Read Rejang 1 TESALONIKA 3 Bible Online

1 TESALONIKA 3 - Rejang bible

1 TESALONIKA 3

¹ Keme coa taen igai, kerno'o keme mok keputusan utuk tinggea suang dirai neak Atena.

²Lajau keme mbo Timotius, Saudaro do imen te. Si suang pelayan Allah de kerjo besamo keme utuk melei namen Bito Baik tetang Kristus. Keme mutus Timotius ngen udi supayo si kemuet udi ngen ndukung udi utuk lebiak pecayo igai ngen Kristus.

³Ngen awei o coa suang kulo kunei udi de coa kuet imenne kerno derito-derito yo. Udi suang namen bahwo derito-derito o adeba lem rencano Allah utuk ite.

⁴Pado waktau keme masiak besamo udi, keme bi melei namen ngen udi lebiak dute bahwo ite bakea saro. Ngen do'o benea-benea bi tejijai; udi suang namen.

⁵Do'oba sebabne uku mutus Timotius, kerno uku lok nien namen awei ipe imennu lem hal pecayo ngen Kristus. Uku khawatir Iblis berasea menggoda udi sehinggo kute jerih payeak keme coa sio-sio.

⁶ Uyo Timotius bi teko igai ngen bi semapei ngen keme bito riang tetang awei ipe udi pecayo ngen Kristus ngen samo-samo mengasihi. Si melei namen ngen keme bahwo udi bogoa minget keme ngen baik tetang keme neak lem atei udi. Ngen udi lok temau ngen keme, serai awei keme kulo lok temau ngen udi.

⁷Do'oba sebabne, Saudaro-saudaro, neak lem kute saro ngen derito keme, keme terhibur ngen bito tetang udi. Pecayonu ngen Kristus melai atei keme.

⁸Uyo keme idup igai, asal bae udi tep setia lem Tuhan.

⁹Padeak laine asai mokasiak keme ngen Allah das kute keriang de keme meding neak adep-Ne kerno udi.

¹⁰Lueng kelmen keme bedu'o ngen sungguak-sungguak, supayo ite temau sekadep kunyau lekep jano de udi perlu utuk pecayo ngen Kristus awei ipe seharusne.

¹¹Kirone, Allah Bapa te, ngen Yesus, Tuhan te, mukok dalen bagiak keme utuk temau ngen udi.

¹²Semoga Tuhan menea udi tambeak mengasihi do ngen de luyen ngen tambeak mengasihi kute tun, sehinggo kasihnu o betambeak, serai awei kasih keme ngen udi.

¹³Ngen awei o Tuhan bakea kemuet ateinu, sehinggo udi sucai ngen coa cacet neak adep Allah Bapa ite, pado waktau Tuhan ite Yesus teko besamo kute tun de jijai de Si temuan.