Read Rejang KOLOSE 1 Bible Online

KOLOSE 1 - Rejang bible

KOLOSE 1

¹Saudaro-saudaro umat Allah neak Kolose de setia jijai do ngen Kristus! Sebagai rasul Kristus Yesus, — kerno tenunjuk Allah — uku, Paulus, besamo-samo ngen Saudaro ite Timotius, ma'ep semoga Allah Bapa ite melei berkat, sejahtera ngen udi.

³Keme bi temi'uk bahwo udi pecayo ngen Yesus Kristus, udi sayang ngen kute umat Allah. Do'oba sebabne pado waktau keme bedu'o utuknu, keme bi mucep mokasiak ngen Allah, Bapa Tuhan te Yesus Kristus.

⁵Udi pecayo ngen udi mengasihi, sebab udi ma'ep ngen jano de seniap Allah neak surgo. Udi bi temi'uk hal o, ketiko Bito Baik de benea senapai ngen udi.

⁶Bito kunei Allah o tesebea moi kute dunio, ngen tun-tun te'us diberkati bito o, serai awei udi diberkati sejok udi temi'uk tetang rahmat Allah ngen sebeneane.

⁷ Kutene o bi udi namen kunei Epafras, kuat de keme sayang. Si adeba pekerjo Kristus de setia bekerjo utuk kepetingan te.

⁸Kunei Epafrasba keme temi'uk bahwo ngen kuaso kunei Roh Allah udi dapet samo-samo sayang.

⁹Do'oba sebabne keme bogoa bedu'o utuk udi sejok keme temi'uk tetang udi. Keme minoi ngen Allah supayo Roh Allah melei ngen udi kebijaksanaan ngen pengertian sehinggo udi namen ngen sempurno jano kelok Allah.

¹⁰Ngen awei o udi dapet idup temurut kelok Allah, ngen bogoa semnang atei-Ne, sehinggo lem kute sesuaktau udi dapet melei hal-hal de baik. Ngen pengetahuan udi tetang Allah kulo bakea tambeak kulo.

¹¹Semoga ngen kuaso kunei Allah de agung, udi kenuet sehinggo udi sanggup meding saro kute sesuaktau ngen sabar, senang atei

¹²ngen mucep syukur ngen sukocito ngen Bapa. Sebab Bapa do'oba de menea udi patas temimo jano de seniap Allah utuk umat-Ne neak lem kerajaan-Ne de te'ang.

¹³Si bi mbebas ite kunei kuaso kegelapan ngen maliak ite moi lem kerajaan Anok-Ne de kenasiak-Ne.

¹⁴ Kerno Anok-Ne o ite bebas; taine duso-dusote bi napun-Ne.

¹⁵Kristus adeba gambar de nyato kunei dirai Allah de coa keten; Kristus adeba anok tuai, Siba de lebiak utamo lem kute sesuaktau.

¹⁶Sebab liwet Siba Allah menciptakan kute sesuaktau neak surgo ngen de neak bumai, kute sesuaktau de keten ngen de coa keten, termasuk kulo kute roh de bekuaso ngen de mriteak. Kute alam yo diciptakan liwet Kristus ngen utuk Kristus.

¹⁷Ayok kute sesuaktau ade, Kristus bi lebiak dute ade. Ngen kerno Siba kulo mako kute sesuaktau ade neak penanne.

¹⁸ Siba ulau kunei awok-Ne, adeba jemaat, kerno Siba sumber kehidupan jemaat o. Siba anok de tuai, de pertamo-pertamo nidup igai kunei matei, supayo Si suang bae de jijai de paling peting kunei kute sesuaktau.

¹⁹Allah suangba de kemlok supayo kute sesuaktau de ade neak dirai Allah, ade kulo neak dirai Anok-Ne.

²⁰ Ngen liwet Anok o kulo Allah mutus utuk menea kute sesuaktau baik igai ngen Si — baik kute sesuaktau neak dunio, atau de neak surgo. Allah menea o liwet mateine Anok-Ne neak salib.

²¹Bel'o udi uak kunei Allah ngen jijai musuak-Ne kerno plep ngen pekeran kidek.

²²Tapi uyo, ngen kematian Anok-Ne, Allah menea hubungan udi ngen Si jijai baik igai. Ngen ca'o do'o udi dapet nemin madep Allah lem keadaan sucai, murni ngen coa de cacet.

²³Sebab o udi harus tep setia pecayo ngen kepercayaannu. Jibeak sapei udi muang harapan de sudo nelei ngen udi ketiko udi temimo Bito Baik kunei Allah. Bito o bi nelei namen ngen kute tun neak kute dunio. Ngen utuk do'oba kulo uku, Paulus, bi jijai pelayan.

²⁴Uyo uku senang saro utuk kepentingannu. Sebab ngen derito, uku gemnep jano de masiak harus Yesus meding saro utuk jemaat-Ne, adeba awok-Ne.

²⁵Allah meluak uku jijai pelayan jemaat-Ne utuk kepentingannu. Uku harus semapei bito kunei Allah kutene.

²⁶Bito o adeba bito de selamo berabad-abad de bel'o coa Allah melei namen ngen kute tun, tapi uyo kenten-Ne ngen umat-Ne.

²⁷Ngen umat-Ne o Allah melei namen padeak baikne ngen agungne resio-Ne o utuk kute umat manusio. Resio o adeba: Kristus ade neak lem dirainu, de taine udi bakea meding kebesaran Allah.

²⁸Kristus'oba de keme melei namen ngen tiep tun. Keme minget ngen majea tobo'o kutene ngen kute kebijaksanaan. Tujuan keme adeba supayo tiep tun dapet nemin ngen Allah, sebagai tun de lai lem hal-hal rohani, kerno bi jijai do ngen Kristus.

²⁹Utuk dapet hal o uku kerjo keras. Uku berjuang ngen kute tenago de nelei Kristus ngen uku, de bekerjo lem diraiku ngen penuak kuaso.