggota umat Allah.

⁶Jibeakba udi jijai seset ngen kecek-kecek de coa benea. Kerno hal-hal de awei o menea Allah murka das tun-tun durhako.

⁷Sebab o jibeakba udi kuat ngen tobo'o.

⁸Memang bel'o udi ade neak lem kelem, tapi uyo udi adeba te'ang neak lem Tuhan. Sebab o idupba sebagoi anok-anok te'ang,

⁹kerno kunei te'ang timboa kebaikan, keadilan ngen kebenaran,

¹⁰berusahoba kemnal jano de semnang atei Tuhan.

¹¹Jibeakba menea plep-plep de coa beguno de nea tun-tun de idup lem kelem. Sebelekne, lokba udi muang hal-hal awei o. (

¹²Sebab hal-hal de tobo'o nea seca'o bebunyin, utuk nadeak kulo bi selek.)

¹³Tapi kute de seneter neak lem te'ang, bakea keten ngen jelas, sebab kute de dapet kenliak ngen jelas, adeba te'ang.

¹⁴Do'oba sebabne de nadeak, “Kelongonba, hoi udi de tidua ngen jagaiba kunei tun-tun matei ngen Kristus bakea bercahayo das udi.”

¹⁵Kerno o, kemliakba bebaik, awei ipe udi idup, jibeak awei tun bodong, tapi awei tun bijak.

¹⁶ Neaba sebaik-baikne tiep kesepatan de ade ngen udi, kerno maso-maso yo adeba maso de kidek.

¹⁷Sebab o jibeakba udi bodong, tapi berusahoba supayo udi ngertai kelok Tuhan.

¹⁸Jibeakba udi mabuk ngen anggur, sebab do'o bakea musak udi, tapi lokba udi penuak ngen Roh,

¹⁹ Pakeiba kecek-kecek kunei mazmur, legau puji-pujian ngen legau rohani. Lokba udi ngen riang atei mbin legau puji-pujian bagiak Tuhan.

²⁰Bogoa mucep syukurba das kute sesuaktau lem gen Tuhante Yesus Kristus ngen Allah Bapa ite.

²¹Utuk hormat ngen Kristus, lokba udi tunduk do ngen de luyen.

²² Hoi ngenyan, hormatba ngen matennu awei ngen Tuhan,

²³kerno sematen adeba pemipin ngenyan serai awei Kristus adeba pemipin jemaat. Siba de semlamat awok.

²⁴Kerno'o, serai awei jemaat hormat ngen Kristus, awei o kulo lem kute hal ngenyan harus hormat ngen matenne.

²⁵Hoi sematen, citoba ngenyannu awei Kristus bi cito ngen jemaat ngen bi semreak dirai-Ne bagiakne.

²⁶Kristus menea o supayo Si dapet semucai jemaat o ngen ajaran-Ne ngen liwet bioa baptisan, supayo sesudo'o Si dapet semreak-Ne ngen Allah.

²⁷Ngen awei o Kristus mpek jemaat neak adep dirai-Ne ngen cemerlang, coa cacet atau cela, tapi supayo jemaat sucai ngen coa cacet.

²⁸Awei o kulo sematen harus cito ngenyanne awei Si cito awokne suang. Api de cito ngenyanne, taine cito diraine suang. (

²⁹Sebab coa perneak tun jengik ngen awokne suang. Tapi jemago ngen murusne, serai awei Kristus te'adep jemaat-Ne.

³⁰Kerno ite adeba anggota awok-Ne.)

³¹ Lem Kiteb Sucai tetulis, “Sebab o suang semanei bakea teminggea tun tuaine utuk jijai do ngen ngenyanne, sehinggo keduaine jijai do.”

³²Resio o lai, tapi de uku maksud adeba hubungan Kristus ngen jemaat.

³³Tapi ayat o ade hubunganne kulo ngen udi: Lokba tiep sematen cito ngenyanne awei si cito diraine suang ngen lokba tiep ngenyan berusaho utuk hormat ngen matenne.