Read Rejang FILIFI 4 Bible Online

FILIFI 4 - Rejang bible

FILIFI 4

¹Sebab o, Saudaro-saudaro de uku cito, awei yo ba lokne udi idup ngen sungguak-sungguak pecayo ngen Tuhan. Ateiku indau ngen udi! Udiba kebanggaanku de menea uku riang.

²Euodia ngen Sintike, duai saudaro selawei! Uku minoi nien supayo udi do atei sebagai tun-tun do imen.

³Ngen kuatku de setia, uku minoi kulo supayo Saudaro temulung keduai selawei o. Tobo'o bi kerjo sungguak-sungguak besamo uku utuk melei namen Bito Baik kunei Allah; serai awei Klemen ngen kute tun luyenne de kerjo besamo-samo uku. Gen-gen tobo'o ade lem Bukau Tun Idup.

⁴Semoga udi bogoa riang kerno bi idup jijai do ngen Tuhan. Debat igai uku madeak: beriangba!

⁵Lokba kute tun dapet kemliak sikep udi de baik atei. Sebab coa an igai Tuhan bakea teko.

⁶Jibeakba kuatir tetang jano bae. Lem kute hal, bedu'oba ngen minoiba ngen Allah. Jano de udi perlu, melei namenba do'o ngen Allah ngen mucep mokasiak.

⁷Mako sejahtera kunei Allah de coa mukin dapet manusia ngertai, bakea jemago atei ngen pekerannu de sudo jijai do ngen Kristus Yesus.

⁸Akherne, Saudaro-saudaro, isaiba pekerannu ngen hal-hal beguno, de patut nujai, adeba hal-hal de benea, de terhormat, adea, murni, mis, ngen baik.

⁹Naneuba jano de sudo udi belajea ngen temimo kunei uku; baik kunei kecek-kecek atau kunei plep-plep uku. Allah sumber sejahtera bakea semerto udi.

¹⁰Lem idup uku de jijai do ngen Tuhan, uku meding bahagia sekilai, sebab bi an amek, uyo udi sepet igai meker keadaan uku. Maksud uku isone bahwo udi bi mlupo uku; udi memang kemliak uku, tapi udi coa dapet kesempatan utuk kemtenne.

¹¹Uku madeak yo iso kerno uku serbo ku'ang, sebab uku sudo belajea meding pues ngen jano de ade.

¹²Uku sudo meding idup serbo ku'ang, ngen kulo idup ngen serbo ade. Uku sudo kemnal resione utuk madep keadaan de awei ipe kulo; baik keadaan serbo ade atau peset.

¹³Ngen kuaso de nelei Kristus ngen uku, uku temuan kekuatan utuk madep kute mecem keadaan.

¹⁴Tapi udi sudo temulung uku neak lem kesaro uku; ngen jano de udi nea o memang baik

¹⁵ Saudaro-saudaro tun Filifi! Udi suang namen benea bahwo ketiko uku teminggea Makedonia bel'o, pado waktau Bito Baik o uku sembea utuk pertamo sekilaine, udiba dedone jemaat de temulung uku; udi dedone de milau kemcep utung rugai besamo-samo uku.

¹⁶ Ketiko uku neak Tesalonika ngen perlu bantuan, sudo lebiak kunei debat udi mbo bantuan ngen uku.

¹⁷Do'o iso taine uku cuma lok temimo pelei. De uku lok adeba supayo uku dapet kemliak asea-asea de temambeak utung.

¹⁸ Uku bi temimo kutene — malah lebiak kunei cukup! Kute pelei de udi mbo ngen uku bi uku temimo kunei Epafroditus. Uyo uku temuan kute de uku perlu. Pelei-pelei kunei udi o adeba awei mbon um kunei kurban de nelei ngen Allah ngen de temimo Allah ngen riang atei.

¹⁹Allah de uku sembeak, de kembiak kayo lem Kristus Yesus, bakea melei kute de udi perlu.

²⁰Tepujaiba Allah Bapa ite selamo-lamone! Amin.

²¹Senapeiba salam ngen kute umat Allah de jijai do ngen Kristus Yesus. Ngen temimoba kulo salam kunei saudaro-saudaro de ade besamo-samo uku neak yo.

²²Kute umat Allah neak kota yo te'utamo tobo'o de kunei istana Kaisar, mbo salam ngen udi.

²³Semoga Tuhan Yesus Kristus melei berkat Saudaro kutene. Hormat keme, Paulus ngen Timotius