Read Rejang 1 TIMOTIUS 1 Bible Online

1 TIMOTIUS 1 - Rejang bible

1 TIMOTIUS 1

¹ Timotius, anokku de sejati neak lem Tuhan! Su'et yo kunei uku, Paulus, rasul Kristus Yesus das periteak Allah, Penyelamat ite ngen das periteak Kristus Yesus, harapan te. Semoga Allah Bapa ngen Kristus Yesus Tuhan ite melei berkat, rahmat ngen sejahtera ngen ko.

³Uku lok supayo ko tep tinggea neak Efesus awei de sudo uku demsok ko pado waktau ko lalau moi Makedonia. Sebab, neak Efesus ade kekedau tun de sembea ajaran de coa benea, ko harus mdan tobo'o.

⁴Madeak ngen tobo'o supayo jibeak igai melei perhatian pado dongeng-dongeng ngen cerito-cerito asal-usul de coa putus-putusne. Kutene o cuma menea tekea bae, ngen coa memajukan rencano Allah de cuma dapet kemnal liwet pecayo ngen-Si.

⁵Tujuan nasihat uku o adeba supayo tun dapet temuan atei de sucai serto sungguak-sungguak pecayo ngen Tuhan, ngen awei o tobo'o dapet mengasihi sesamone.

⁶Ade pa'o tun de sudo coa idup awei o igai, ngen sesat lem perdebatan-perdebatan de coa ade gunone.

⁷Tobo'o lok jijai gu'au-gu'au agamo, padahal tobo'o suang coa paham ngen kecek-kecek de tobo'o pakei atau hal-hal de tobo'o madeak ngen yakin.

⁸Ite namen bahwo hukum agamo adeba baik, amen nakei awei ipe seharusne.

⁹Pasetne harus ninget bahwo hukum nea iso te'adep tun baik, tapi te'adep para pelanggea hukum, para penjahat, tun bejat, te'adep tun beduso, tun coa ade agamo, tun duniawi, te'adep tun de munuak tun tuaine, para pembunuh pado umumne,

¹⁰te'adep tun-tun cabul, hubungan sesamo jenis, penculik, tukang mike; saksai-saksai dusta, ngen api bae de menea hal-hal de bertentangan ngen ajaran de benea.

¹¹Ajaran o ade neak lem Bito Baik de penyebaranne cenayo ngen uku, adeba Bito Baik kunei Allah de agung ngen patut nujai.

¹²Uku mucep syukur ngen Kristus Yesus Tuhan ite. Si bi melei kekuatan ngen uku utuk melayan Si, ngen Si manggap uku patas utuk tugas o,

¹³ Kunyau bel'o uku fitneak ngen semikso serto mino Si. Tapi Allah mengasihi uku, kerno pado waktau o uku ati pecayo, jijai uku coa namen jano de uku nea.

¹⁴Malah anugerah Tuhan te o bi nelei ngen uku. Si melei ngen uku kepacok utuk pecayo ngen-Si, mengasihi sesamo manusio. Kepacok o nelei ngen ite kute de sudo jijai do ngen Kristus Yesus.

¹⁵Kecek o benea ngen patut tenimo sepenuakne, “Kristus Yesus teko moi dunio yo utuk semlamat tun beduso.” Ngen neak antaro tobo'o ukuba de kembiak beduso.

¹⁶Tapi justru kerno'oba Allah mengasihi uku, supayo Kristus Yesus dapet kemten kute kesabaran-Ne te'adep uku, tun de kembiak beduso yo. Ngen dio jijai suaktau contoh utuk kute tun de be bakea pecayo ngen-Si ngen dapet idup sejati ngen kekal.

¹⁷Allah, Rajo kute zaman, patut nelei hormat ngen nujai, sebab Siba de kekal, de coa keten ngen esa! Amin.

¹⁸Tugas yo uku melei ngen ko, Timotius anokku, sesuoi ngen pesen Allah de senapei nebai-nebai lem jemaat tetang dirainu. Lokba pesen o jijai bekal utuknu lem perjuangan de baik.

¹⁹Berjuangba ngen bepegong pado kepercayaan de benea ngen atei nurani de sucai. Ade tun-tun de coa dulai ngen sa'ei atei nuranine, sehinggo ajuaba kepercayaan tobo'o.

²⁰Neak antarone adeba Himeneus ngen Aleksander. Keduai tun o bi uku mukum ngen semreakne ngen Iblis, supayo tobo'o belajea utuk je'o mino Allah.