Read Rejang FILIFI 3 Bible Online

FILIFI 3 - Rejang bible

FILIFI 3

¹Akherne, Saudaro-saudaroku, lokba udi riang kerno udi bi jijai do ngen Tuhan. Uku coa meding saro utuk temulis igai jano de sudo uku temulis ngen udi ayokne; sebab hal o baik utuk keselamatan udi.

²Teateiba te'adep tun-tun de menea hal-hal de kidek, tun-tun de patas senbut ‘kuyuk’. Tobo'o demsok supayo tun-tun senunat.

³Padahal iteba tun-tun de sudo temimo sunat de sejati, iso tobo'o. Ite sembeak Allah ngen bimbingan Roh Allah suang, ngen ite bersyukur kerno ite idup jijai do ngen Kristus Yesus. Ite coa begatung ngen upacara-upacara de sifetne laher.

⁴Sebeneane uku pacok bae begatung ngen upacara-upacara o. Sebab amen ade suang tun meding si ade alasan utuk begatung ngen upacara-upacara de sifetne laher, uku lebiak igai.

⁵ Uku senunat waktau beromor lapen bilai. Uku laher sebagoi tun Israel, kunei suku bangso Benyamin; uku tun Ibrani asli. Lem hal taat ngen hukum-hukum agamo Yahudi, uku adeba anggota golongan Farisi.

⁶ Uku malah tambeak semangat sehinggo uku semikso jemaat. Amen kenliak kunei segi hukum agamo Yahudi, uku suang tun de baik de coa cacet.

⁷Tapi kerno Kristus, mako kutene de bel'o uku manggap sebagoi sesuaktau de mbin utung, uyo jijai sesuaktau de menea rugai.

⁸Iso bae hal-hal o; tapi kute sesuaktau uku manggap sebagoi hal-hal de cuma jijai rugai bae. De uku temuan uyo yo adeba lebiak bego: adeba kemnal Kristus Yesus, Tuhanku. Kerno Kristus, mako uku bi temanggea kekutene. Uku anggap kutene o sebagoi sampah bae, supayo uku dapet Kristus,

⁹ngen benea-benea jijai do ngen Si. Hubungan de baik ngen Allah coa igai uku usaho suang ngen ca'o taat ngen hukum agamo. Uyo uku temuan hubungan de baik ngen Allah, kerno uku pecayo ngen Kristus. Jijai, hubungan de baik o teko kunei Allah, das dasar pecayo ngen Kristus Yesus.

¹⁰Do-done de uku lok adeba supayo uku kemnal Kristus, ngen meding kuaso de midup Si kunei matei. Uku lok milau saro ngen Si ngen jijai serai awei Si lem hal kematian-Ne.

¹¹Ngen uku ma'ep bahwo uku suang bakea nidup igai kunei matei.

¹²Uku coa madeak bahwo uku bi berhasil, atau bi jijai sempurno. Tapi uku terus bae berusaho mbut hadiah de seniap Kristus Yesus. Utuk do'oba Si bi mbut uku ngen jemijai uku de Si temuan.

¹³Pasetne, Saudaro-saudaro, uku sesungguakne coa meding bahwo uku sudo berasea mbut hadiah o. Bakea tapi ade do hal de uku mbut, adeba uku mlupo jano de ade neak belakang uku ngen sungguak-sungguak berusaho utuk dapet jano de ade neak adep uku.

¹⁴Do'o sebabne uku melilai terus sapei moi tujuan akhir utuk dapet kemenangan, adeba idup neak surgo; utuk do'oba Allah menok ite liwet Kristus Yesus.

¹⁵Ite kute de sudo dewasa seca'o rohani, harusba sikep awei o. Tapi amen neak antaro udi ade de madeak luyen, mako Allah bakea jemlasne kulo ngen udi.

¹⁶Tapi hal yo lokba udi kemliak: Ite harus tep idup temurut peraturan de sudo ite totoa sapei uyo.

¹⁷ Saudaro-saudaro, totoaba teladan uku. Keme bi melei teladan de benea, sebab o kenliakba bebaik tun-tun de motoa teladan keme o.

¹⁸Uku bi cet melei namen ngen udi, ngen uyo uku mulangne igai ngen ca'o ngindoi, bahwo ade dau tun de idupne musak tai mateine Kristus senalib.

¹⁹Idup tun-tun awei o bakea berakhir ngen kehancuran, sebab Tuhan tobo'o adeba tenei tobo'o, kemulioan tobo'o adeba aib tobo'o, pekeran tobo'o cuma ngen perkaro duniawi.

²⁰Tapi ite adeba warga negara surgo. Kunei diba kulo ite mbot Tuhan Yesus Kristus sebagoi Juruselamat.

²¹Awokte de lemah ngen dapet ajua yo, Kristus bakea mubeak jijai awei awok-Ne suang de mulio. Si dapet menea o kerno Si temuan kuaso utuk maleak kute sesuaktau.