Read Rejang 1 TIMOTIUS 4 Bible Online

1 TIMOTIUS 4 - Rejang bible

1 TIMOTIUS 4

¹Roh Allah seca'o tegas madeak bahwo pado maso-maso de bakea teko, ade tun de bakea murtad, lajau temotoa roh-roh de menea tun jijai sesat ngen ajaran-ajaran Iblis,

²de senapei liwet tun-tun munafik de mike. Atei nurani tun-tun o bi kelem.

³Tobo'o majea tun utuk coa nikeak ngen coa mbuk kembuk kunei Allah. Padahal kembuk o nea Allah utuk nembuk ngen mucep mokasiak ngen tun-tun de sudo pecayo ngen Kristus ngen bi kemnal ajaran de benea kunei Allah.

⁴Kerno kute de cenipto Allah o baik ngen coa ade do kulo de haram, amen tenimo ngen mucep syukur ngen Allah.

⁵Sebab kutene o kunei Allah ngen du'o menea kembuk o jijai halal.

⁶Amen ko majea kutene o ngen Saudaro-saudaro do imen, ko bakea jijai pelayan Kristus Yesus de bekerjo ngen baik. Ngen ko bakea mupuk batinnu ngen kecek Allah de ite pecayo, ngen ajaran-ajaran de benea de sudo tenotoanu ke'an yo.

⁷Ne'uakba cerito-cerito takhayul de coa beguno. Lokba ko latih dirainu utuk beribadah.

⁸Latihan jasmani didik bae gunone, tapi latihan rohani beguno lem kute hal, sebab mengandung janjai utuk idup pado maso uyo ngen maso de bakea teko.

⁹Hal o benea ngen patut tenimo sepenuakne.

¹⁰Do'oba sebabne ite berjuang ngen kerjo keras, sebab ite ma'ep sepenuakne ngen Allah de idup; Siba penyelamat kute tun, terutamo tun-tun de pecayo.

¹¹Najeaba kutene o ngen neluakba tun-tun temotoane.

¹²Jibeak suang tun kulo manggap ko rendeak kerno ko u'ai. Sebelekne, lokba ko jijai teladan bagiak tun-tun pecayo lem keceknu ngen plepnu, lem ca'o ko mengasihi sesamo ngen pecayo ngen Yesus Kristus, lem kesetiaannu ngen lem kemurnian.

¹³Sementaro o, sapei uku teko be, ko harus sungguak-sungguak mbaco Alkitab ngen tun-tun ngen majeane.

¹⁴Jibeak ko laloi makei karunio kunei Roh Allah de nelei ngen ko pado waktau pemipin-pemipin jemaat pek tangen tobo'o neak das ulaunu, ngen nebai-nebai semapei pesen Allah tetang dirainu.

¹⁵Kerjoba kutene o ngen sungguak-sungguak supayo kemajuannu kenliak kute tun.

¹⁶Ko harus ngawas diraine suang ngen ajarannu. Lokba ko setia menea kutene o, sebab ngen awei o ko bakea selamat baik dirainu suang atau tun-tun de temi'uk ko.