Read Rejang KOLOSE 2 Bible Online

KOLOSE 2 - Rejang bible

KOLOSE 2

¹Uku lok udi namen awei ipe sarone uku berjuang utuknu ngen utuk tobo'o de neak Laodikia serto kute de coa kemnal uku seca'o pribadi.

²Kutene yo uku menea supayo atei tobo'o jijai kuet ngen tobo'o sesamo mengasihi sehinggo tobo'o kuet bersatu. Ngen awei o tobo'o sungguak-sungguak ngertai ngen yakin serto namen resio Allah, adeba Kristus.

³Kristusba de kemten kute kebijaksanaan ngen pengetahuan Allah de bel'o coa keten.

⁴Uku melei namen dio supayo udi jibeak keno pike ngen api bae kulo de ketenne baik ngen ko.

⁵Kerno kunyau uku suang coa ade neak antaro udi, anggapba bahwo uku ade neak antaro udi. Ngen uku riang kemliak udi do atei ngen tep pecayo ngen Kristus.

⁶Udi bi temimo Kristus Yesus, Tuhan ite. Kerno'o lokba idupnu tep neak lem Si.

⁷Lokba udi idup neak lem Si ngen tegok neak das Si. Lokba udi tambeak pecayo ngen Kristus, temurut jano de sudo najea ngen ko. Ngen lokba ateinu penuak ngen ucapan mokasiak.

⁸Lokba udi teatei, jibeak sapei ade de mbujuk udi ngen falsafah-falsafah manusio de coa beguno, cuma menea udi jijai sesat. Falsafah-falsafah o iso kunei Kristus, tapi kunei pendapet manusio bae ngen kunei roh-roh penguaso dunio.

⁹Sebab kute kepribadian Allah ade lem Kristus, adeba lem kemanusiaan-Ne.

¹⁰Kerno jijai do ngen Kristus, udi kulo nelei idup sepenuakne. Sebab Kristus adeba pemipin das kute roh de bekuaso ngen de meriteak.

¹¹Kerno jijai do ngen Kristus, udi bi senunat, iso sunat de nea manusio, meluyen ngen sunat de nea Kristus, de mbebas udi kunei duso.

¹² Sebab pado waktau udi dibaptis, udi kenubua besamo-samo Kristus; ngen baptisan o kulo, udi kulo nidup igai besamo-samo Kristus kerno udi pecayo ngen kuaso Allah de bi midup Kristus kunei matei.

¹³ Bel'o udi bi matei seca'o rohani kerno bi beduso, ngen kerno udi coa senunat seca'o laher. Tapi uyo Allah midup udi besamo-samo Kristus. Allah bi mapun kute duso te,

¹⁴ ngen mbuye su'et utang te'adep ite, de macam ite ngen syarat-syarat de saro. Ngen semalib su'et o moi kieu salib, Allah mapus kute dakwaan te'adep ite.

¹⁵Kristus menea kute roh-roh de meriteak ngen bekuaso jijai coa de dayo igai ngen jemijai tobo'o totonan tun dau lem kemenangan-Ne.

¹⁶ Kerno o, jibeak munyau tun semaleak udi tetang kembuk ngen menem atau tetang bilai rayo, bulen blau atau kulo bilai Sabat.

¹⁷Kutene o cuma bayangan bae kunei hal-hal de bakea teko, tapi nyato kunei hal-hal o adeba Kristus!

¹⁸Jibeakba udi munyau dirainu rugai ngen tun de aweine merendeak dirai ngen sembeak malaikat-malaikat. Tun o ombong ngen pekeran-pekeranne de duniawi ngen mengagung-agungkan pengeliak-pengeliakne de khusus,

¹⁹ sehinggo coa igai bepegong pado Kristus de jijai pemipin. Neak beak pipinan Kristus, kute awok jenago ngen jenijai do ngen sendai-sendaine, serto idup temurut kelok Allah.

²⁰Udi bi matei besamo-samo Kristus, ngen bi bebas kunei roh-roh de kemuaso alam yo. Nah, getai udi idup awei tun de masiak kenuaso dunio yo? Getai udi tunduk ngen peraturan-peraturan awei yo,

²¹“jibeak megong dio”, “Jibeak kemcep do'o”, “Jibeak gemindoa dio”?

²²Kute peraturan o adeba tetang hal-hal de sudo nakei coa de guno igai. Do'o cuma peraturan-peraturan ngen ajaran-ajaran de nea manusio.

²³Memang ketenne hal o bijaksana, ngen anjuran supayo tun nyembeak malaikat, rendeak dirai ngen semikso dirai; tapi kutene o coa beguno utuk tema'en nafsu manusio.