Read Rejang 2 TIMOTIUS 3 Bible Online

2 TIMOTIUS 3 - Rejang bible

2 TIMOTIUS 3

¹Tingetba bahwo pado bilai-bilai terakhir bakea ade dau saro.

²Manusio bakea murus diraine suang, jijai bogoa meker caci, ombong ngen galok mike. Tobo'o galok mino tun, berutak te'adep tun tuai, coa namen mucep mokasiak, ngen coa dulai ngen agamo.

³Tobo'o coa mengasihi sesamo, coa galok melei apun, tobo'o galok kemidek gen tun luyen, galok makei kekerasan, tobo'o kejam, coa as ngen de baik.

⁴Tobo'o galok berhianat, ombong ngen coa peker panjang. Tobo'o lebiak galok temotoa hawo nafsu kunei pado temotoa Allah.

⁵Seca'o lahiriah tobo'o maneu kewajiban agamo, tapi temulok inti kunei agamo o suang. Ne'uakba tun-tun de awei o.

⁶Ade neak antaro tobo'o de masuk seca'o diem-diem moi umeak-umeak tun luyen ngen mike selawei-selawei lemah de temuan dau nien duso ngen kenuaso mecem-mecem nafsu.

⁷Selawei-selawei o bogoa minoi najea, tapi coa perneak ngertai de benea kunei Allah.

⁸ Serai awei Yanes ngen Yambres melawen Musa, awei o kulo tun-tun o melawen ajaran kunei Allah. Pekeran tobo'o bi usak, ngen imen tobo'o bi coa kuet.

⁹Tapi tobo'o coa bakea dapet jejano, sebab kebodong tobo'o bakea namen kute tun, awei de Yanes ngen Yambres meding.

¹⁰Tapi ko bi temotoa ajaran-ajaran uku, ca'o idupku, ngen tujuan idupku. Ko bi kemliak suang awei ipe uku sungguak-sungguak pecayo ngen Yesus Kristus ngen mengasihi sesamo manusio. Ko kulo namen kesabaran ngen ketabahan uku.

¹¹ Ko bi kemliak uku senikso ngen uku saro. Ko namen kute de tejijai te'adep uku neak Antiokhia, neak Ikonium, ngen neak Listra. Ko namen kute de uku meding saro. Tapi Tuhan semlamat uku kunei kutene o.

¹²Memang kute tun de lok idup semyang ngen idup jijai do ngen Kristus Yesus bakea senikso,

¹³dong tun jahat ngen tukang mike bakea tambeak jahat. Tobo'o mike tun luyen padahal tobo'o suang kulo keno pike.

¹⁴Tapi lokba ko tep bepegong pado kebenaran de sudo ko temimo ngen ko yakin, bogoa minget tun de sudo majeane ngen ko.

¹⁵Tingetba kulo bahwo kunei titik ko bi kemnal Kiteb Sucai. Kiteb Sucai o dapet melei ngen ko pengertian utuk dapet keselamatan liwet imen ngen Kristus Yesus.

¹⁶Kute de tenulis lem Kiteb Sucai, diilhami kunei Allah beguno utuk majea de benea, utuk temgur ngen mbenea de saleak, ngen majea manusio supayo idup temurut kelok Allah.

¹⁷Ngen awei o tiep-tiep manusio de Allah temuan, dapet jijai baik.